彌敦粥麵家 (已結業)

其實呢間舊式粥麵店都食過好多次, 而且近日腸胃麻麻地, 放工就來食粥, 我食肉片魚腩粥($28), 我女友要皮蛋牛肉粥($23), 叫了一碟芥蘭($15), 後因女友想食雲吞, 又叫了一碗淨雲吞($18)粥底好綿, 但和生記有明顯的不同, 不過有少許味精, 但可以接受, 豬肉片和牛肉都幾滑同可口, 但魚腩今次太多細骨, 大打折扣, 而雲吞有8粒, 係舊式少蝦多肉的細粒雲吞, 都幾好食....另外以前食過及第粥都幾正架!!

同朋友仔本來打算去生記食粥打電話去都明明話會開去到門口發現星期日根本係休息既好失望最後黎左呢度食午飯叫左咖喱牛腩撈($25)同皮蛋牛肉粥($23)咖喱牛腩撈～咖喱味好濃,撈麵加左醋先至舖咖喱牛腩o係面,都幾得意同開胃,但因為幾辣下,所以朋友仔都食唔晒,牛腩都算淋但有少少韌,可以啦皮蛋牛肉粥～因為係生滾,所以等左一陣先有得食,牛肉份量好多,雖然明知用左梳打粉醃,但梳打味唔算太多,牛肉好淋而且帶少少鮮味,皮蛋好似都有大半隻,雖然皮蛋唔係溏心,但因為滾過下粥,個心溶左少少落粥度,正合晒我心意,好味道不過真係好舊式餐廳感覺環境麻麻食物選擇亦唔多但人客係不停轉而且大部份都係中年人士哥仔服務好好又搞笑

每次在對面返工, break time 時一定會選擇黎呢到食粥,真係好好食,0係其他粥店一定食唔到..唔知點解佢d牛肉粥寅係好特別...好味呀!

牙痛食粥,但又食油條又食魚皮.皮蛋瘦同魚片粥都無乜味精,幾好,幾好味,料足.油條不過不失,可以唔試.魚皮份量足,但唔夠醬油,蔥亦偏老.天氣悶熱,小小強週圍走,無辦法,體諒.伙記幾過癮.

去渡船角附近，練一種我認為最花時間又最討厭的球類運動，不過要工作應酬，無計。練習完，就撇下同事去搵食。天氣熱辣辣，但都想食碗粥，堂記只開夜晚，諗起佐敦幾間粥店，和味、金源、新興棧都食過，還未試過這裡，就揹住套打波工具，來了這裡。同另外幾間一樣，呢度係舊式粥店，不過環境方面，就以呢度最四正，起碼佢有不少的卡位。叫了碗及第粥，在等候的期間，見好多客叫油炸鬼，明知不是新鮮的也抱著一絲希望的去問「油炸特熱唔熱」，回答是「仲熱的」，所以又叫了一客油炸鬼。粥的份量比其餘三間都要少，不過味道好的話，是絕對不介意份量少的。粥底幾綿厚，幾甜，沒有多味精的影，果然亦有水準；粥料都不少，先吃豬潤，較為薄身細片，比新興棧的差得遠。豬肚爽，豬腰亦甜美，沒有「化學」的感覺，不錯。除了兩粒小小的肉丸，亦有鹹廋肉一舊，如果能切細粒一點的話會好好多，因為咁大舊，幾韌；油炸鬼不熱，俾個伙記老點左，吃落脆身，沒有炸麵應有的質感，呢味野，早上去中環威記食下剛炸起的，就知咩野係正。埋單28蚊，中等價錢，也算食得過。 佐敦四大粥店大比併：環境以呢度最好，豬潤則以金源最正，食及第粥的話，新興棧大碗足料又抵食，和味就以魚粥最好。四間

今晚到此食粥,叫左個元貝皮旦雞粥$30---不錯!魚湯粥底,皮旦是糖心的,元貝頗鮮甜,雞亦挺嫩滑!爽滑魚皮$20--很爽,亦很入味!芥蘭$14---鮮甜無渣,值得推介!

粥底綿，但不似坊間的只見白色一片，這裡可以清楚見到粥米粒。魚腩夠鮮，魚味入晒粥，好正。細細碗但好多料，值得一去呀。

近來為了努力keep fit，o尋日犧牲冇去有骨氣，選擇打波然後去食粥。好有懷舊feel，似二三十年前的陳設，牆上字了好多中文餐單外，仲有尼泊爾文tim(我估係)，望望下真係有d 尼泊爾客人。叫了碗及第粥同皮蛋豬潤粥，再o黎多碗淨雲吞水餃。兩碗粥底唔錯都幾綿，不過唔算太杰，起碼唔會水汪汪，好似飲水咁，而且又冇先前幾食過幾間粥舖咁咸。及第粥有好多豬潤，總知就唔叫豬潤粥啦，d豬潤同豬肚好爽。而加了皮蛋的豬潤粥，個d豬潤同及第粥一樣，皮蛋就一般，唔係特別好。碗淨雲吞水餃每樣各4粒，有仲兩三粿幾嫩的芥蘭tim。比較上水餃好過雲吞，雲吞較實，冇乜蝦連d鮮肉味都冇。而水餃可能大隻的關係，所以蝦同肉都較多，仲有d雲耳，所以咬落較爽口，不過同雲吞一樣冇乜鮮味。

因為朋友是附近街坊,所以她帶我去。D 粥好正!! 絕對值得去一試。my friend 推薦及第粥﹐足料又好味還有﹐記得叫油炸鬼(但千祈唔好叫牛利酥﹐因為無得賣...樣衰0左一次勒... )以一間舊式粥店來講﹐環境已經是很不錯勒~~~

行完老廟去搵食,走到對面街見有聞名已久嘅彌敦粥麵,二話不說便進,兩個人叫咗腰潤肉丸粥($23),皮蛋腰潤粥($28),走油芥蘭($14),皮蛋海蜇($35)腰潤肉丸粥裏面嘅豬潤果然唔錯,啱啱熟最好味,豬腰本身味道略淡,豬肉丸得兩粒細細,不過唔緊要,最重要粥底靚,只恨唔夠大碗; 朋友叫嗰碗皮蛋豬潤粥好多料,佢話都好好味,食完冇生記嘅咁口渴皮蛋海蜇真係幾大碟,抵食過酒樓,皮蛋心溶溶地,正! 海蜇亦爽口入味,唔錯灼芥蘭細細碟賣十四蚊貴咗啲,灼得過熟,黃黃地,美中不足裏面幾多大陸遊客食嘢; 伙記招呼好,效率不錯,好過茶餐廳

行經佐敦,無意中發現有間粥麵店,入去買了碗鮮肉粥($22).才發現這粥店的粥很好味,粥低好鮮甜,d肉又滑又好味,完全唔同其他的粥舖的粥.(雖比一般粥舖貴少許,但吃了之後,感覺簡直物超所值.)估唔到現在的粥舖,還可吃到這麼美味的粥.第一次吃這裡的粥,已令人回味無窮.一碗簡單的粥, 已令人很滿足.

4月25日晚黎食，兩個人叫左豬潤粥($22)魚腩粥($23)＆薑蔥灼熟魚皮($20)。粥底係幾甜幾好味，魚腩粥本身清，更食到粥底鮮甜，反而豬潤粥會蓋過本身粥0既甜味。豬潤都幾好食，0岩0岩好唔會硬又唔會唔熟。魚皮係灼，所以唔會熱氣，好厚好爽。D侍應叔叔又好好喎，唔似其他老舖咁，見你無水就自動同你加水，又會問下你D野食點。

彌敦係間老牌粥麵鋪，水準自然有番咁上下。今日首先試o左雲吞麵，麵條幾彈味，不過湯底唔夠濃，鹼水味太重，雲吞d料唔夠靚，另外又試o左剩水餃，水餃就正過雲吞好多，料多又靚，包得漲卜卜，一啖一粒，好有口感。不過成間鋪最正都係粥，粥底夠綿，唔杰唔稀，而且夠鮮甜，配咩料都咁好食，我自己就鍾意食雞粥，因為d雞係新鮮雞，配埋粥一齊食，真係鮮上加鮮冇得頂。整體o黎講，水準幾高，價錢合理，值得捧場。