富士飽餅店 (已結業)

今日行過，又嚟買平包返屋企做下午茶！店入面依然係咁多人，包款亦依然咁多，我就揀咗： 紅豆菠蘿包：呢個紅豆菠蘿有驚喜喎！ 包面嘅菠蘿皮脆卜卜，香噴噴；入面仲超多豆沙！啲豆沙炒得好香，質感又幼滑，味道唔會太甜，紅豆味極濃郁！包餡唔只充實，包身仲夠香軟，真係好得！ 吞拿魚包：佢啲有餡包因為比較細，所以都唔期望餡會多，尤其係吞拿魚包，因為一般包舖嘅有餡包最貴係佢。呢間店啲吞拿魚包餡嘅份量都可以，唔太多油，味道亦唔錯！包身就軟綿綿，而且充滿麥味，雖然我三四啖就吞咗！ 椰絲包：椰絲包外型夠靚，椰絲又多又香，包面仲有一粒粒芝麻增加食味同香味，幾好食！ 椰檳：因為我好鐘意食椰絲，所以又買咗個椰檳。呢個椰檳面頭好多椰絲，啱晒我！ 包嘅面頭有啲脆，包身好香好軟，一層層嘅質感一啲都唔馬虎，入面仲夾住唔少椰絲，六蚊成個錫絲兜咁大仲要脹卜卜，真係幾抵食架！我諗呢間包舖真係做慣人多嘅生意，個個客都買好多，連菠蘿包都一盤盤入晒袋，成盤賣比下午茶時間嚟幫襯嘅地盤工人，啲人係咁入，但係阿姐手腳真係好快，雖然唔會點講嘢，又無乜笑容，不過都唔緊要嘞！

呢間富士個樣似乎唔係咁乾淨，但係好抵食，有餡包賣$2.5，冇餡嘅賣$1.5，包款仲要勁多，大路包款佢齊晒，菠蘿、菠蘿椰絲、菠蘿紅豆、雞尾、豬仔、麥包、紅豆、忌廉、奶油、吞拿魚、腿蛋、餐肉、叉燒、椰絲、薄餅、熱狗......真係數唔晒，西餅亦有捲蛋同清蛋糕之類。我今日就試咗幾樣： 薄餅：面頭嘅餡好普通，只有什菜同腸仔片，包有啲過硬，呢個包貴啲，要 $3，所以算一般啦！ 忌廉：啲餡好充實，唔會因為咁平而整得好少，甜度適中，包亦軟熟！ 熱狗：餡係普通腸仔，唔係我最鍾意嘅雞肉腸，不過啲沙律醬都唧得幾有心機，賣相可以，最好食係個包，因為密度大啲，好好咬，面頭嘅芝麻亦有香味！荃灣最平嘅包舖可能係佢嘞，因為我都搵唔到仲有平過佢嘅，三個包加埋先至八蚊，真係好抵，不過佢啲有餡包嘅大小真係比其他包舖細啲，所以佢先賣得咁平，如果想試多幾種包款，我就覺得呢間包舖係唔錯嘅選擇！

麵包的確超平, 有餡的包只是$2, 無餡的只是$1, 不過一分錢一分貨, 賣相麻麻, d包的表面好似油立立的, 勉強都可以擺落口o既, 所以係宜家經濟低迷的情況下, 都好多人買佢d包不過我諗佢地應該改善下衛生, 因為驟眼望落去不太乾淨, 而且佢地仲養住隻貓(小妹認為做食肆不應養小動物)