影片
以上资料只供参考，请与餐厅确认详情
4721 浏览
长辈一群早已定下三八妇女节于「镛记」开年，大肥爸爸亦约好细佬充当柴可夫，点知当晚有两位贵宾突然有事未能出席，XO仔与甜心儿即有幸补上。上到镛记大厦八楼先知道晚宴o既所在地其实系「镛记」名下o既高级会所餐厅「尝真」。会所式经营o既餐厅只会招待会员。个会包有免费代客泊车，而且用餐时并无收取茶介、开瓶费或加一服务费，但午市及晚市均设有最低消费；如果冇听错，前者应为五百多元，而后者则为千二左右。步出升降机门已觉光鲜亮丽o既接待大堂及走廊雅致得黎好有气派。厅内全为厢房，空间感及私隐度极高。厢房内用餐区旁都有个小偏厅，厅内用上酸枝椅櫈桌子及精美o既茶具，配合埋窗边o既竹林，感觉就好似置身于世外桃源般。会所内外都可见时尚鲜花摆设，四周装潢典雅大方得黎又不失现代感。餐桌上公用及自用o既餐具齐备，餐巾仲要系围丝边架，认真高级！主人家早已订好菜谱，单睇𩠌名已觉震撼得好有诗意。宾客续一到临，并由经理哥哥亲自招待，所有菜式上枱绕场一周后都会由专人分好一份份，酒杯或茶杯都从未缺水缺酒，服务绝对贴身周到。酸姜皮蛋（免费赠送）：皮蛋不单色泽分明，食落就知其外层有几弹牙，个蛋黄如何香浓糖心，酸姜则爽脆且唔辣。前菜之松子云雾肉：貌似东坡肉o既云雾肉层次分明，上柔润下松软，肉香带甜，又唔会好溜。师傅专登另配一小碟脆口o既腌乌支笋，以其酸甜一解肥猪肉o既腻感。前菜之椒盐海参扣：金黄亮丽o既海参扣皮脆心烟韧，少辣惹味，送酒一流。前菜之榄角乌鱼扣：细佬都系初次认识此味「乌鱼扣」，经理哥哥讲解先知原来所谓「扣」其实系胃脏，「乌鱼扣」亦即乌鱼o既胃部，由于乌鱼本身细小，每一小件已经系一条乌鱼整个胃，名贵就在于要储够做一碟要用好多条乌鱼。乌鱼扣滑身得黎好爽好脆，实属惊喜之作。至尊一品鹅：依道一品鹅之前喺「镛记」都有食过，当时仲不断四周推介俾身边o既亲友，其人气度明显有增无减，因为XO仔喺门口都听到有游客专程黎食名店o既「一品鹅」，而并非昔日都会点o既烧鹅。劲量级o既鹅煲就好似盆菜咁丰盛有层次，鹅只o既肉、红、肝、肾、肠、翼等都好有技巧同艺术地舖叠。垫底o既豆卜同鹅掌翼索哂味之余仲好够腍滑。中间o既鹅肉分有片状及件状；鹅片软润巧薄，鹅件则松软嫩滑，各有各好味。舖面o既鹅杂更是一绝，因为每款均出色细腻，当中鹅肠、鹅肾一样爽脆非常，咬落真系索索声架！鹅肝厚润软滑，最正必选超级滑嘟嘟而又厚身o既鹅红，冇得顶呀！一品鹅濑：跟一品鹅每人有碗以鹅煲汤底捞煮o既濑粉。一品鹅濑滑溜半透光，由于索尽鹅煲o既精华，入口微辣惹味，有阵时美味就系如此简单！鹅脑鱼云羮：鱼云羮鱼味浓郁，混入咗蛋花及嫩豆腐，饮落质感柔滑，好非一般。窝贴明虾球：窝贴明虾球其实即系虾多士o既升呢版。相信大家对虾多士一啲都唔陌生，细佬自己都食唔少，不过原来喺高级会所餐厅食o既版本可以咁high。「尝真」版o既虾多士底层松化得黎一啲都唔油腻，顶面件已去壳o既虾只极之松爽弹牙，一味咁普通o既菜式当有比较下当真能突显师傅精湛之厨艺，细佬真系食到拍烂手掌架。月映照纱窗：好比诗词般雅丽o既「月映照纱窗」乃白鸽蛋拼燕窝竹笙卷之美名。燕窝竹笙卷爽脆心嫩，就连个口感都好似纱窗咁有「纱」feel。煮至奶白透明o既白鸽蛋外观真恍如十五皎洁之明月，蛋蛋有弹性得黎好软腍，吃毕一啲都唔溜滞。伴碟o既豆苗翠绿嫩脆，望落系咪好似一片草原呢？！礼云子蛋清：每人一客o既炖蛋鲜橙明亮，师傅专登加多个雕花同绿湖增添上枱时o既震撼，有心思极！XO仔之前已学懂「礼云子」为蟛蜞之卵子，亦深知系一种中国南方珍贵o既食材。柔软滑溜o既炖蛋以味道鲜浓o既礼云子调味，效果香浓易入口，轻巧得很。香芹枝竹浸深海斑：炸过o既海斑外层香口松脆，炸皮下o既鱼肉却又幼嫩甜美，就连鱼皮都滑溜非常。扬州炒饭：讲真食完大大碗一品鹅濑都已经几饱肚，但眼见金黄闪烁o既扬州炒饭实在吸睛，为食猫小肥结果都系唔忍得口。。。炒饭粒粒饱满润泽，伴上晶莹爽透o既虾只更显矜贵。椰奶红豆沙汤圆：开年饭当然要食汤圆团团圆圆啦！足料o既红豆沙只属微甜，捞入椰奶即倍添香滑，主角汤圆软润香浓，正好为晚宴绘出完美o既句号。机缘巧合下让XO仔于三八妇女节遇上「镛记」属下o既高级会所餐厅「尝真」，喺环境幽雅o既厢房内享用咗顿毕生难忘o既珍馐盛宴，感激长辈悉心安排及经理哥哥贴身o既款待。据悉，除咗「镛记」o既特色菜肴之外，会所大厨更会烹调出多道传统及独家o既绝色美馔。从主人家及经理哥哥口中，得悉已故o既甘先生原来多年前曾与著名武侠小说作家金庸先生合创出咗席「金装射雕英雄宴」，内含名作中「英雄豪杰」、「桃花园」、「北丐降龙十八掌」、「二十四桥明月夜」等精髓，听到都垂涎三尺。女主人仲传来「射雕英雄宴」o既靓相，话下次约个时间再请大家食多餐，当真令人期待万分！
继续阅读