吉野家 (已結業)

一向幫襯吉野家都是吃牛肉飯或煎雞飯，今早是第一次在這裡吃洋式早餐，但的確有點失望。～醒晨炒蛋早餐 $33奄列有少許蘑菇和火腿和揸了牛油的丹麥多士也過得去，其他的雞肉腸、午餐肉就稍乾和凍，茄汁豆一般。熱檸茶頗濃。～巴黎雞扒餐 $33巴黎牛油汁雞扒非常乾，似是隔夜的。炒蛋、笳汁焗豆一般，火腿片都算過得去。檸茶還算OK!整體來説，這𥚃的西式早餐是有待改善，最少也要保持熱度。下次都是吃回牛肉飯和煎雞飯好了！

好耐無食過吉野家，所以開工前行過，就入去食個早餐啦 點知，個早餐一到手，發覺份量好少啊，雖然有牛肉，炒蛋，茄汁豆，半塊火腿，但全部都好少，真係少得可憐，我一個年輕煮婦，已經唔算食量大，但我真係唔夠食，最可憐嘅係，個烏冬，2啖已經食曬，但味道係ok嘅，烏冬彈牙，湯底夠濃味但係。食完依個早餐，真係好似食咗陣風咁，唯有去買包餅乾頂下肚啦順便講下，依間店無咩客，可能係環境比較昏暗，而且唔太就腳，我估應該係主要做瀝源邨居民生意

吉野家下午茶，牛飯夠大碗，保持水準，牛汁香又好味，最重要有免費牛汁，每粒飯都撈埋牛汁，好正呀，夠晒飽肚！小tips, 而家download會員Apps有優惠券$19細牛飯，仲送杯嘢飲超級抵!另外仲叫左新出既胡麻玉子豚肉撈烏冬。雖然冇細牛咁平，要$32（其實都平）。不過真係好好食，有賣相，烏冬份量多！烏冬又夠煙銀，好似係用讚岐烏冬， 胡麻醬超香，配埋醬汁豚肉，超級惹味。

沙田吉野家地方不太，所以比較難找座位，於是只好買回家吃吧！今天買的是牛肉煎雞雙拼飯餐兩個和一個東坡肉煎雞雙拼飯，飲品選了汽水。牛肉煎雞飯 （$51.5）薄薄的牛肉片肥而不膩，沾上濃郁的牛肉汁來吃便更美味。煎雞的皮煎得脆而薄，半點肥油也沒有，雞肉算不上滑但亦不會嚡口。這裡的飯軟硬適中，用牛肉片和煎雞來送飯是最好不過。東坡肉煎雞飯($54)東坡肉肥瘦適中，味道濃郁，入口即化。東坡肉的汁與煎雞的汁味道各有不同，但兩種都美味。不消一會兒便能將整個飯盒吃光。不得不提便是吉野家的羌片，醃得入味，微辣之中帶有甜酸，非常醒胃，客人光顧時記得向店員索取啊！

吉野家邊爐抵食係人都知不過間間都好爆棚唔等返幾個字都好難食到平安夜呢啲日子就更加唔洗講如果我同朋友夾到通常都會去瀝源商場呢間分店地方大，多位又少人今日平安夜晚飯時間去，都係等左5分中左右新岀左赤味噌鍋，當然要試下另外仲加錢要多隻生雞蛋火鍋夠濃唔洗點鼓油但我就中意點雞蛋，滑好多其實就無咩赤味噌口味嘅😂😂不過就有好多隻蠔仔，都有6-8隻勁足料！同濃湯底好夾，一啲都唔腥，唔會覺得唔新鮮我加大左個檸樂，都係$76.5非常抵食！

自從投入了寫食評的生活後，每日食的東西都希望有點不同，期望能享用不同的食物，然後分享相關資訊給予大眾。以往久不久都會惠顧吉野家，今天正好又想食，就在那裡享用中午飯了。點了和風牛肉温泉玉子飯跟健宜百士。先來睇睇牛肉飯，份量是L5大盛，雖然不是最大的那碗，但是份量都不少。牛肉味道鮮甜，不老，伴有入味洋蔥，洋蔥全熟很軟，很香口。温泉玉子方面，這回就不是太理想了，相片中不難看到，蛋黃挺熟的，以往都是流心的，但不要緊，蛋仍是香滑的。這是牛汁，可在點餐時要求一份，喜歡多汁的朋友要注意，是免費的。辣椒可在取餐處旁自由拿取，挺辣的，1-2包應該夠用了，亦是免費的。健宜可樂走冰，消暑解渴。共HKD47.5。

窮遊日常-好健康既一日.講開吉野家✌🏻今日懶健康咁食左個野菜牛肉飯牛肉既份量小到一點.....🤦🏻‍♀️得2片 洋蔥同菜都勁多但24蚊下午茶 咁岩我又想扮下健康比個合格你啦super~.⭐️講開牛肉飯聽日就講下一間超抵食冇味精牛肉飯啦～.

今日中午時間走左去食吉野家，太耐冇食所以走入去啦，叫左個咖哩牛肉飯...今次係第一次食佢嘅咖哩牛肉飯，我決定以後唔會再叫，因為都幾難食🤮下次叫返普通和風牛肉飯就夠啦！

講到平價又好食既打邊爐，吉野家暫時都係排第一位。吉野家定期都會推出期間限定既邊爐，而呢期就係龍蝦湯鍋啦！呢次兩個人一個叫左龍蝦湯鍋，另一個就叫返傳統既芝士竹輪鍋，識食既就當然買夠120蚊免費轉大可樂啦！等左一陣就有得食啦，龍蝦湯鍋既蟹柳真係超大條！而芝士竹輪鍋就有返佢應有既水準。六十蚊有日本火鍋仲有呢個質素真係得吉野家先做到！！唔食真係對唔住自己！！食物黎講吉野家算幾好，只不過呢間分店既整體衛生情況越黎越差，枱同地下都唔太乾淨，通風都比較差。如果衛生情況改善左，我諗吉野家會係完美！

原本想叫出哂名掋食嘅吉邊，但又想慳少少結果最後都係食咗平d嘅和風牛肉飯。跟餐包野飲(汽水、茶、麵鼓湯) $ 43 ，單點$41。差兩蚊點都想叫埋個野飲。小妹食吉野家牛肉飯通常都會叫侍應比多杯牛肉汁送飯，好食好多。都有一段時間冇食過個牛肉飯，比想象中好咗。飯量一向都多，係今次嘅肥中比我想象中冇咁肥。記得以前食過d肥牛邊係有好多白色嘅脂肪，今次嘅牛肉瘦少少，叫做好似健康d。麵鼓湯入面有少量海帶同腐皮粒，味道唔會好咸，過得去啦。

今天難得放假，我和老公一早起身到吉野家食早餐。我們叫了牛肉烏冬和牛肉丁麵，我們還叫店員加了牛肉汁。牛肉汁聞起上來真係好香濃啊牛肉烏冬那些烏冬很入味，而且配料很多，除了牛肉，還有獅子狗，魚蛋同昆布，都只係＄27，非常抵吃。我也試食了老公那個牛肉丁麵，味道還不錯，價錢比烏冬貴一蚊要＄28，但是我覺得還是牛肉烏冬比較好食和抵食。餐飲跟杯清茶，如果唔鍾意，可以轉其他嘢飲，凍飲加＄3。如果比30幾蚊去茶餐廳食急凍沙嗲牛肉我寧願食吉野家早餐啦

之前食唔到吉野家 去左大快活食左一次邊爐後 覺得大快活雖然貴10蚊 不過足料啲 所以原本今次都諗住食大邊點知今次到大快活無邊爐 咁就唯有食返吉邊啦今次個煲一上枱打開就見到啲菜多返 啲牛肉都大大片吉邊有一樣野正過大快活既 就係有得配韓式粉絲 落煲唔洗三分鐘就食得 啲粉絲吸哂邊爐既精華 就算煮得耐都煙韌彈牙 個人覺得係正過公仔麵烏冬既不過不得不提既係 呢間吉野家既人手真係唔多夠 得1-2個人 負責執哂3/40枱客既枱 又要送爐點火無時停 見到都覺得辛苦 寧願等多陣唔忍心催佢 驚佢燒親手

準備同老公去超市入貨，入貨前醫咗肚先😋下午茶時間吉野家竟然有大把位，即刻入去坐低。下午茶menu都多種類，有飯、麵、烏冬⋯叫咗個牛肉一丁麵+日本茶（$28）磨菇煎雞飯+百事（$26）熱辣辣的麻油丁麵🍜嗰種麻油香味撲鼻，唔餓都要食😝要讚係個麵嘅軟硬度剛剛好，最怕一早煮定晒，淋到餅麵糊咁。配埋和風嘅洋蔥牛肉😋牛肉經過日本鰹魚汁、味醂煮入晒味，牛肉唔會韌。洋蔥吸收晒啲醬汁。一碗份量剛剛好。磨菇煎雞飯日本飯一粒粒，好飽滿。食落有種飯嘅香味、甜味。煎香咗啲雞皮好香口，雞肉充滿肉汁。飯面再淋一下磨菇汁😋 每啖飯都有肉汁、磨菇汁的香味。三十蚊有找一個茶餐，好味又飽肚。

今日終於試到吉野家新出既火鍋，個蜆係分開上，一早開曬口 湯滾碌一陣食得，加分！😍🙌🏼蜆肉好細粒 不過$69 10幾隻算係咁🤣😅個湯吾會好咸 算甜 同烏冬食一流！😋

泡菜芝士雞肉紙火鍋雞肉大件，芝士小左d，泡菜好多woo，配公仔麵雙火爐(熱力十足)好香泡菜味(不算太辣)雞肉好鮮嫩湯(自助式加湯，辣湯，味僧，清湯)唔驚煲乾泡菜湯另外+配肥牛(肥部份比較多，肉尚算oK)公仔麵(泡菜湯)好惹味香口~/一餐配菜(腸，金菇，日式年糕)肥牛(+配)再加配雞件(大大件)好肥~(牛肉)+配2人共$227·5(已經好豐富!)p.s.芝士小左d，肥牛(太肥)食材算新鮮!