你好！茶飯

营业中

休息中

雖然呢間餐廳係主要食台灣嘢，但覺得呢間嘅常餐都算幾唔錯！🙂‍↕️同埋大部分位都係卡位，坐得幾舒服🤣🪄 常餐 板燒雞扒濃湯公仔麵 ($42)配炒滑蛋拼香酥丹麥包｜熱奶茶最鐘意係丹麥包，好酥脆好香～ 蛋都炒得好滑，有牛油香～🧈雞扒好大塊煎得香口，公仔麵走比較偏腍咗啲啲🤏🏼熱奶茶正正常常，冇特別驚喜，茶味偏濃～🪄 鹽酥雞排配蔥油拌麵 ($52)配海鹽芝士奶蓋茉莉綠茶 （+$15）蔥油拌麵有驚喜，麵條食落好有咬口，調味都啱啱好，好香口🤤鹽酥雞扒都炸得啱啱好，食落同拌麵好襯～杯嘢飲都幾有驚喜！海鹽芝士奶蓋好厚身，飲落鹹鹹地好有奶香，配埋茉莉綠茶飲唔會好膩🙂‍↕️.一句總結⚡️下午茶份量幾多幾抵食！😋你好！茶飯 (馬鞍山)📍馬鞍山頌安商場1樓138及139號舖🚙 泊車指數: 頌安商場有泊車～滿$300就免費2小時 🅿️

由開張到依家外賣都係要等好耐，浪費時間，無下次，浪費時間。 如果趕時間要食請諗清楚。咁既服務質素，難怪個個上哂大陸食野。咁耐都唔改落，好難吸引人黎幫襯！希望鋪頭見到會改善

超級污糟，托盤好似冇洗過咁，食食吓想放低筷子都唔得…. 我喺手hold住筷子咁寫呢一個劣評…唔平，六十幾蚊就係一個餸同一碗飯，加埋台式飲品就要八十幾….. 員工都好冇禮貌，仲有好多個員工，共通點係全部都係燥底黑面，上菜食物直接放喺餐牌上… 想問吓我得罪你啲咩？執過嘅碗碟就放喺車，唔知放咗幾耐，仲要直接喺你面前表演執餐具，好嘈完全唔開胃總之好污糟，唔開胃，新開咗咁耐冇機會食，原本都幾期待，因為好似都幾好生意，以為唔錯，除咗嘢飲正常之外，冇嘢係正常

平時成日飲開連鎖果啲台式，碌碌下電話見到又有野食又有野飲既餐廳，最終都係買左杯嘢飲試下，估唔到咁高質，大推髒髒朱古力珍珠奶茶，啲珍珠世一冇得頂，杯野個樣又幾靚，出單又快，唔錯。

天氣凍凍地，今晚食咗煲仔飯和羊腩煲。櫻花蝦臘腸肉餅煲仔飯 $68煲仔細細，臘腸和肉餅嘅份量都好足，味道不錯，而且有飯焦，不過飯比較硬同乾身。雙冬枝竹黑草羊腩煲 $138（送白飯一碗和生菜一碟）羊腩係蒙古黑草羊，配菜都好齊全，有枝竹、馬蹄、冬菇、冬筍、仲有甘蔗添（不過甘蔗好似多咗啲）。冇預期之下個羊腩煲幾好食，最主要係個羊腩同埋啲配菜都好入味，羊腩和枝竹都好腍，羊腩細細件，大部份都冇骨，不過就唔係件件都有皮，仲有一碟生菜和白飯，抵食。另外半價加購蜜香芭樂烏龍茶 $19同香水檸檬茉莉綠茶$14.5，味道清新，配呢啲濃味食物啱啱好☺️

平時叫外賣米線叫X仔叫到悶，見有新餐廳就試吓，叫完之後諗住上OpenRice睇吓食評，點知咁多負評，仲有少少擔心，所以上嚟寫返個食評俾佢。叫咗一個老壇酸菜魚米線，湯米線有分開裝，都幾夠熱，酸菜魚個味道好平衡，酸味麻味都夠，雖然佢冇得揀幾多辣，但對於我唔係好食到辣嘅人啱啱好，幾惹味魚塊都有幾多件，幾滑下，仲有啲配菜木耳、腐竹、豆腐卜等等，不過米線份量比較少，女仔食就啱啱夠飽，男仔可能要再加其他嘢食。再加咗一份滷水蛋，同埋一杯炭燒烏龍茶，都OK 。

個炸豬扒D炸粉又厚又淋曬，完全冇嚟味道，仲話係招牌豬扒個炸菜配菜一樣冇嚟味道。其實個地方裝修唔錯、坐得舒服、服務員態度ok, 但D咁嘅食物質素真係倒米，之前啱啱開張好多人排隊，今日lunch hour去大把吉位，似乎冇回頭客係有原因嘅

外賣叫咗一份鹽酥雞排配葱油拌麵(9折咗$79.40)所謂鹽酥雞排凍哂唔在講，嗰份葱油拌麵仲激，啲麵凍哂黏埋一舊完全拌唔到。如果無折用原價$86俾呢啲咁嘅質素會唔會太過分呀？

新開個時太多人幫襯，唔想排隊等，等到人氣已過就去試下啦！咁我就點左個牛肉麵及香水檸檬小農紅茶。蘿蔔，麵條，湯底好一般，至於牛肉好老，完全失望，應該無下次。檸檬茶一般。

我今日夜晚諗著同屋企人試下新餐廳叫個肉燥飯嚟食 但係因為我哋本身有少少野唔食（ps:本人唔係咁鍾意食蔥）當時叫嘅時候都有明確注明表示走蔥！但係啱啱返到屋企滿心欣喜諗著開飯 發現冇走蔥 同埋唔到係外賣哥哥打瀉 定係包得唔得唔好 雖然係一件好少嘅事 但係如果我有食物過敏同時又發生同樣問題 真係會對個別人士造成影響 希望可以留意多一下！

同阿仔撐枱腳，由海濱長廊散步到頌安邨的你好！茶飯試吓新嘢先😊哦，原來賣點係台灣嘢食😋不過見到個碼頭烤魚好似好吸引🤩再加埋店員努力推介，就試吓啦🤤冇幾耐，店員捧上一鍋滿滿材料的蕃茄魚煱放在枱上，原來個電爐已經設計好安裝在枱下，在枱面食魚煱時很方便👍以無線搖控便可調交火力，好正！食物方面，海鱸魚要脆有脆，要滑有滑，好味道🤤其他配料超級豐富：豆卞、枝竹、雲耳、大豆牙、紅薯粉、蓮藕、薯仔、白蘿蔔、洋蔥、大量蕃茄。好滿足哦😄

岩岩買左個個外賣KT5 嘉義雞肉飯 $60🥜呢個真係伏到爆爆爆爆爆！叫嘉義雞肉飯一向高風險，已經ready好可能係乾爭爭，一堆無味雞絲，一打開，完全係呆晒！係玻璃䇜！完全理解唔到，果堆生菜，加埋好似嘔吐物嘅䇜，咁諗住照試下味，可能樣唔掂姐，完全唔似醃過嘅雞，嘔心口感加無味嘅䇜同雞啊，應該仲差過醫院糊仔😢😢😢😢😢😢😢KT2 鹽酥雞扒煎蛋肉燥飯 $62🥜相對地正常南投四季春（凍）+$2南投碳燒烏龍茶（凍）+$2🥜又無標明有糖，如果係就落備註，double嬲😡🤬

今日咁啱要去頌安嗰度攞啲嘢，咁就去左呢間食叫左個「蒜泥白肉」、蔥油雞、牛肉麵同珍珠鮮奶。「蒜泥白肉」同expect嘅唔同，啲蒜泥偏熟左好多，白肉係鞋嘅。蔥油雞就OK，隻雞夠滑嘅，係啲刀功有待改善（啲雞有啲連埋一齊😹）。個牛肉麵就個麵OK，啲牛睇落應該偏韌，但係食落又幾腍，蘿蔔都係好腍好入味。（好多蚊仔😹）（同埋其實我等位嗰時比幾個老人家插左隊，唯一比較唔分氣嘅係佢哋會有得啲人插隊，明明係我攞飛先反而安排啲插隊嘅人入座先）

呢間新開張，成日排哂隊，一直都想試下，經過見到門口少咗人排就試下，分別叫咗個鹽酥雞排飯同埋豬排飯，醃嘅味道算正常，但鹽酥雞排好細舊，連女仔食都唔夠飽-.-而塊豬排呢又薄又乾，而家食豬肉乾咩？啲飯雖然用珍珠米，但煮到好硬好乾真係好難食，好耐未試過咁難食嘅嘢，通常啲餐廳都係初時保持水準，之後就keep 唔住每況愈下，而家新開都咁嘅垃圾水準真係少有，$60蚊一個飯唔係平，大家真係唔洗去試，唔好哂錢，絕對無下次。

呢排幾間台灣餐廳接住開張，上次外賣台式鳳梨香腸蛋炒飯，古早味新竹炒米粉味道同份量都幾好，套餐包飲品，可能午餐時間繁忙店員態度一般。今次再叫台式鳳梨香腸蛋炒飯，改基隆海鮮闊佬炒飯，晚餐只有散叫不包飲品，都未到晚市時段人流唔多，不過等候時間仲多，反而店員態度十分客氣。總的來說，一間味道不錯嘅台灣食店，炒飯真係幾好味，但價錢偏貴，相信早餐和下午茶餐會比較抵食，服務待改善，不過勝在餐牌選擇多，可以由得你慢慢揀。