名島麵包西餅店

营业中

休息中

荃灣名島有兩間，兩間獨立運作，呢間喺街市嗰頭，好多包賣$4，最後揀咗蒜蓉包，皓大個，可以俾八達通。第二🥈朝做早餐🥣，咬落都鬆軟，有少少🤏蒜蓉味，我自己覺得夠飽

今朝去買麵包，見到呢個情況，令我都對呢間麵包店大打折，以後未必會幫襯托！事緣是咁啲，當時見到一個長者買咗2個包，其中1個因為當時職員入胶袋入得唔好，而佢又冇留意，結果返轉咗攞，跌咗落地下。當時職員的處理手法系表示麵包是顧客自己跌的，並表示要顧客自己執返個跌咗嘅麵包。我想講作為一個消費者，我覺得個呢件事個長者同個職員真系令人印象深刻，是否2個人嘅角色應該調轉先啱呢？老板請個咁樣嘅員工，真系令人不會再光顧！呢個雖然系一個麵包的問題，但系我見到嘅系指責顧客，無視長者，斤斤計較，態度惡劣！

荃灣有兩間名島，兩間都平，不過話兩間冇關係，今次幫襯近荃新天地呢間，買咗個小麥🌾包$4，見到店員同顧客鬧交，話收咗$50冇找俾佢但店員話成個收銀機都冇$50，最後顧客敗走。小麥包早餐食，不過唔夠鬆軟，呢間係差過另一間既

$8兩個新鮮出爐菠蘿包，熱辣辣，仲要有獨立透明袋包裝，脆卜卜，真係物超所值。初初以為係$8/1個菠蘿包，點知係$8/2個，有啲錯愕，而家呢個時勢喺邊度搵？舖頭仲要有裝修唔係好舊式嗰隻，收八達通。可惜蛋撻得酥皮，如果有曲奇皮就好啦。門口仲有見到老婆餅、綠豆餅、叉燒酥等等，留待下次再試。地點喺楊屋道街市隔離，隔離舖頭就係好出名買雞蛋嘅店舖（雖然大排長龍），門口都可以停一停車，對面就係荃新天地商場，非常方便。

5蚊一個紅豆包,食左一個先記得影相,放左大半日仲係脆身,呢個做得幾好,麵包挺身餡料豐富抗疫市價好多人買,同時令麵包流量加快,大家都買到出爐既新鮮包,買走個陣仲係熱辣辣既紅豆餡香甜,麵包唔係空氣包好軟熟,係個味道無乜特別,食得飽就算了荃灣禾笛街19號地下4號舖

依間麵包店嘅麵包不嬲都好有水準！佢嘅曲奇都係自家製嘅，有幾個款式，今次就買來試吓，原來都好好味，好鬆脆😋😋 請小朋友食，大家都好鍾意👍🏻下次買早餐就可以多個選擇啦🥳

喺名島買左個一磅蛋糕同家人慶生。好鐘意幫襯呢類型嘅小店，佢地d蛋糕好食過好多連鎖店多多聲，而且經濟又實惠！今次買左個黑森林，仲有得揀要果肉餡定啫喱餡，識食一定係揀啫喱餡。一家人食呢個黑森林蛋糕，好快已經清哂了，好味蛋糕真材實料好好食順帶一提，早前喺呢度買左d蛋撻返公司食，順便請埋同事食，同事都對佢d蛋撻讚不絕口，仲問喺邊度買添佢嘅蛋糕同蛋撻都好好食

今日中午行到來餅店，其實係想買麻糬波波 $10有6個。雖然就唔係有好重芝士味，淡淡地，但起碼隔天食都唔會淋晒，焗番熱都食得。另外，還買了合桃咖啡蛋糕$13，盒內有3件，是輕身的雪芳蛋糕。只有面上有少少合桃碎。我覺得就貴左少少，因為一大條瑞士卷都係$15，相對冇咁抵食。雲石蛋糕看來都幾吸引，不同顏色的蛋糕混合一齊，所以壓得實左，食多兩件都飽晒。加上都偏甜，會有些膩滯。很多時候都見到做特價$12，我想可能係用賣淨的蛋糕拼合而成。

新年前夕已經見到佢地擺晒啲賀年食品在舖前，我都比佢吸引左，但日子尚早，所以決定年廿幾先買。免得未到新年，就已經食光光了。芋蝦真的非常吸引，我未曾見過咁抵。這裏一磅的價錢，喺出面的店舖，可能只買到一半咋!!!角仔有得試食，唔會好甜。最後，我買了角仔和芋蝦各半磅試下芋蝦放在咁多日，依然脆卜卜，一啲疏風都冇，五香味不太重，食完都唔會好口渴。同日仲幫朋友買多半磅角仔芋蝦另外，呀姐仲介紹我買年糕!! 雖然沒有椰汁，正合我口味，但質地好軟身，唔夠煙韌，可以再減甜一點。雖然大年糕較平（$43），買個細年糕（$23）試下咩口味會穩陣啲。

連續兩天都來幫襯，睇下我又買左啲乜喇!朝早出爐麵包正常款式都唔會好多，因為出唔切爐的關係。當日唔想食咁大個包，見到賣晒豬仔包，就不如買個小麥包（$3）。外表幾靚仔。我覺得師傅都習慣唔會落好多餡料，同我食合桃包一樣，都係好少合桃碎😑...同樣，小麥包數埋得4粒提子乾。唔鐘意食提子乾就啱晒!另一天，我就買左佢地嘅瑞士卷因為早一日見到有做特價的「雲石蛋糕」，大大件幾抵食!點知今日唔見有雲石蛋糕，只好買其他喇!我曾經買過佢地嘅雪芳蛋糕，都唔錯。今次試下瑞士卷喇!瑞士卷五顏六色。如果唔想買大卷，可以買舖門前小瑞士卷（$8）都係有相同味道。咖啡味好香，花紋又靚，雪凍食也佳!

上次買過大合桃包，覺得入面太少合桃碎。今次試下芝士包，睇下會唔會又得嗰dd....包外皮幾靚，焗完出來都唔會收晒水皺皮，塊皮又唔會淋。切開入面，有一條芝士條，但都唔係好大條。如果芝士係平均分布，就啖啖都食到了。依家只能嗰part食到少少，芝士控會唔夠喉!

上次已經對啲蛋糕好有興趣，好少有麵包店有咁多款賣。除左最普通的紙包蛋糕，還有蛋白蛋糕，瑞士卷，香蕉蛋糕，菠蘿蛋糕.......今次就試下雪芳蛋糕先！雖然見有3款不同的口味，但我只揀了其中2款（原味和朱古力）$12有3個，相對都大件。原味有杏仁片鋪喺面，增加口感;朱古力味就有粒粒朱古力。另外，還買了一個$5南瓜包，表面有層「墨西哥包」的皮，咸咸甜甜。南瓜餡應該係自己磨，有少許甜味，都算係健康之選。但我對有餡麵包都係一般，只不過貪新鮮才試一試。

今日專登行過來楊屋道附近買早餐，因為之前經過覺得都幾OK，街坊麵包店應該較平。由於怕會肚子餓，所以一眼鎖定大包，眼見有大麥包、大芝士包和大合桃包。我自己很喜歡食合桃包，所以就決定買這個。摸上手仲微溫，包不算重身。以為表面可能咁啱放得少合桃粒，點知打開來看，真的很少，食落都冇咩好似齋包咁，跟我想像中有出入，只有一次，下次唔會買依款!