顶！夸夸自助午餐

山区面包王等级4 2012-05-25

404 浏览

未至于系团购中伏，查实部份食物的确唔错，仲好有质素，但系食后依然有啲货不对办嘅感觉。印度今日长期做唔同形式团购，今匀标题：「平均 $70/位〈印度今日〉自助午餐 (2位原价 $304)」，都知依家晌团购所讲嘅原价未必系真正嘅原价，最见得多系明明间餐厅都有做开百零蚊个晚餐，跟手出个团购话只需九十多，原价二百几，𠮶二百几就系将个晚餐折散，逐道菜以单价计番出个原价价值，问你服未！讲多少少𠮶次个团购，除标题外，内文仲详细写住二人享用「北印度自助午餐」（原价 $304 / 2 人），享乐价就$140 / 2 人，平均每位 $70，享用时段：星期五至日（12nn – 2pm，公众假期照常），食物包括印式香烤鸡、咖喱羊肉、香炸杂锦时蔬、印度咖喱角、印度薄饼、秘制三色沙律、素食春卷、咖喱鸡、咖喱鲜鱼、印度炒面、印度炒饭、甜品、雪糕及餐汤等十多款北印度皇室美馔，每位奉送餐饮 1 杯，可选︰红酒 / 白酒 / 啤酒 / 汽水 / 咖啡。更话「餐厅开业23年，菜式适合港人胃口，同样深受在港印度乡里欢迎。菜单源于印度皇室，材料配搭及烹饪手法都是精益求精、别具心思，菜式尤其注重香味，有别于一般只有辣味的南印度菜，印度大厨特别擅长香料处理，能够将不同的香料组合，将香料与食物的拼配发挥得淋漓尽致，地道丰收的食材，加上独特的香料，配合巧妙精湛的烹调方法，炮制出来的菜式不单止味道浓郁、层次丰富，每道菜式均蕴含当地的饮食智慧，总令人回味无穷！座位宽敞舒适，印度风情布置，大伙儿聚餐，或情侣享受异国风情亦可，餐厅通风良好，绝对不怕香料味道薰染到衣物、头发上。」食完之后，心里哼咗一个字：「顶！」，实际就系一味夸大，所以先有货不对办嘅感觉！讲吓点夸大啦，拣咗个唔使返工嘅星期六去食，当日最后所见，因有七乘满嘅客，座位及空间显然有啲逼狭，我同老婆坐晌窗口位，经常同背后𠮶客凳撞凳，真系讲唔到点座位宽敞舒适。而说到餐厅通风良好，唔知23年历史嘅「印度今日」有无装修过，环境残旧得紧要，最弊系空调好唔足。你话好异国风情，除咗枱上个银花樽仔同一室咖喱味，小弟又真系唔系好觉啰！啲餐具就咁放晌枱面，但唔觉佢张枱布系干净㖞。而最夸应系以「自助午餐」自居，确实系自助形式，随意任食，但食物区只系餐厅嘅一小角，一眼睇晒，款式少得可怜，亦无转过款，无素食春卷、无咖喱鲜鱼、无印度炒面、连雪糕一样无，所谓甜品亦只有一样连名都唔知，又食唔出系咩嘅嘢。当问及餐厅负责人，虽态度友善，但确切回覆无雪糕，亦唔包餐饮，因为当时无记低包唔包餐饮，所以无为此争论。正如上面都讲过，嘢食系唔差，但点都系唔多对路。呻完一轮，都系时候讲番啲嘢食先！餐汤旁边个名牌写住菜汤，但就唔知咩菜汤，唯一可知就系汤色深橙，唔讲以为南瓜汤，但又唔系㖞，总之饮唔出主要系咩菜味啦，谜一样嘅菜汤！秘制三色沙律事前以为系一款沙律嚟，以三种不同色系嘅材料做成，但感觉又唔似，因为见佢摆出三大碟沙律出嚟，都搞唔清佢想讲系三色定三式。不过咁，三款沙律都好好食㖞，搞到我晌唔太多嘢食选择之下，临尾都再整多碟嚟食吓。因为三款沙律都无名牌，唯有以材料及味道帮佢哋命名啦。第一款：酸杂菜沙律，有青瓜、甘笋、洋葱、蕃茄粒粒，以橄榄油、醋调味，简单得嚟口味清新。第二款：酸奶油椰菜沙律，椰菜切细块，以一啲酸奶油汁捞均，食落又几好味㖞。第三款：咖喱薯仔沙律，特别在于咖喱带有香料味，比一般酒店常见嘅咖喱薯仔沙律唔同。印式烤鸡Tandoor Chicken两口子都公认系全场最好食嘅食物，始终天多尼烤鸡一向都系一间印度餐厅嘅手本嘢，晌依度都唔例外，鸡件无话烧到「干争争」，香料味够香够浓，又够入味，真系无得弹，所以临尾再食多转沙律时，都要搭多两件烤鸡。香炸杂锦时蔬Mix Veg Pakora无乜特别，只系一啲香口嘢，有炸青椒、炸蕃薯片，而炸浆又极之厚身，食一两件当试过就算。咖喱眉豆、咖喱杂菜Mix Veg Tafrezi蔬菜类仲见有两盆，分别系咖喱眉豆、咖喱杂菜，睇样认真麻麻，食都系一样，个咖喱杂菜就好啲，不过都系嫌佢哋个汁水汪汪。咖喱鸡Chicken Curry另一个好唔错嘅美食，咖喱汁底伴有鸡蛋件、蕃茄，咖喱唔系得个死辣，又系带有多层香料味道，虽则鸡件唔系好嫩滑，但个咖喱汁可以弥补佢嘅缺点。咖喱羊肉Keema Mutter依个同咖喱鸡嘅咖喱有啲唔同，味道偏重，咖喱及香料味都比较浓，而羊肉心想会系一块块，原来唔系，碎湿湿咁样，同肉酱或免治牛差唔多，斋食无咁好，所以用嚟夹住印度薄饼食就最夹喇。菠菜豆腐粒Paiak Paneer有惊喜㖞，菠菜打到烂，又未烂得晒，似菠菜蓉但仲食到一丝丝质感，内里又捞咗啲豆腐粒同青豆，口感几过瘾，味道又比较清，同样净食唔系咁好，揾印度薄饼伴住嚟食就一流喇。印度炒饭Indian Bashati Rice Dullao饭粒比较幼身偏长，此外，其实个炒饭仲无咩特别，都系加咗啲蛋嚟炒，不过，搭住唔同咖喱菜式一齐食，无咗佢又令人若有所失咁啰。印度咖喱角Samosa有啲餐厅译佢为印度三角炸饺。包得大大件，涨卜卜，外皮唔似我哋港式嘅咖喱角咁薄身，佢会比较厚，不过咬落几松化。内馅有青豆、薯仔蓉，填到满一满，都咪讲笑，食落几饱肚架！印度薄饼Naan一直都唔见有印度薄饼，都感到有啲出奇，食到中段，去完晒啲咖喱角，先至换咗薄饼，原因都系无位摆嘢食。薄饼薄身有油香，软软熟，烤得少少㶶有啲焦碳香，最爱搭咖喱、咖喱羊肉、菠菜蓉嚟食。其他沙律傍有两兜酱，一绿一红，绿者系带有薄荷味嘅酱汁，红者就酸酸辣辣，因为无写明系乜，都系估估吓，相信应该系用嚟蘸咖喱角、春卷、薄饼嘅。甜品一盆啡啡黄黄嘅糕，上面铺有少少果仁碎，名牌无写系咩，只系写住甜品。质感软糯糯，食唔出系乜，可能系啲豆蓉，一味得个甜字。其实以$70食咗好几款甚有质素嘅咖喱菜式嚟讲，都算抵嘅，不过若以原价，加上依度嘅环境同服务，翻兜嘅可能性微乎其微喇！继续阅读