影片
食记 (72)
因为见到明星晚饭做海鲜优惠，就想去试一试。沙巴龙趸两味不错，大份，煮得好味，但有少少重口味，而且多油。乳鸽抵食好味，只需28蚊一只。蒜蓉蒸圣子都算新鲜，而且大只，70蚊有4只，抵食。姜葱桶蚝煲，蚝系炸左先，再同姜葱一齐落煲，所以一上菜系好香，有六只，但蚝有大有细，细好干。最失望既系澳洲鲍鱼，28蚊一只，一上枱已经好意外鲍鱼点解可以甘干净，一拎上手发现系离壳，重点唔鲜甜，就知系雪藏。好难接受酒楼俾雪藏货。
继续阅读
假日同屋企人饮茶，食量不大所以三个人叫三样嘢就够我好钟意芝士又钟意伊面，所以如果间酒楼有芝士伊面我通常都会叫😋 明星嘅芝士伊面系配虾而唔系龙虾，不过由于我唔食虾亦唔食龙虾，所以对我嚟讲冇分别😂😂 芝士汁水准稳定，芝士味香浓，唔会有骚味，质地稠身，好容易就挂满喺伊面👍🏽🤤 而伊面就水准冇咁稳定有时弹牙啲有时淋身啲，今次就略微太淋，不过捞埋芝士汁都好好食，推介👍🏽🤤另外叫咗烧汁煎酿茄子同家乡甜薄罉，茄子走油/炸过，外脆内软，配烧汁好夹，但烧汁水准唔稳定，有时味浓啲有时淡啲，撞手神😂家乡甜薄罉好味，煎完嘅薄罉卷成一条切件，再洒上香脆花生碎，我特别钟意食头尾，因为多边位脆啲，而花生碎就似平时糯米糍啲馅，都同薄罉夹嘅👍🏽总结：呢间酒楼水准唔太稳定，但差极有个谱，由其推介芝士伊面👍🏽
继续阅读
好多人都会发现朝早食个早餐愈来愈贵，而家其实*平日*食早餐，自己一支公都可以试下去饮早茶，明星朝早孖宝双拼都系二十几蚊，计埋茶钱加埋一，四十蚊有找，可以拣粥、肠粉，炒米等等。我食左佢个皮蛋粥加米粉，坦白说，没有什么特别，只是朝早可以有个茶餐厅以外的选择。
继续阅读
家有囍事 一家五口！庆祝父亲节 兼 六月有两位寿星一心一意黎明星食长脚蟹本身伯母想嗌啲翅食 但比我阻止左因为我地唔多食 反而我地中意食啲粟米鱼肚（跟）😌小朋友口味好多鱼肚呀 仲好大煲添呀🤤佢唔系加左好多水 或者坎咁架系真材实料 我同男友都饮左两碗以上再黎个北京填鸭脆卜卜既烤鸭片 配上软绵绵既春皮😍再加大量青瓜丝 唔即刻放落口都对唔住自己呀 冻左唔好食架嘛 衬热食🖤🖤🖤佢切到啲鸭片系岩岩好厚度既鸭肉 1:1比例咁呀 咬落去啲油 正呀妈咪再来既系清蒸东星斑 去亲酒楼都要食好嫩口呀啲肉 又煮到岩岩好 唔会太老太硬重头戏黎喇 长脚蟹呀 成千蚊架！😎平时系酒店食buffet既松叶长脚蟹棒多真系未试过食成只 auntie 佢地强力推荐话好食 佢地之前大时大节都有黎食过哗 大过我只手掌✋🏽我只手都算大架喇✋🏽✋🏽啲蟹肉好鬼鲜甜 啖啖肉 又热辣辣同酒店个啲冻食系两回事！😱😱😱😱食极都仲有架 请原谅我挂住食 无再影落去 哈哈😝
继续阅读
转眼半年第 2 季比赛完结，再到明星出席颁奖典礼。每次都系替其他镖队高兴，终于可以上颁奖台领奖喇！坐低即时细阅餐牌，期望伙食比往年更好，最后菜单都系一模一样！乳猪大并盘、上汤焗海虾伊面、翡翠花枝珊瑚、百花酿蟹拑、花胶筒螺头炖鸡汤、清蒸大海斑、鲍螺片扒生菜、极品脆皮烧鸡、鲜虾荷叶饭、奶皇流沙包、红豆沙。本来队友们聚餐食得开开心心，无啦啦走个醉酒婆过黎发神经闹事，极为扫兴！挞晒朵撩交打，自夸系大埔由细到大有几恶有几横行无忌，听到都打几火！大家都系斯文有智慧，息事宁人寒暄几句，无奈被敬几杯啤酒局住要饮，不同市井流氓计较，算数。参加几年镖赛，今届最多队友能够完成比赛由头掟到尾，无中途退出放弃，辛苦大家。初期分数包尾，掟到最后勇夺亚军，得来不易呢！多谢各队友出每一分力，大家都挨过好多激烈既饮酒排头先有今日。首年有镖队衫就得亚军，真巧合！战斗力 +5 防御 +3 速度 +1 魅力 +5 会心 +5。除奖牌外，还有纪念座呢。我正式退役，留返机会比其他青年男女吧。经过演讲、掟镖、寒暄一轮，等到 9 点终于开饭，大家都非常肚饿，食左先讲，杀呀！讲到食我真系没半点客气，还要系我最饥饿既状态下添。乳猪大并盘，乳猪微脆略肥咸味浓。烧鸭消失的鸭髀，只有胸脊位肉少细件咸咸的。叉烧松化，干干有赵口，微弱的甜突出的咸。豉油鸡白肉滑滑嫩嫩，皮薄脆弹点点肥膏黏著，豉油味强劲。卤水鹅，鹅胸湿润幼嫩淡淡肉，清香卤水甜美不浊。烧鹅，鹅皮肥腾腾食到满口油，幸好鹅胸啖啖肉渗出甜美肉汁，腌味清香。白卤水猪脚仔，不是想有的佳肴，爽脆肉皮，弹滑瘦肉，卤水芳香肉多骨少无投诉。白卤水鹅掌翼，幼齿细细只，黏滑外皮当然好味道。熏碲味道平平，皮弹肉韧。上汤焗海虾伊面，那些湿滑的师傅，粗心大意的伊面！碎湿湿腍劈劈无味多汁水汪汪伊面，加豆瓣酱直接拿起碗扫入口快靓正，基本上用筷子夹起都十分困难，要双手羹筷并用。海虾份量足够每位有一双，虾甜肉霉不爽弹。镖局宴会一贯作风第 2 道菜要来个伊面填填肚，大家都攰喇，要尽快补充一下。翡翠花枝珊瑚，蚌还蚌、枝还枝、花还花，似乎没怎么交流。西兰花非常爽脆，净食清甜，配豆瓣酱蒜辣惹味，驱使我连食几旧。爽爽珊瑚蚌渗著汤汁，软滑花枝片不脆腍腍，三种食材齐齐食更缤纷多彩。蜜桃炸虾球，硬掘掘的炸粉，咸咸假爽虾球，让清甜蜜桃夹著吃较舒服。炸海鲜卷，队友们称有异味，但我食落系完全无味没有问题，酒楼经理都不厌其烦重新炸过一碟，感谢。我一向最憎食海鲜卷，因为从来未食过一间好食。炸得金黄松脆，完全无味，馅少酱少食紧干皮一样。无味虾仔、无味带子、无味蟹柳，咩黎架？百花酿蟹拑，其中一道我最爱的佳肴，望到双眼即发光！每位只得一件，真系唔够喉呢！外层幼细面包糠炸得金黄松化，不硬不粗不刮嘴。狠狠咬啖，应声爆裂！赵到索索声，悦耳兴奋万分！虾胶超级弹牙鲜味出众，蟹肉藏于最中心位置保存肉汁，虾蟹共融更加滋味，淋上酸咪咪浙醋更生动！花胶筒螺头炖鸡汤，超级无敌美味醇厚，连饮两碗都仍想添饮。味道一绝无得顶，晶莹透亮足料浓稠，螺味非凡，鸡甜味随后赶上，只是火喉削一点点。汤渣都无一幸免，除了干鞋瘦肉被遗弃。爽滑花胶，浓味鸡肉，胶黏鸡脚，咽韧螺头，清得干干净净。鲍参翅肚红烧翅，花胶丝海参丝鲍鱼丝猪肉丝伴排翅，高汤四丝羹。厚厚稠密高汤底，醇美浓郁，原味精华尽显，呷醋醒胃提神，忍不住连饮三碗！清蒸大海斑，各战友有点饱半停手，到我发挥的时候，无需客气。整只鱼头归我，夹旧胶滑鱼肚，再多旧结实鱼背，淋上鱼汁豉油吊出鲜味，鱼味浓啖啖肉，夫复何求。挑出大堆净肉连汁，如果有碗炒饭就不得了！鲍螺片扒生菜，灼好生菜放底，鲍汁螺片芡铺面，简单易做，礼成！生菜鲜爽水润配香浓鲍汁卷著螺片塞入口，暖暖的难得一赞！蚝汁扣冬菇鸭掌扒生菜，难得有道菜食得过，可以免强一赞。爽脆鸭脚皮入味甜美，损得高兴畅快。厚厚冬菇一咬黏弹喷汁，菇汁清新可口，跟鲜味蚝汁爽甜生菜合并品尝，味道更丰富更多姿多彩。极品脆皮烧鸡，只鸡已炸好一段时间，不香不脆不热，髀肉干鞋硬，胸肉更地狱，失败！白肉极咸，韧韧鸡皮更咸，可怕！腊味糯米饭，甜豉油蒸糯米饭，捞得均匀每粒饭都有豉油香，夹杂虾米及腊肠味道，欠缺腊肉油气使得味道大打折扣，湿度太高影响味道质感，麻麻地唔难食。鲜虾荷叶饭，万分惊吓！虾仁腍劈劈软赖赖，大家轻咬一下即掉。隔夜饭湿淋淋，饭香欠奉，难食！流沙包，只看外观大家都非常疑惑，到底系豆沙包、莲蓉包，还是麻蓉包呢？搣开原来系奶皇黎㖞。我对包点或甜品都麻麻地，不过咬啖无妨。包皮软塾好揸手，手感一流爱不释手。流沙幼滑滴滴热辣辣，咸蛋味出众不太甜，失控地连食三个，真系唔好意思。红枣糕，不爱甜的我都觉得此糕点有其美妙之处，淡淡红枣甜，热烫烫黏黏像年糕，质地味道均吸引。
继续阅读