影片
以上资料只供参考，请与餐厅确认详情
招牌菜
灯光暗暗的, 客人不多不满座一坐低就有甜面豉酱之类既野, 仲可以加海盐牛舌 (中等厚度, 烧得岩岩好, 仲有肉汁)猪肉紫苏卷 (唔系好惯紫苏既味道, 但系免治猪肉系几松身唔会好硬实)烧饭团 (拣左鳗鱼, 热辣辣烧起好香口, 紫菜仲脆的, 鳗鱼份量不多, 配埋甜甜的鳗鱼汁一齐食可以填饱少少肚)烧鳝 (皮脆肉嫩) + 猪肉鸡骨肠 (普通猪肉肠咁)粟米 (香甜烧粟米,唔会干晒)芝士鸡翼 (唔系几食得出有芝士系入面, 只系有一堆好似沟左d肉唔知乜既野咁)盐烧牛肉 (略嫌唔够嫩滑, 可能牛肉质素系差不多)银鳕鱼 (肥美嫩滑, 同烧鳝各有千秋, 不过略嫌酱汁太多)
继续阅读
都唔记得几时开始，南蛮亭改咗名为南亭，亦冇深究为何，唔知系转咗老板，还是与日本总店关系有变，总之食物水准冇变，我哋都继续帮衬。南亭现在有四间分店，分别系中环、铜锣湾、跑马地及尖沙咀，对于我哋d新界人或九龙人来讲，当然首选尖沙咀店，但今晚之后，恐怕要过海才可以食到啦，因为店长同我哋讲，由于大幅加租问题（听闻由八万加到二十几万），下星期六（即11月12日）后，尖沙咀店将会暂时停业；真是岂有此理，地产霸权当道，居然加三倍租，叫人如何经营下去，只有名牌店或是大财团，才有足够实力系广东道立足，混账。Anyway，激气都冇用，今晚一于不醉无归，先叫一枝真澄七号，$700一支，中价货色，一向对sake都冇认识的我，好奇地问我身边的朋友，点解要飮七号，我哋三个人，大号都飮得哂？（我好无知咁以为好似拔兰地嘅size咁分大号、二号、三号，哈哈哈）朋友解释俾我听，七号系代表七号酵母，系真澄酒庄于1946年发现，并屡夺殊荣，系日本有名嘅酵母之一，而且系用山田锦米，以传统山废技术酿成，系一支唔错嘅清酒；先闻一闻，酒香怡人，唔会抢鼻，再呷一口，酒味浓郁芳香，甘醇易饮，不辣喉，不幸口，比起上次系秋田饮嘅淡丽吟酿，更有层次感，更有冲激，果然系好酒一支。前菜系椰菜、西芹、青瓜和甘荀，全部都新鲜、爽脆，可醮南亭自制酱汁或青海湖盐，南亭标榜自己为青海天然湖盐专门店，其盐粒比较粗，但咸味不重，而且颜色偏向纯白冇杂质，用来食用比较健康，而且食完亦唔觉口渴。二话不说，先来一客枝豆和鸡泡鱼干，枝豆暖暖的上枱，一大碗，份量唔少，亦唔会煮得太腍，有咬感，加上少少青海湖盐调味，食得份外开心；鸡泡鱼干，呈啡黑色透明状，烧得好，焦焦地，够香口，有嚼头，但唔韧，非一般卡拉ok所能做到。牛肉唔需要烧太耐，所以通常都系牛肉先到，蒜香烧牛肉，有少量蒜茸及大量葱花铺喺牛肉面，入口有一阵浓烈嘅蒜香及葱香，并冇喧宾夺主嘅感觉，反而葱蒜嘅清新感觉，更能把牛肉嘅肥腻口感冲淡，与烧牛肉味道相衬，而且牛肉并冇烧得过火，内里肉汁仍然丰富，好食；不过印象中，跑马地烧鸟亭嘅蒜香烧牛肉，比南亭更出色，有时间的话，真系要再去寻味一番。再来的，就是烧鹅肝，虽然索价$98一件，但份量十足，鹅肝内亦冇血管、血筋，绝对系法国鹅肝，非平价货色，外表烧得香脆可口，内里却软腍味浓，虽然鹅肝本身不需任何腌制，但师傅嘅烧功就绝对重要，否则又点可以烧到外脆内软呢。烧鸡翼，很喜欢日式盐烧鸡翼，鸡皮烧得脆卜卜，冇哂鸡油，冇哂皮下脂肪，干身香口，鸡肉则依然嫩滑多汁，真正皮脆肉嫩。烧鸡软骨，系全港最好食，好食不只烧功了得，仲要食材上乘；南亭嘅鸡软骨，细细粒，粒粒都系软骨，带少少肉，系真真正正嘅少少肉，绝对唔系坊间𠮶d大大粒，肉多过软骨嘅呃秤货，加上烧得干身，非常惹味香口，咬落唔硬，有嚼头，脆脆的，难得；如果鸡软骨太大粒，就算烧功有几了得，都冇法将软骨烧得香脆好嚼，所以坊间大大粒嘅鸡软骨，唔食都知唔好食。鸡皮虾卷，哈哈，又系鸡皮，冇办法，鸡皮确实烧得好，其实鸡皮虾卷，系先用紫苏叶包著一只海虾，再喺外面包一层薄薄嘅鸡皮，包得非常扎实，绝对唔会散开；鸡皮当然烧得脆皮香口，虾亦有少许鲜味，肉爽，唔梅，加上紫苏叶嘅香味，系唔错嘅配搭，值得encore；不过，南亭仲有净烧鸡皮，记得多年前曾经食过，印象麻麻哋，因为鸡皮串叠一起烧，并不是摊开整块鸡皮来烧，烧得不够彻底，所以有些鸡皮部位唔够脆，而且食入口，感觉亦好似食猪油咁，所以并唔推介。再来软骨鸡肉棒，就是将鸡软骨剁碎，混入免治鸡肉内，再搓成棒状，加上秘制酱汁烧；软骨及鸡肉都剁得幼细，入口绝冇实崩崩嘅感觉，腍糯之余，又有软骨嘅嚼头，亦系一个唔错嘅选择。三个人，轻易地将整支真澄七号飮清，本来想要支北海道男山，可惜全店只得一支，刚刚被第二枱客要了，店长亲自来赔过不是，但又岂是他的错呢？根本我哋都冇示意店员为我哋留酒，我哋只好开多支真澄七号；但店长非常好客，亦相当健谈，仲话有支獭祭二割三分，系早两天跟朋友饮剩三分一，如果我嘅唔介意，就请我们一起饮，我哋当然却之不恭，友人仲话呢支二割三分绝对系极品，二割三分系代表精米度23%，即系一粒米，会将77%外层磨走，只剩低23%嘅米心来酿酒，系日本清酒中，几乎系最低精米度嘅清酒之一，友人记忆中，就只有龟之甲二十二及壹十四嘅精米度喺低过二割三分，一般嘅纯米大吟酿，精米度都只不过是介乎40%至50%左右；店长小心地将支二割三分倒入个sake壶中，再斟俾我哋，香味不足，相信是由于已开了两天之故，但香味优雅，非常清新，呷了一口，顺滑圆浑，一种好柔和嘅感觉，你会感觉到d清酒好温柔咁系你口腔中，行来行去，迟迟都唔舍得离开咁，非常幼细，余韵悠长，果然系极品；但正正由于佢淡淡嘅优雅，友人觉得清饮或伴以一些比较清淡嘅食物，才可欣赏到二割三分嘅优点，若以浓味食材佐酒，只会糟蹋好酒一支，我亦有同感。享受完二割三分嘅温柔，我哋又再次投向串烧嘅怀里，串烧大虎虾，非常大只，肉质爽嫩，亦有鲜味，虾膏唔算多，ok啦，咸度亦适中，止于虾壳，惹味之余，唔会令虾肉变质。烧广岛蚝，有蚝味，略嫌唔够肥美，不过一啖一只，亦食得过隐。烧鹌鹑蛋，虽然并不是什么名贵食材，但偏偏就不是随处可以食到，鹌鹑蛋嘅胆固醇份量比鸡蛋低，食多一、两只都无妨，正因为鹌鹑蛋比较细，受热部份比较多，所以当师傅把鹌鹑蛋嘅表面烧得焦焦地，加上秘制酱汁，一啖咬落去，蛋黄及蛋白份量唔会过多，掩盖了酱汁嘅味道及焦皮嘅香口，正。再来烧白鳝，都算厚身，外表烧得亁脆，加上青海湖盐调味，把腥味辟走，而且咬落唔会松散，少少弹牙，唔错。烧粟米亦随后而至，唔知是否潮流兴食得健康，粟米烧完好似冇烧咁，仍然系黄色一枝，所以我哋冒昧要求烧焦一点点；三数分钟后，我哋与粟米再回面，今次就好得多，明显地见到有d焦焦地，非常吸引，唔似系日本粟米，但亦非常清甜，粒粒肥大饱满，好食，自己总是烧不到这种效果。最后，友人叫了一个梅子烧饭团，而我哋两口子就要咗个荞麦冷面；烧饭团卖相吸引，整个饭团都烧得脆卜卜似的，讲真，望落似炸饭团多d，哈哈。至于我哋个荞麦冷面，用一个竹盘，放咗一撮冷面，上面洒咗几粒芝麻和紫菜丝，而个竹盘嘅作用，就系用来隔开d水份，令到d冷面唔会水汪汪，亦方便醮面汁，除咗一碗面汁外，仲有wasabi、葱花、萝卜茸，冋一只鹌鹑蛋，呢只鹌鹑蛋嘅作用就大啰，简直起咗画龙点睛嘅作用，令𠮶面入口滑得多；我习惯先将wasabi放入面汁搅溶，因为wasabi需要压溶，所以先处理，再将只鹌鹑蛋放入面汁打匀，最后就将葱花和萝卜茸一起放入面汁，这样的面汁，有酸有咸有辣，有葱花嘅清香，又够滑，加上一阵冷冰嘅感觉，非常正；即刻夹了一撮冷面，醮上精彩嘅面汁，加上面条嘅烟韧，绝顶嘅美食。经过一轮冲刺后，我哋三人都捧腹大饱，但为食的我，又点会放过绿茶雪糕呢？可惜南亭只提供雪米糍，虽然店长已为我哋一添再添，但始终都及不上雪糕球那么好味和吸引。食得丰富、饮得满足的一餐，盛惠$2,800，每人平均$933，多谢好友请客；其实两支sake已占了半张单价钱，如不饮酒，每人只需四佰多，绝对唔贵。可惜11月12日过后，如要品尝南亭的功架，非要过海不可，实在有点婉惜，希望南亭早日系九龙另觅地址开舖，免却我们过海之苦，谢谢。
继续阅读
1月5日, 112周月快乐~~~!! 今晚决定同阿比食d贵夹唔饱大餐庆祝一番~ 喺我地贵夹唔饱嘅选择入面, 串烧都算系表表者! 左拣右拣, 做串烧做得比较专门同出色嘅, 睇怕都非南亭莫属~我地先点咗个一人餐~ 都可以试匀好多种唔同嘅串烧! 仲有野菜沙律、面豉汤同白饭~ 野菜沙律有西芹、青瓜、红萝卜同椰菜, 全部都非常新鲜! 点少少酱汁食有开胃作用, 就咁食又可以refresh下口腔~ 非常好! 烧鸟套餐 (一人前) $198::: 露笋猪肉卷 ::: 听个名仲以为猪肉系主角, 但我地都系食完先发现, 原来串青BB嘅露笋外面包咗层超薄嘅猪肉… 肉地其实就无乜, 但富有油脂甘香, 包住d露笋烧到又爽又脆, 又唔会太油腻, 好味!::: 紫苏叶猪肉卷 :::呢个就真系猪肉做主角~ 不过与其话系猪肉卷, 其实佢就似猪肉丸多d! 猪肉烧得干身之余够juicy~ 切碎嘅紫苏叶混入猪肉卷中渗出香料味, 令味道更清新.::: 冬菇 :::冬菇仲保持到少少juicy, 烧过之后菇味更浓郁~ ::: 青椒仔 :::好有趣~ 平时好少食呢只青椒… 细细条烧到软淋淋, 外皮少少脆, 一d都唔辣~ 反而仲有少少清甜味~::: 鸡肉大葱串 :::一旧鸡肉隔一段大葱卡罅卡罅咁间开. 鸡肉鲜味, 但唔够弹性~ 大葱好香, 虽然外皮有d㶶, 但内里都颇嫩, 不错!::: 鸡肉串 :::净鸡肉味道略咸, 不过就可以最直接食到鸡嘅肉质~::: 鸡颈肉 :::好有趣! 第一次食~ 每旧肉都系细细旧细细旧咁~ 食落有d硬硬脆脆, 但就唔太有鸡味.::: 鹌鹑蛋 :::一串三只~ 好味! 烧到d蛋白开始有少少硬, 但内里d蛋黄仲系粉粉地~ 正!::: 银杏 :::唔会烧得过硬过干, 味道甘甜, 不错~::: 南蛮烧牛肉 ::: 呢个一般~ 牛肉味唔够浓, 肉质有少少韧, 但面头d烧汁几惹味!::: 牛舌 ::: $54名物! 真系无敌~ 又弹牙又嫩! 牛味比牛肉更浓郁~ 黑椒又好惹味~ 好好味呀!!!::: 鹅肝 ::: $98有d求其地将呢个全餐最贵嘅单点同个一人前d串烧摆埋一齐… 鹅肝表面有层薄薄地嘅粉衣, 已经烧到脆卜卜~ 内类就保持油润~ 算系唔错~ 不过就唔算系必食.::: 粟米 ::: $35食串烧梗唔少得呀菲最爱嘅烧粟米!!! 差唔多等咗成餐饭先烧好上菜~ 一嚟已经忍唔住食咗一条先影相…粟米外衣烧到脆卜卜, 咬落去卜一声爆出鲜甜玉米汁~~~ 真系好好味!! 直头系比雪糕糯米糍更好嘅甜品!!::: 饭团 ::: $20 x2饭团亦系南蛮嘅名物之一, 同呀比一人一个~ 我地要咗一个三文鱼一个馒鱼馅. 有块新鲜紫菜包住嘅饭团外面饭粒烧得焦脆干身, 直头近乎饭焦质地, 好香口! 饭团内部则保持软熟甜糯~ 老实讲其实馅料味道唔算浓, 但在外脆内软嘅饭团包围下, 馅料反而属于次要了~成日都觉得食串烧系贵夹唔饱, 但原来唔洗好贵都可以食饱饱~ 今次大包围式试咗好多款唔同嘅烧物, 样样野都几好味! 加上可以直接望住师傅喺串烧炉密密烧, 食物未入口已经感受到师傅嘅用心~ 正所谓慢工出细货, 由于真系即叫即烧嘅关系, 有部份食物都真系要耐心d等候先有得食! 不过喺等食时可以欣赏下师傅嘅功架, 都可以算系晚饭嘅一大娱乐~
继续阅读
这是我在一月份光顾上三次之食市, 跟同事一次, 介绍朋友一次, 招待放假回归小朋友一次. 每次都保持非常好水准, 服务态度一流, 不得不写一些 Compliments.本人还觉得比北海道之串鸟连锁店及其它在日本帮衬过D串烧居酒屋更好食, 每串热辣辣而且肉汁锁在其中, 份外Juicy及回味.工欲事其善, 必先利其器, 其中够Power之烧烤炉功不可没, 加上师傅准确拿捏烧, 转, 起, 之时间及立刻传送到枱上, 以来不及照相已一扫而空. Sorry la. As believed there are many other photos already uploaded. 见到口水到流, 热切期待下一次. 服务态度亦非常好每次顺序order 由清到浓味首先烧豆腐, 青椒, 猪肉露荀卷 - 豆腐皮脆内滑, 青椒爽脆, 猪肉露荀卷是头一round 之精华, 热辣辣而且猪肉汁与露荀配合得天衣无𫄤,再来烧白膳,鸡翼及牛脷 - 白膳肥美脆口, 鸡翼皮脆肉滑, 牛脷则肉质口感丰富, 多汁唔干最后叫烧羊架及鹅肝慢慢叹 - 羊架肉质丰富,多汁, 鹅肝边边脆口, 肉地热辣辣嫰滑, 回味无穷每人叫了一杯唔同果味之果味酒约$35, 感觉比叫清酒来match还好, 有次有小朋友最后多叫了一热一冻稻庭乌冬, 乌冬滑一滑, 冻乌冬也正好帮口腔清一清, 过一过冷河
继续阅读
日式炉端烧专门店，配一壶清酒，颇适合三五知已边吃边倾计。串烧款式繁多，整顿饭点了十多二十款。较好吃的有牛舌、(普通)鸡翼、牛肉稻庭乌冬及粟米。不作推介的有日式芝士年糕，紫菜腍的，芝士味唔够香，年糕囗感一点也不烟韧，似吃薯蓉多一点。其余款式评分都OK喇，未算很突出，其余食肆也不难做到差不多水准。
继续阅读