呢一日买完嘢，顺道起附近呢间食店食早餐，望下个餐牌，见到单并面连饮品都要$45，问咗店员可以将煎蛋转炒蛋之后，决定用同一价钱，叫附图上呢个餐：沙嗲牛肉面配肠仔、炒蛋及多士，热饮叫咗热奶茶。碗面同奶茶好快嚟到，多士、炒蛋同肠仔就耐啲，等齐之后，照完合体照就开餐。奶茶虽然用瓦杯装住，但好普通，比老麦好些少，但茶味唔够突出，香味亦欠奉，我就唔太满意。半块多士几厚身，唔知系唔系因为咁嘅关系，所以即使烘过都唔脆，当然亦可能摆得太耐亦唔出奇，因为咬落一啲都唔热。肠仔唔咸，但偏硬，而且食过有些少酸味，唔掂，唔会系过期卦？炒蛋亦差，既香唔滑，卖相亦差，毫不吸引，应该系无落牛奶或牛油嘅缘故，呢碟嘢，大家乐或一粥面做得比佢出色太多。至于碗牛肉面呢，先嚟一啖汤，哗！正！好少茶记嘅沙嗲牛肉面系用沙嗲汤底，虽然花生香味差些少，但绝对收货，加上牛肉亦腌得够滑，更重要系无筋，呢样非常难得，所以理所当然地照镜，虽然个面质唔系太好食，面系煮得够腍嘅，但唔够爽，所以有啲人食面会转出前一丁唔系无原因。$45呢个餐，真系食都好饱好饱，食物质素如上面评论所讲好坏参半，至于抵唔抵食，各人自有自己嘅评价，对我嚟讲，系起可接受范围嘅边缘位置。顺带一提，呢间食店只收现金，所有电子付款方式一律没有，所以起香港，无论买嘢或食嘢，一定要带现金，唔好学𠮶件所谓旅游达人咁，嚟咗香港几十年，舖头白纸黑字写明只收现金，不单只强人所难，仲放上网公审对方，结果适得其反，被围攻之余，更成为城中一时热门话题。…查看更多
嗌咗个鲍鱼片火腿通粉+煎双蛋同牛油厚多士,汤通粉口感正正常常,味道适中,汤唔太浓唔太淡,厚多士的确几厚,如果多啲牛油仲好,热柠水都有4大片柠檬都几慷慨😆家人想食饭叫咗粟米肉粒饭（当日午餐menu)有例汤同野饮咁啲阿姐比较进取,未坐够1分钟已不停问想食咩🤣啲野食亦上得好快
