影片
见呢间面店开张咗冇几耐，今日lunch time决定过嚟试一试。中午过嚟有空枱，唔使等位。我同朋友分别点了招牌的花胶浓汤鸡米线（$78）同埋黄酒鸡米线（$72）。首先讲吓我嘅黄酒鸡米线，一嚟到首先饮啖汤先，因为餐厅标榜自己的鸡汤熬制了10个小时，一饮落去，觉得系唔重味精嘅，但系就完全冇黄酒嘅香味，同埋个汤嘅味道太甜，甜唔系鲜甜嘅甜，系好似落咗砂糖或者冰糖𠮶种甜，可能系因为汤里面有好多红枣同杞子等等。完全掩盖了鸡汤应有嘅鲜甜。我点呢个黄酒鸡米线，好期待嘅就系𠮶种黄酒嘅香味，但系我可以话呢一个系完全冇酒味，汤头有啲失望。尤其是系餐厅标榜熬制10个钟嘅鸡汤。分量方面系大嘅，够饱嘅。然后讲吓里面啲鸡，我认为鸡肉方面就要睇你好唔好彩，我朋友𠮶碗大部份都系鸡胸肉，佢就话鞋到不得了，唔想食，我就好彩啲，我𠮶碗入边有啲鸡髀肉，所以唔系全部都系鞋嘅肉。但我认为最大问题系啲鸡完全冇味，唔止系冇鸡味，系连少少调味都冇。我为咗唔好嘥咗啲鸡，就问楼面嘅阿姐有冇豉油，我谂点豉油食会好味啲，但阿姐话冇豉油，咁我问佢盐有啦挂，佢就话盐都冇，咁我问佢可唔可以问厨房攞啲，佢极不情愿地去厨房攞了一碗盐俾我，我就有礼貌地问佢既然入得厨房问，可唔可以问厨房攞啲豉油俾我啊，因为鸡点豉油会比较夹过鸡点盐啊，咁阿姐就面露不悦咁同我讲话厨房冇豉油。咁我就即时打咗个特，好怀疑点解一间中式食肆嘅厨房里面可以冇豉油，呢间又唔系西餐厅，我问阿姐系咪肯定厨房入边冇豉油，可唔可以帮手问吓，咁佢就转身，然后过咗几秒返番转头就话俾我听厨房话冇豉油，碗盐要就要唔要就冇啦。咁我梗系明知阿姐耍我啦，又或者喺厨房耍我啦，但系我都极度无奈，唯有嘥咗啲冇味道嘅鸡啰，呢个又系一个活生生嘅例子点解香港嘅食肆越嚟越差，点解香港消费者会选择北上消费，就系呢啲劣质嘅服务态度，吓怕咗香港嘅消费者，尤其我想讲𠮶碗米线都唔系平呀，都成$72-78一碗㗎。想攞少少豉油点下鸡都唔系好过分啫系咪啊？ ！佢竟然话俾你听个餐厅嘅厨房里面系冇豉油嘅。讲返个米线嘅质地，系比较硬嘅，我本人觉得还可以，因为我食面同意粉都系喜欢比较硬嘅，但我朋友就觉得实在太硬，好难接受，所以如果怕硬嘅朋友，记住要求煮耐啲软啲（但唔肯定会唔会又激嬲楼面阿姐或者厨房师傅）。至于朋友叫𠮶碗花胶浓汤鸡米线，我试咗一啖汤，唔会好似我𠮶碗黄酒鸡咁甜，但系𠮶嚿所谓花胶，其实系一嚿好细嘅鱼漂，一啲都唔好食，唔值得比多啲钱去叫。绝对唔推介。总体来讲，我觉得食物质素和味道方面有点失望，服务方面系劣质嘅，阿姐完全冇尊重过客人嘅智商同感受，我绝对唔会再返嚟呢间面店食，亦都绝对唔推介大家试呢间餐厅。毕竟食嘢都系求好食同埋开心，如果又唔好食，又受气的话就绝对冇下次！
继续阅读