影片
附加资料
多款菜式自创独特, 开业于2009年, 于2015年7月迁移至新蒲岗, 并改名为[拼食三郎]. 本店一直用心制作, 不味精, 创新, 为客人得到大满足!
营业时间
星期一至六
12:00 - 15:00
18:00 - 22:00
星期日
18:00 - 22:00
公众假期
18:00 - 22:00
以上资料只供参考，请与餐厅确认详情
寻晚去到铺，个店名好似转左，但出面依然系排哂长龙。等左阵入到去，叫返之前被受好评既蟹黄芝士鸡锅，麻辣芝士锅同紫薯风暴！ 嗯...蟹黄味十足，d芝士仲可以拉到长一长，我地咁都玩左十分钟啰⋯⋯果然系招牌菜。但麻辣锅个味就唔系好够麻辣，食到一半发现，原来佢仲有个双重麻辣鸡煲，但已经食到好饱啦！唯有下次再叫啦！紫薯风暴就只色好靓，可惜芝士味唔够， 听讲系女士最爱， 我作为一个港男， 的确唔识欣赏
继续阅读
经同事介绍，系特登去呢间食店嘅，因为我系芝士迷，朋友又话好食好多芝士。其他间食店都几难揾，不过吾紧要啦，好食嘅野多数稳世d，系一个冇乜人流商场入面，但就系呢间好多人客，心谂实冇介绍错。坐低已经好肚饿，一人嗌左一个芝士窝，一系双重芝士蟹黄鸡煲，另一个系香浓龙虾汤海鲜煲，加埋帆立贝同猪肚。吾洗好耐，睇下电视，就成煲上，两煲都超多芝士，好像吾洗钱咁，哈哈，店员仲嗌我地小心，可以拎走d菜先，免漏出。芝士蟹黄鸡煲真系劲多芝士，食条菜都痴左好多芝士，汤好浓，但又吾会咸，觉得好好，因为我好怕咸嘅，入面份量都好多，一个女仔食都食吾晒。我朋友嘅香浓龙虾汤都好正，又系芝士吾洗钱咁加俾你，这个龙虾味就比蟹黄咸少少，不过都接受到，入面系有海鲜材料，例如帆立贝，蚝等，想讲蚝都好好食，大大粒又好有蚝味，正正。同事果然冇介绍错，好食得嚟价钱仲好平，一个100蚊都吾洗又吾洗加一，真系平靓正推介。经过呢度同冬天一定要再食过！
继续阅读
新蒲岗不嬲有好多隐世美食，最紧要系新蒲岗食肆嘅价钱会比较抵食！今次无意中系新蒲岗广场揾到间新式火锅店👀本身见佢门面冇乜特别，但系平日都坐满左人，所以就索性入去试试👅呢间火锅店既模式系每人一锅，自己可以拣番啱自己口味嘅汤底同埋配菜，而且汤底特别，有成20款唔同嘅选择，最主打系芝士，当中几乎有10个汤底既款式都有芝士🧀🧀🧀🧀🧀啱晒我呢个芝士迷！紫薯芝士鸡煲: 我一直好钟意食紫薯同芝士，所以一见到餐牌就即刻拣咗呢一款，其实起初都会惊未都会好怪或者唔夹。汤底系用成堆紫薯去滚，黎到个锅入边都见到有几旧，所以呢个汤嘅质地都会比较杰身！值得一赞嘅系佢嘅鸡，因为佢系预先加工过、同埋炸香咗，所以本身已经7成熟，放左落个锅到就已经好快食得，煮到芝士紫薯丝扣住啲鸡就得，一食落口完全冇怪嘅感觉，而且仲好意外地夹🤓最开心嘅系火锅店跟餐提供公仔面，紫薯芝士汤底配公仔面，我都系第一次食，但系十分之好味！👍🏻👍🏻龙虾芝士配肥牛锅: 呢个汤底嘅龙虾味比想像中浓！而且芝士份量比紫薯锅多👅 我净系饮都饮左几碗汤先肯开始打边炉😆同埋锅嘅汤底够晒浓味，完全唔使点豉油配菜已经够味！用黎煮菜，吸晒汤底精华，更正！另外肥牛新鲜， 唯独系嫌佢份量唔够， 所以另外自己都加左多一碟肥牛同一碟腩肉，仲有香芋鱼饼同鲜虾云吞。火锅配菜: 如果嫌唔够配料可以再自己加，我钟意佢加配菜嘅份量，因为佢得一至两粒，但系咁样可以试多几款唔同配菜👍🏻火锅配菜普遍10分新鲜，最意外惊喜系鲜虾云吞，云吞爽口弹牙， 足料！
继续阅读
半熟芝士挞、芝士蛋糕、芝士饼、芝心批，咩都试过晒，就系未试过芝士火锅！今次黎到新蒲岗捉精灵，一于收服埋芝士火锅～放工搭巴士系 Mikiki 落，行 5-10min 已经到新蒲岗广场，上一楼转左行入去就见到拼食三郎。星期五夜晚八点几都仲系好生意，我地等位时都黎左几台客等，好彩只系等左10min左右就有位。今餐 $270 两锅四𩠌加饮品，计埋味道，都算几抵食。餐厅分两间铺，眼见唔宽敞但坐落又唔会特别逼，另外隔离台d火锅香味飘晒过黎，令人垂涎欲滴！呢度叫火锅先选汤底，再选主菜，然后拣埋饭/拉面/乌冬/出前一丁，如果要加配菜都好方便，用点菜纸剔剔剔就搞掂。极品蟹黄双重芝士鸡锅 $109一上台只见堆到山禁高既芝士，有 mozzarella 加车打芝士，汤虽然未滚起但都好香蟹黄味，配白饭一定无得输。汤滚后，芝士亦融入汤中，先搅拌一下芝士和蟹黄，之后就系令人期待既拉丝时间！十分邪恶～ 芝士加入 mozzarella 烟烟韧韧，汤就咁饮味道比想像中淡，但识食之人又点会就咁饮汤呢，当然加汤入白饭再食。白饭吸收汤汁精华后，蟹黄味道突出，入口甘香带余韵，正！锅入面鸡件都落足料大大旧，味道唔只汤既鲜味，似早前已腌好味道处理过再加入锅中，抬头见贴住杂志介绍，知道原来鸡件系有预先爆香，绝不马虎。龙虾番茄汤-西班牙极上豚肉锅汤面（乌冬） $72锅本身配有蔬菜，感觉健康些，汤呈橙红色，香气有虾膏香味。味道方面与平时常见的龙虾汤有点不同，可能是考虑到番茄味道而稍作调整。平常龙虾汤味道强而浓烈，颇为霸道，今次呢个虾味轻一点，带上番茄鲜甜味，既无番茄酸，龙虾味亦不过份强横，感觉新鲜，不易腻。初时觉得咩西班牙极上豚肉觉得有d夸张，谂住都系改个好名吸引食客，谁知豚肉又真系唔似一般货色，并无腥臭，而且入口松软。追加配菜叫左肥牛、响铃、帆立贝同埋姜汁皮蛋贡丸。呢个贡丸真系第一次食，咬开姜味重，口感有少少皮蛋的韧度，唔错。食物质素唔错，餐厅服务员亦有礼貌而且好贴心，值得再黎试埋个紫薯锅～
继续阅读
新蒲岗交通不算方便，平常没有机会经过，这天去完西贡游船河，决定选址新蒲岗吃晚餐。选了这间座落街坊商场的火锅店，占地相邻的两个铺位，座位不多，但奇怪的是各自的装修不同，稍不留意会以为是两间不同食店。我们选了较光猛的主店进餐。食店主打芝士鸡煲 ，汤底有多款选择，例如双重芝士、蕃茄芝士、龙虾芝士，甚至麻辣芝士，钟爱芝士的朋友又多一选择。坐下第一件事选汤底，老板娘详细为我们介绍餐牌，并温馨提示各种配搭的特色，服务体贴。看见餐牌上写着火锅可以配「唔食唔得嘅白饭」、「港人至爱嘅出前一丁」、「总会有嘅米线」，忍不住问老板娘白饭是否有何特别，店主笑说只是噱头而已。由于汤底配搭实在太多，一时之间拿不定主意。曾经在杂志介绍过的紫薯芝士鸡煲，但郤担心一甜一咸的组合未必很夹，但这种配搭仍然让我跃跃欲试。身为嗜辣者的我当然亦不得不试试麻辣汤底，店家配上龙虾汤底感觉创新。最后拍板决定紫薯芝士鸡煲以及麻辣龙虾汤底各一。火锅配料选择超过30款，同样让我们头痛，思前想后下决定选一些较特别的麻吉烧、姜汁皮蛋贡丸等。麻辣龙虾汤底先上枱，红彤彤的汤底让我急不及待先尝一口，试了几口，海鲜味浓郁鲜甜，但龙虾味稍嫌略淡，中辣程度的汤底亦不算很辣，未够过瘾。拉面、牛肉、菜等浸入汤底，充分吸收汤底的精华而非常入味。配上其他火锅配料，如姜汁皮蛋贡丸、麻吉烧、鱼肉春卷、响铃等。姜汁皮蛋贡丸一咬下去，既弹牙又爆汁，创新但非常滋味，值得一赞。接下来紫薯芝士鸡锅上枱，浅紫色的汤底，虽然特别，但对我来说不算十分养眼。看见芝士在热锅里翻滚，一种邪恶的感觉莫名而至。芝士未完全溶掉时可以拉起长长的芝士丝。紫薯汤底不会过甜，原本的担心一扫而空。鸡肉以小碟分开上，腌好的鸡经过爆香，如果单独吃已经够惹味，肉质嫩口。把它加入芝士锅煮沸，沾满紫薯蓉及芝士的鸡肉又是另一番风味。前段时间紫薯味偏淡，要待后来慢慢愈煲愈浓，汤底变得浓稠时，再用附上的稻庭乌冬泡浸在汤里吃，先能够食得出原本预期的效果。由于紫薯煲不易入味，个人认为配搭鸡肉未算最好，如果店家不只限制配鸡肉，让食客多试一点其他配搭，说不定有更好的效果。我们来得早，入座时只有一间铺位坐满，离开时发现两个铺位座无虚席。这个商场人流稀疏，但竟然有如此热闹的食店置身其中，相信除了街坊捧场外，亦有不少像我们一样慕名而来的。也是难怪的，街坊的价钱，高质的食物，创新的配搭，而且服务态度亦毫不怠慢，值得一赞。
继续阅读