四點金飯店

营业中

休息中

很久沒去食潮州食品，但每次食都一定會去四點金，除左價錢公道，服務好，坐位都舒服，最緊要係屋企樓下，近，叫朋友黎陪我食，今次2個人，去到見到個餐牌$338超低呀…～杏汁白肺湯加$20，個湯的杏汁好飲到會飲到個杏味好重，好好飲，份量都大煲,我跟朋友每日飲左2碗半…飲湯都飲飽～潮州凍烏頭，條魚份量都夠啊…但可能我唔太慣凍食，覺得味道一般，要點黃豆醬先有味，下次叫煎魚，會較啱我。～咕嚕炒潮州粿肉，好耐無食過粿肉，諗住試吓，碟餸炒出黎係美觀，但唔知係咪粿肉同咕嚕個味道唔太夾，有些怪怪地，下次試其他先。～鹵水鴨拼盤，佢個鹵水真係，好好食，仲叫左碗白粥一齊食先配搭，好味道，拼盤又擺得好精美。唔知係咪同朋友，一路食一路傾，我地再叫左個薑蔥生蠔煲，個煲蠔焗到很嫩，很甜美，但蠔好似唔太多，好似得6隻，不過，都好食。最後甜品出場啦…蛋散一份，每次我食完飯，都必定食埋甜品先叫完美。

朋友生日想食潮州野，選擇左位於土瓜灣區四點金潮洲菜，餐廳環境舒服，我地一行9人叫左個兩套餐，套餐非常抵食，每個套餐只需三百幾蚊，已包括湯，小食，主菜，甜品，選擇又多，味道非常不錯，想食潮洲菜黎間係一個好選擇

今晚兩位好姊妹好早就約咗我一齊提早食團年飯，好早就好想食呢間潮州菜嘅餐廳，今晚終於食到，果然食物有水準服務，服務員貼身嘅服務，簡直超晒班，喜歡餐廳嘅環境佈置，古色古香嘅佈置，仲要提醒我哋唔好叫咁多，食住先，推介鹵水鵝肝，好嫩滑，做得好出色，鹵水味道唔會好鹹，杏汁白肺湯，好清甜，蠔仔粥好足料，香脆招牌蛋散，厚度適中，炸得香脆，值得推介，豉油皇香煎龍脷魚，竟然好大條，煎得好香口，超級好味，今時今日餐廳有咁嘅服務，好難得，值得再次光顧。👍👍

走過這間，窗口展示嘅鹹蛋看落相當誘人，心諗一定要入去試吓！🥚好彩我哋選擇了這家餐廳，點了幾款招牌菜，每樣都令我驚喜！一落口嘅鹵水鵝，清鮮美味，鵝肉嫩滑得嚟帶啲彈性，每一啖都感受到佢嘅肉汁。😋蠔餅就更加唔使講，啲蠔好足料，一啖一大塊咁，鮮香彈牙，煎得金黃又唔油膩，簡直就係完美！轉個彎，叫了份石榴雞嚟試下，外層皮脆，裡面啲雞肉同疏菜餡完美結合，蒸出嚟嘅效果既軟而唔爛，有層次。對於愛好傳統味道嘅朋友，點呢一道絕對無失望。而家講返個反沙芋，呢個真係必試啊！個芋頭軟綿入口即溶，裏面嘅糖粒紮實，帶點微微嘅焦香，真係滿口幸福感！晚晚聚會都少不了嘅，當然係蛋散，一咬落去啲奶香撲鼻而黎，蛋香四溢，真係畫龍點睛之作！整體而言，佢哋嘅菜色簡直就係幸福嘅味道，飯後滿足感爆燈，下次一定會再嚟！👍🏼

今日嚟咗呢一間潮州菜館食咗一個超值套餐，三餸一湯仲有甜品真係非常抵食。佢嘅鹹菜已經好好食，味道適中唔會太濃。第一個餸我哋揀咗潮式凍烏頭，都幾大條，雖然食到有少少泥味，不過呢個套餐嘅價錢絕對收貨啦。其實佢都有幾多餸可以揀，就好似呢個餸咁樣，可揀蠔烙、九肚魚烙同水瓜烙，我哋揀咗水瓜烙，因為平時少d地方食得到。魚腐浸時蔬清清地幾好食，啲魚腐真係唔錯。其實本身可以揀西湖牛肉羹或者胡椒豬肚湯，不過唔知點解都唔想飲呢兩款湯所以就嗌咗個例湯，佢個例湯好足料啊而且冇味精。佢呢個甜品都幾好食，香得來唔會好甜，煙煙韌韌嘅糕點係最正嘅。

走進「四點金」，就感受到滿滿嘅潮州氣氛，裝修簡潔得來溫馨得嚟。坐低唔夠兩分鐘，一盤炸得金黃起起哂脆嘅煎蠔餅先上，攞一啖，蚵仔鮮味夠哂撑，外皮嘅薯粉焦香得嚟唔膩口👌。然後，杏汁白肺湯端上嚟，一啖湯落肚，杏仁香甜得嚟唔死甜，湯水幼滑配上白肺嘅軟綿綿，簡直完美！當晚仲有個大驚喜，凍烏頭魚滑得不得了，重點係件件肉都冇骨。😲食到呢道菜，真係令人想叫聲「正啊」！邊食我仲忍唔住讚佢哋津白做得好，清淡蔬菜都能做到鮮美爽口，正宗港式食法要咁。而我個人最鍾意嘅，當然係胡椒豬肚湯了，溫潤嘅豬肚搭上胡椒薄味，暖笠笠真係好過癮。雖然湯稍鹹，但嗰實在嘅口感令人記住。攪到最後，人人都呷得滿嘴油光，稱讚連連。記得食完記得拍個掌啊，真心嘅香港味喺度！👏🎉

我與朋友三位剛剛去到，有個四眼姐姐企枱話全場已經訂滿，冇訂枱無位，本想離開，但點知剛剛有其他人入內話無訂枱6位就即刻給張枱給他們。真係感動不好受，再進入與四眼姐姐理論，為何他們無訂枱就有枱？真係一肚氣，不知什麼餐廳，歧視人少唔俾枱。企枱又無禮貌無品，問點解三位無枱？六位有枱？四眼姐姐真係好無禮貌話唔通比大枱你哋三位呀？作為一個服務員，作為一間老字號的食店，來得食飯必然是熟客，必然是喜歡食潮州菜，這樣的服務態度真係大打折扣。

同家人去食潮州菜，位於土瓜灣呢間係老字號，之前亞哥嚟過幾次，話啲嘢好食，就帶我哋嚟試下呢處環境乾淨企理，坐得舒服，侍應好細心咁同我哋介紹菜式首先嚟嘅鹵水鵝肉，肉嫩有咬口無乜肥膏，鵝肝更加甘厚肥美杏汁白肺湯，杏仁味濃，湯鮮甜蠔仔餅蠔大隻且煎得香脆兩面黃雖然薄啲，但真係好香脆整體嚟講，八個人叫咗十一樣菜，全部好新鮮同好好味道最後，推薦一樣别處食唔到嘅甜品，招牌蛋散，用黃糖墊底，醮黃糖食，配合酥脆嘅蛋散，味道一流

對我來說 潮州菜的靈魂 在於鹵水和甜品四點金的蛋散 是無法超越的鵝肝拼鵝腸 大碗家鄉魚麵 豆醬蒸黃花魚也是上乘之選 可惜滷水真的量太少潮州嘢 向來都是豐儉由人 可以排骨春菜吃到飽 也可以獅頭鵝 魚飯貴上天 而 四點金 是一家將街頭和高級融合得很好的街坊選擇。

食過呢間潮州野的晚餐，味道不錯而且價錢略低，所以我很喜歡，於是今日在土瓜灣搵地方食Lunch就黎返呢一間試試。我地揀了西檸煎軟雞球同埋鹹檸檬蒸鮮烏頭兩個餸，佢個Set Lunch係跟一碗飯一碗湯。先講個西檸煎軟雞球，味道又真係好一般，同茶餐廳食到嘅味道差不多，而且份量偏少。跟住個鹹檸檬蒸鮮烏頭都係麻麻地，最重要係條烏頭唔係好新鮮，好在D配料唔錯，救一救條魚咁啦。

因為唔想過海，但係朋友又想食潮州菜，見到有個報導介紹呢間鋪頭，所以就去試一試兩個人唔食得太多嘢，叫咗鵝腸拼墨魚，價錢計法係淨鵝腸172蚊加墨魚55蚊，原來鵝腸係咁貴，我記憶中食嘅鹵水鵝腸係冇肥膏嘅，但係呢度每一條都有好飽滿嘅肥膏，超級肥，我哋逐條逐條自己去咗啲肥膏，可能係我食得少見識少。。。墨魚正常發揮冇特別另外叫咗個椒鹽九肚魚，脆身唔太油,ok不過排骨炆春菜就非常之唔好食，完全冇味道,冇排骨味亦都冇鮮味最好食嘅係芋泥，甜度適中，亦都非常軟整體嚟講呢度服務好過食物，如果喺九龍區我覺得金燕島潮州菜質素更好

一班人去食打冷，揀左呢間，因為係朋友食過推介既，而且環境比較好，坐得舒服啲。食打冷首先係試鹵水，當然唔少得鹵水鵝。要左下庄，唔算大份。味道偏清淡，同微甜，唔好濃味既朋友應該會鍾意。鵝肉都唔會好稔，比較有咬口。整體黎講都算ok。再試埋鹵水鵝肝同鵝腸，肝都滑，有少少粉，鹵水味偏淡。個人比較鍾意鵝腸，好爽口，又唔會韌，質地好好。打冷另一樣必試既係蠔餅，呢度係煎蠔烙。啲蠔仔都好多好大隻，蛋味都幾香，如果再煎香脆啲就完美。朋友話未食過薄殼，就叫左碟金不換炒薄殼。味道都幾好，但似泰式多啲。見餐牌有石榴雞，就點份黎試下。傳統係用雞皮包住啲雞肉粒同疏菜餡，之後拎去蒸。呢嗰就只係用腐皮黎做，味道ok，但就沒咩特別。之後就試兩樣朋友推介既餸。先黎燒汁脆蟮，燒汁好惹味，蟮都好脆身，幾香口，有少少可惜係蟮肉唔爽口。再黎係椒鹽鮮魷，好惹味，炸漿又薄又脆，魷魚鮮甜爽口，推介👍🏻👍🏻最後甜品都係朋友既推介，先黎潮州最出名既反沙芋。已經好少有鋪頭做，呢度都做得唔錯。最後呢嗰先係全晚最正既，就係蛋散！！即叫即做，超香超鬆化，真心香港No. 1😍😍甜品份量唔少，建議大家留肚食。

鄉下係潮州嘅我，由細跟住婆婆所以係食潮州菜大㗎😆所以一直都會同屋企人周圍試潮州菜館，今次經親友介紹就嚟試下呢間「四點金」啦！裝修嘅外館的確好似潮州當哋嘅一啲出名菜館咁樣，入到去環境都好唔錯乾乾淨淨！我哋係坐二樓，二樓俾我嘅感覺無地下果層咁熱鬧，二樓安靜啲而且空間仲闊落好多整體都好企理！服務方面真係一定要開一段嚟講，由入門口開始所見到嘅職員都係笑容滿面！大家都好有禮貌好熱心，經理更加係照顧週到！上菜嘅姐姐又細心，呢家好小遇到中菜有咁多笑容睇🙈服務質素滿分呀！食物方面都絕對驚喜！我覺得「鵝頭鵝頸肉」真係必須食！片好哂啲肉出嚟，肉質非常嫩而且好入味！已經講咗下次要點兩碟😋然後再嚟「排骨春菜」，呢個菜雖然係平價材料，但係要整得好食有家鄉味係好難！暫時我都未係潮州菜館度食翻果種味，呢度嘅春菜煲都係一般啦。跟住嘅「普寧豆腐」就真係好好食！十分推薦呀！炸到岩岩好！我重點推薦！我自己認為最好食嘅係「煎蠔餅」，呢個蠔餅絕非平時炸到脆果種！呢種先係正宗潮州蠔餅！有蛋有薯粉❤「滷水鵝肝」就有小小期望過高，普通水準「糖醋麵」呢個就間間都咁上下啦！整體嚟講，呢間菜館價錢合理！而且好食起碼唔會有伏！可以成為日常飯

今晚試了這家潮州小酒家，環境靚幾好坐，最重要係服務好，另外D野都好食而且價錢平。普寧炸豆腐揸得乾身兼微脆，點埋個專用汁好好食滷水豬肉卷就普通咗啲，講真有少少失望滷水雜錦拼盤入面有紅腸墨魚鴨腎滷水鴨肉豬大腸豬耳及滷水豆腐，滷水唔會太鹹排骨炆煮春菜嘅春菜都幾新鮮，而且唔會好油糖醋麵乾身好食，侍應仲好細心另外比多個碗我地用黎食糖醋麵香脆招牌蛋散$28有六件，佢唔似平時會落糖漿喺面，而係用咗豆腐花嘅黃糖同埋煉奶，鬆脆好食白果芋泥做得唔太甜，而且個芋泥好滑整體都係水準之作，而且價錢非常合理，值得一試！

有段時間冇食潮洲菜，12月1日细仔仔話，想食鹵水鹅肝，及飲胡椒豬肚湯，在食評上得知，此店有得供應，而這兩個食品圽獲不少食評家，給予好評，故當晚便專誠帶靚媽，及仔仔，到此店食晚飯，在餐牌上見到此店，提供的晚飯套餐，有胡椒豬肚湯，及另選三款小菜，收費都係三佰零蚊，真係好抵食，所以就點咗一個套餐，再加一碟鹵水鵝肝拼鵝腸，和一個反沙芋頭做飯後甜品，先講個套餐個人認為，除咗個胡椒豬肚湯0K，有B+評分外，其餘所點三個小菜包括川椒牛肉，煎蚝烙，豆付炆魚腩嘅評行，都係C级水平，令人失望，不過可能一分錢一分貨，三佰零蚊個餐吾得啫，但係成二佰蚊一小蝶嘅，鹵水鹅肝，鹅腸該無得彈，鹅肝粉嫩，入口溶化，而鹅腸爽脆，而更有久違了的膏存在，此菜有A+評語最後上枱嘅甜品反沙芋頭和随餐附送的金沙旦散，可以講係精彩绝倫，就算俾A+++呢個爆燈分数，呢兩款甜品，都绝不為過。