都系𠮶句，望过下我食评都知我本身真系甚少会畀Like。我本身亦都唔系特别要去支持啲乜嘢小店，呢间小店唔系𠮶啲米芝莲级嘅服务，但系食物方面绝对系我真心推介。呢间小店唔近地铁站，都行咗十分钟左右先去到。好想写得佢好好但又担心佢出咗名之后就会好难book位，心情好矛盾。今日有同事生日，所以就同咗佢嚟呢一间小店。生日快乐！三个人打开个餐牌好多嘢想食但系眼阔肚窄。最后只系叫咗图片嘅四味海鲜。本身佢个象拔蚌刺身都话好似冇货，问完店完之后就叫咗老细去攞个象拔蚌返嚟解剖。问佢今日有冇蛏子又好似未有货，结果老细又系去咗攞啲货返嚟。话想食扇贝又话好似要去籴返嚟先有，结果老细又系去咗拎三只扇贝畀我哋。下次唔止食咁少。蒜蓉粉丝蒸开边虎虾。扣佢一粒星星系因为我食到其中一只有少少梅，但系其他全部都系好实净同好新鲜好鲜甜。想知啲虾身唔新鲜，望一望佢条尾，撑开晒嘅就系新鲜虾，夹埋晒嘅就系唔够新鲜。啲粉丝放咗喺底，索晒所有精华，重点系佢调味系啱啱好，唔会过咸，但好惹味。平时我去酒楼食亲蒜蓉粉丝蒸都唔系好够胆食晒佢哋啲粉丝，因为多数都好咸，食完一定口干舌燥，仲要试过啲粉丝唔熟，一系就熟到碎婶婶。今日清晒。蒜蓉粉丝蒸扇贝，虽然个面有少少蒸爆咗，但系依然系好鲜甜，同埋个心系啱啱熟晒。影出嚟好似细细只冇乜嘢，但系一夹起手好厚肉，不得了。同样，蒜蓉粉丝清晒。佢个豉油熟油调味啱啱好。加拿大野生象拔蚌刺身。三条友费事食咁多叫咗斤半，都系$400几左右。不得了，好先甜，好爽口，好有海鲜味。有啲人未必钟意类似赤贝嘅海鲜味道，呢只象拔蚌有但系无赤贝𠮶只血腥味。同𠮶啲养殖蚌食落好削无乜味嘅冇得比。虽然佢个豉油唔系刺身酱油，但系点少少已经好提鲜，亦减咗贝壳类海鲜嘅𠮶阵所谓腥味。老细仲专登拎咗象拔蚌个胆去帮我哋炒个豉椒炒蚬。一食真系不得了，直过咁多间小炒都未试过有一间舖头会专登帮我哋攞埋个象拔蚌胆去炒。旨味丰富，浓厚而不咸，𠮶种浓厚嘅感觉系日文所讲𠮶种コク嘅感觉，系一种你感受到有层次、丰富、浓郁、沉稳嘅𠮶种。而唔系一味嘅死咸。讲完佢嘅执底又可以讲下佢啲蛏子，蛏子好大只好先甜，冇沙，肉质爽，同埋佢炒埋个象拔蚌胆，个胆都好好食！因为都仲有少少象拔蚌肉喺入面捞埋，炒完都仲系爽口。早前都仲有食家问开我应该去边度食海鲜。因为我以前去开嘅几间都系守唔到业，做做下不敌租金同成本上将问题而质素慢慢下降。所以我一时之间都谂唔到有咩边间好推介。不过，我谂目前为止我会推介呢一间。…查看更多
