法國鵝肝專門店

为老友庆生，预定该餐厅，本满怀期待，未曾想竟成为有记忆以来最差体验。总结📝：食物味道尚可，但食到保鲜纸。向waitress反映，态度极差；向主厨反应，态度竟更差，甚至赶我走。我几乎将异物吞落肚，等待同餐厅沟通期间不敢再食，竟被主厨话我侮辱食物。这位主厨未处理干净食材，就摆上客人的餐桌，恐怕才是侮辱厨师之名。—————当日入内坐低，选了菜式，不久后即开始用餐包和餐汤。餐厅氛围不错，但侍应质素普通，莫讲话介绍食物，甚至连菜式名称都没有告知，只放下便走。杯中酒饮完也久久没有添加。全场2名侍应，waitress操不纯正广东话，waiter讲国语。黎到前菜，招牌的冻鹅肝，竟食到有疑似胶纸的物体。本以为系可食用的（类似糯米纸），但实在感觉不对，于是吐出。向waitress反映，对话如下。我：冻鹅肝似乎有胶纸，请问咩回事？waitress：哦，因为鹅肝本身系用保鲜纸包住。我：喺，咁所以呢？都唔应该系连保鲜纸上？waitress：咁你系咪唔满意？我叫厨房帮你换？（其实听到佢如此应对，内心已不太舒服，但始终高高兴兴出嚟食饭，多一事不如少一事。自己已食咗一半，朋友都话算了。）我：我食都食咗，算了，就咁waitress：系OK呀嘛？咁就咁（转身走）老实说，已经无心情enjoy餐饭，朋友同我倾计都心不在焉，越谂越嬲，再叫住个waitress我：其实你系咪至少应该同我讲句唔好意思先？waitress：（音量提高）我咪即刻同你解释啰，鹅肝系用保鲜纸包我：我知你有解释，但你完全冇讲sorry㖞？waitress：咁你想点？我问你使唔使帮你换你又话唔使㖞我：我明白咗你个解释，但而家系你哋处理食材有问题，咁我至少都要反映返？我谂住做个好人唔使咁麻烦，你仲「你想点」，你而家咩态度？waitress：咁我而家同你讲唔好意思啰得未？我：我觉得你态度有问题，叫你经理出嚟同我讲waitress：（大声）好！！（转身走）waitress全程声大夹恶，我真系莫名其妙，似乎是我专程陷害他们，来找麻烦。（5分钟后）waitress：经理入边忙紧，佢得闲𠮶阵会出嚟同你讲我：ok之后我一路饮酒，同朋友谈天，一边等。我对于食品安全有疑虑，在餐厅释疑之前不敢继续食，同时认为需要保留住呢碟食物。不经不觉已经过咗一段时间，我听到waitress叫waiter问我仲食唔食，唔食就收走。我（对waiter讲）：你叫她自己来跟我说。waitress过黎：系，呢位小姐，你想点呢？我：我呢，喺你经理出嚟同我解释返件事之前，唔会继续proceed，因为我对食品有疑虑。waitress：佢系入面忙紧，佢今晚有时间会出嚟同你讲我：我可以等。但总之我要解决左眼前嘅食品问题先。waitress：其实我冇经理，入边个个系老细黎㗎，佢准备紧主菜，你系咪要我揾佢同你讲？我：冇问题。waitress：（大声）好！！（转身走）今次好快主厨就出黎。于是我再一次讲返件事，之后对话如下———我：我知佢有解释，但系我唔会expect呢个态度。我作为客人我见到食品有问题反映返，系咪至少应该要同我道歉？chef：系咁嘅，正如waitress所讲我哋嘅鹅肝本身系用保鲜纸包住我：我已经明白，但系我认为佢态度有问题，我需要佢道歉。chef：不如咁，系我做错，我同你道歉，我入边仲整紧主菜，你俾我返去整我：我明白人会有疏忽，呢一part我接受你嘅歉意，你feel free返去整主菜。我而家系希望个侍应可以就态度问题道歉chef：唔会叫佢道歉，因为而家真系好难请人我：吓？所以就可以咁嘅态度对客人？（其实我听到呢个逻辑已经好莫名其妙）chef：咁你想我地点做我：咁你是否应该对员工train返？chef：佢唔会道歉架啦，你搞咗咁耐，啲嘢摆系到唔食，摆到冻晒就唔好食㗎喇。你咁样侮辱咗啲食物！我：？？我食紧㗎㖞？？我系因为等紧你处理先要喺度等咋㖞？？chef：（收走台面嘢食）我谂我都唔会整主菜㗎啦，你侮辱食物（转身走）然后个chef就叫waitress唔收钱，赶我地走喇。我真系从未见过咁荒谬嘅事情。首先，鹅肝用保鲜纸包住又如何？大把食物都系用嘢包住，普通餐厅食个蟹柳都会帮我拎起胶纸，一间人均过千嘅餐厅，食物有异物竟如此理所当然？其次，服务态度差到难以置信，因为而家难请人，我就要俾钱受气？最后，呢位主厨将未处理干净的食材提供给客人，仲侮辱反映问题的客人，颠倒黑白厚颜无耻的程度，实在令人叹为观止。已就食品安全问题投诉食环，食环职员告知我因为餐厅冇收钱，同埋已经极速收走咗食物冇咗证据，所以无办法就呢个case处理。我谂呢个都系主厨唔收钱赶客走嘅目的。听闻主厨即将退休，都系好事，厨房毕竟是十分精细的工作，既然力有不逮，与其死鸡撑饭盖，不如接受宝刀已老的现实，以免害人害己。…查看更多

前排见人介绍得知年尾结业之后book 左嚟同朋友庆生要注意而家净系收现金.当日6:30我哋就到法式小餐馆嘅装修 成个感觉好精致好温馨座位唔太多 坐得好舒服怖满好多画同照片同书籍相信都系老板嘅珍藏坐低之后侍应就问我哋今日边个生日讲声「生日快乐🥳」并且递上餐单及热辣辣烘过嘅腰果，粒粒都好饱满每位$600 5courses 免加一 特别嘅items 再加钱先有每人一小条法包 前菜系烤芝士海鲜面层系烧焦嘅芝士再配有白汁同海鲜，印象有一旧虾仁抑或小龙虾好有鲜味，唔系平时𠮶种冷藏货爽口嘅口感，呢一小杯烤芝士海鲜食落一啲都唔漏，作为开胃菜的确有啲小惊喜呢😌之后就到汤嘅部份，我哋一个要咗龙虾汤（+$50），另一个要咗冻奶油蚝汤，龙虾汤比较普通正常发挥，平时喺香港好少接触到冻汤，我觉得感觉有啲似日本拉面嘅蚝汤，应该系因为冻嘅关系，所以个蚝味未至于好突出，系淡淡隐隐约约蚝味，仲有橄榄油嘅香味，第一次试都觉得几特别🦪第三份前菜我哋要咗一个煎法国鸭肝（+$100）同自家制烟熏法国鹅肝冻（+$100）嚟到呢间法国鹅肝专门店当然要试吓佢哋整肝嘅手势啦！🤭🤭.煎法国鸭肝外脆内软！𠮶种油脂感溶化喺口好食！再配埋无花果嘅清甜帮手解返𠮶种油腻感自家制烟熏法国鹅肝冻，呢个都好有惊喜，佢个烟熏味真系好香好香，佢last咗喺口入边好耐⋯ 再要讲一次好香，虽然叫鹅肝冻，但系一啲都冇𠮶种「啫喱状嘅冻」根本系一个雪冻嘅鹅肝酱，先试一啖就咁食鹅肝，第二啖再搭配埋面包一齐食之后再加埋无花果一齐食几款体验都好好🤤🤤食咗呢几个前菜其实都饱咗啲，但终于嚟到主菜原本我哋想叫本地野生海鱼，但𠮶日咁啱冇，嚟到法国餐厅除咗食油封鸭腿，当然要试埋另一个法国名菜红酒炖牛面颊.红酒炖牛面颊一上枱就见到佢个红酒个颜色好浓厚，你见到以为佢个份量好似好细，但其实夹晒成五个course都好够饱，牛面颊唔会炖到好腍，佢仲可以保持到好有口感咬口，有一嚿梨同埋一堆青豆作伴碟，梨嘅味道酸酸地清甜意想不到原来咁夹！自问唔系青豆爱好者，但因为佢个汁实在太浓厚，同埋佢个青豆依然保持到爽脆，唔系淋到一Pat 咁俾你，同朋友仔居然一齐争食青豆😂清碟成功🏅😂😂😂另一位主角法国油渍鸭腿（+$100），我觉得佢好食过我喺法国食嘅😂😂😂 鸭腿外皮系酥脆𠮶啲油脂形状依然喺度入口即溶！呢个我有被惊艳左！呢种口感实在太好了🫢鸭腿嘅肉咸咗少少，但配埋薯仔都好好食，基本上佢哋唔止主菜好食系连所有配菜都好好食！！大推！！之后终于到甜品，我哋要咗一个法式焦糖炖蛋同埋呢度独有嘅鸟结雪糕（+$50）鸟结雪糕用咗鸟结糖嘅概念去创作而成，佢入边嘅琥珀合桃好好食好香，雪糕口感有啲似棉花糖，唔会好冰𠮶种感觉，几有趣🥳Cream brûlée 最出色嘅位系𠮶层糖真系好厚！！整体佢嘅甜品甜味亦都拿捏得好好唔会甜到你好漏，即刻谂返起去法国旅行时候食嘅甜品都真系一啲都唔会甜死！两个人埋单$1600，成餐饭大家都好满意，食物质素好出色，食得好开心，服务亦都好好，知道我哋钟意一齐分享嚟食又会俾啲碟我哋，希望大家都把握最后时光去食到呢一份嘅美味！🥹🥹🥹…查看更多

呢度总结左两次用餐体验。烟熏鹅肝冻系我最喜爱嘅菜式之一。烟熏味与鹅肝冻融为一体，有别于一般「餐桌烟熏表演」那一闪即逝的烟熏味道。鹅肝冻既丝滑感觉现在脑海中，我会为左佢再嚟。龙虾汤拍得住Lawry’s Prime Rib既龙虾汤味道，只系Lawry’s 多左旧龙虾肉。煎鸭肝外香脆内嫩滑，最紧要系冇渣，亦冇肥腻油益嘅感觉。主菜我个人特别喜爱佢既煎鱼。食西餐通常煎鱼都唔会特别出色，因为都系急冻鱼块嚟。但系呢度用咗本地新鲜鱼，熟成一日，而且煎既火喉刚好，配上炸得香脆嘅樱花虾，带出咗整碟嘅鲜味。牛扒嘅重点系佢既sauce做得好，而且做到我心目中既medium rare。Homemade 油渍鸭腿唔会死咸，个皮系煎到香酥松化，配埋个sauce系非常对味。大厨既煎功确系好好，在我看来亦代表系用心去处理每一道菜。好清嘅一碟清炖牛脸颊牛舌蔬菜，好系法式家庭小菜既感觉，我食开重口味，所以冇拣，而注重运动健康嘅朋友仔就觉得呢碟好啱佢。今次嘅前菜系沙律，当然唔系求其沙律吧嘅沙律菜，材料新鲜完全系清新嘅感觉。上一次嘅前菜Roast raclette cheese pot with seafood，用上新鲜墨鱼汁嘅海鲜薯蓉再加焗溶咗嘅raclette cheese ，非常之喜爱咁邪恶嘅食物。希望下次再去个Menu有呢一款前菜。一致认同个鸟结冰膏系好好味又唔会太甜, 而且餐厅话我知出面系无得食架，特别矜贵。Crème brûlée 蛋奶味平衡，带有新鲜云呢拿香味。最正系佢冇收开瓶费！ 佢嘅装修好cosy, 同三五知己或者一大班朋友舒舒服服食嘢倾偈，系一个好嘅选择。…查看更多

喺呢间餐厅，我开咗个味蕾嘅旅行！☄️ 首先，自制烟熏鹅肝佢啲烟韧味真系入咗我心窿窿，搭配本地有机无花果，酸甜滋味把烟熏嘅层次带起嚟，滋味够贴心。😍 煎鹅肝更加系软滑得黎带有弹性，外皮焦香得嚟唔会太腻，真系神准！一啖咬落去，觉得自己都优雅咗。👑肉类方面，美国肉眼扒啱晒牛肉控，16安士豪迈得黎肉质多汁，火侯拿捏得好准，就算我唔系专业食评家，都食得出佢嘅功架。另一啲蔬菜炖牛肉，食落去唔单止溶化喺口，连心都溶咗，呢个必试冇得输！饭后甜品，鸟结雪糕呢个选择，清新又唔会太甜，啱啱好咁收尾，过瘾！整体嚟讲，餐厅嘅服务同食物都系[劲正]，我爱咗呢一脚，打算开个粉丝团算啦！💃💯🎉…查看更多

进入餐厅已经有优雅的气氛，浪漫灯光配上古典音乐.呢次系庆祝生日，叫左4个sets,尽量试多啲菜式。先上面包及法国牛油，刚焗热，外脆内软.前菜开胃，龙虾汤非常浓好味. 面包太好吃，各添多一个厨师非常好，知道我哋share,会帮我地分埋，逐碟上。煎鸭肝及烟分鹅肝冻非常好食。青口系法国超甜的款.主菜有牛扒，牛面珠，鸽，全部都好高质。全晚服务一流，好有私房菜感觉，㕑师有交流及迎接我们离开。会再encore的餐厅…查看更多