影片
以上资料只供参考，请与餐厅确认详情
相关文章
有小组组员知我哋两公婆成日由美孚行上马骝山，不时问我哋几时带佢去行，卒之择咗今日兜一转，但起步前梗喺食个饱饭啦，所以，专登约佢哋喺美孚嘅「京都荟」 饮餐茶，跟住经「饶宗颐」穿上马骝山，再晌「九龙接收水塘」、「石梨贝水塘」打个转返番落美孚。话就话呢间属于街坊酒楼，亦开咗好一段时间，但喺个大堂楼底超高，就算拍满枱，都仍然唔觉会话太逼，加上被安排咗张死角枱，更加静局，方便我哋倾偈。一张价目表有晒平日、星期六日假期，早市、午市、下午茶各时段嘅点心收费，一目了然。另外，茶钱收$14位，有收加一服务，计埋呢啲「立立杂杂」，其实饮茶确喺唔平，不过，大家叹吓点心，倾吓偈，开心嘛。有咩嘢拣就唔多讲，始终饮茶嚟嚟去去都喺𠮶啲，贴晒啲点菜纸出嚟大家就一目了然。此外，当然例有啲套餐，以及小菜嘅选项。沙律明虾角 $39.8老实讲，个样就包得真喺麻麻哋，折纹唔平均，不过，馅料都算足，猪肉松化，虾肉爽口，仲夹杂啲蔬菜粒，况且，炸得亦香脆可口。香脆炸春卷 $36.8呢度啲炸嘢确喺唔错，春卷外皮炸得甘香又脆口，完全无油腻感，沾上少少喼汁，效果更好，里面混有少少虾肉，比起得啲净肉嘅更爽口。香煎萝卜糕 $32.8老婆特别钟意食萝卜糕、芋头糕，所以，佢点都要嗌番一客过口瘾。碟萝卜糕叫做稳打稳扎，煎得香口，口感挺实唔削身，少腊味就更合老婆口味。蜜味叉烧肠粉 $36.8饮茶唔嗌肠粉感觉总喺差咗啲，睇落啲肠粉皮拉得有啲厚，但又透透哋里面嘅叉烧馅㖞，算拉得滑，亦有米香，叉烧落得无手紧，塞满松化嘅瘦叉同葱花，啱我口味。玫瑰金虾饺皇 $39 8个名就改得劲，外观都大大粒又够晶莹，折纹细致度尚可，而饺皮咬落软熟却唔黏牙，里面全部都喺鲜虾，非常之爽弹，甚具虾嘅鲜甜味。潮州粉果 $36.8萝卜糕之外，粉果就喺老婆另一至喜欢嘅点心，粉果包得大大只好饱满，呢度都喺传统做法，里面满满沙葛粒、西芹粒、花生粒、虾仁粒……等等，用料十足，味道唔错，只喺外皮有少少削。奶黄流沙包 $36.8饮茶又点可以少咗包点架，一送到嚟就要趁热食，一咬包身非常软熟，而中间嘅流沙馅都算得上澎湃涌流，做得亦够绵滑、香浓，甚富咸蛋嘅香气，确喺唔错。鲜淮山鸡扎 $39.8通常啲鸡扎都喺卷住啲鱼肚同芋头，呢度就改用鲜淮山取代芋头，都几好吖，鲜淮山口感爽爽哋又有益，而啲鸡肉亦几嫩滑，鱼肚好爽。怀旧干炒牛河 $98同枱老友称得上有食力之人，所以，都要叫番碟炒粉饭面垫肚，由老友发板嗌咗碟干炒牛河，炒得几靓仔㖞，条条河粉都上晒色，炒得均匀，食到尾𠮶炷都唔油腻，炒功了得，牛肉裁得大大件，软腍有肉香。香滑芝麻卷 $32.8「菲林筒」绝对喺我哋啲老饼嘅集体回忆，大家都一致要试番下，不过，咬落嘅感觉喺有啲干，好在喺啲芝麻味都够浓。虽然今餐得4个人，但嗌咗唔少嘢，食得大家都好饱，一阵行番转山，够晒消化晒啲卡路里。我哋就唔多北上，虽然食嘢、买嘢平咗，但时间成本高，饮吓茶、行吓山就最啱我哋两公婆。
继续阅读
我和朋友误入咗一间美孚酒楼，点咗脆皮飞天鸡、豉汁蒸大鳝同埋豉椒炒蛏子，真系惊喜连连！一入到去，场地好大，冇咩人，得几围，感觉几舒服。.首先，$10蚊一只嘅脆皮飞天鸡真系必食推介！炸得金黄脆口，肉质滑嫩，拿手套自己再剪开，食落去爆汁，好味。真系意想不到，完全冇辜负呢个价钱。.接住嚟海鲜自选组合，任选两款$238，简左豉汁蒸大鳝，鳝蒸得刚好，鲜味十足，豉汁添香，食落唔油腻，真系正！同炒蛏子亦都唔错，四只蛏子肉质鲜甜，够大只，蒸得刚好唔老，味道入味，每一啖都食得好开心。.呢间酒楼嘅食物份量都几足，唔单止味道好，仲系经济实惠，适合两人晚饭。虽然晚上冇咩人，但环境宽敞，唔使挤迫，感觉好轻松。仲有，佢哋嘅服务都几好，店员亲切，令我哋更加享受呢个晚餐。整体嚟讲，呢次误入嘅经历真系一个惊喜！食物唔重口味，亦好适合我哋呢种钟意清淡饮食嘅人。下次一定要再带埋朋友一齐嚟，试埋其他菜式！肯定会返嚟帮亲！
继续阅读
大年初二拜年开年，屋企人book咗美孚京都荟，虽然一楼，但有䢂，方便老人家👵🏻同行动不便亲戚。包房，有麻雀🀄️打，$5988一围，落$500订，后生既打麻雀🀄️，老既就坐下倾下计派下利是🧧拜下年。7:30pm打完就叫侍应收枱开饭，本身就懒洋洋，一俾利是🧧就精神哂，仲要多咗几个冲咗入嚟逗利是🧧同帮手搬枱。啤酒🍻转汽水🥤，有转盘，有个亲戚入咗院坐松d。一开波上乳猪，size唔大，皮脆有肥膏，正👍🏻。第2味竟然系脆皮鸡，本身第8味，皮脆肉滑，正👍🏻，我钟意食鸡髀🍗。之后瑶柱甫，但最皓食系豆苗，炒得皓香皓嫩。竹笙海皇翅，翅唔多，但整得皓味。花胶玉掌，花胶同掌都皓巨大，掌入味。富贵斑，上菜时已经唔系鱼型，肉唔够滑。大虾球蚌仁，虾🦐唔算大，蚌爽口。盐烧六头鲜鲍鱼，香口，但唔够腍。伊面炒得皓味，唔太湿唔太干。糯米饭唔够腍，唔够腊肠。糖水系红豆🫘沙汤丸，大满足😌。
继续阅读
第一次黎呢间京都荟食大闸蟹放题，真的惊喜！大闸蟹应该有3-3.5两，公同乸都十分多膏，实在太邪恶！入座时侍应已提醒蒸蟹需时20分钟，第一转10只算快到，第二转就要催一催，呢个餐包鲍鱼鹅掌，仲可以任食蛇羹、糯米饭、片皮鸭…味道不错👍🏻其实2小时任食真系唔太够，食到人地关门都唔赶我地走，仲话要帮我地影相，真系唔好意思😅环境阔落，酒楼整洁程度尚算ok, 侍应服务好好👍🏻👍🏻👍🏻因为好，下次食晚饭都会是选择之一😁😁
继续阅读
之前返工做野时经过美孚见到佢出面video wall 有＄10蚊一只鸡好吸引，所以决定同屋企人齐去试下。我地一行5人去到大约6点半，当日系星期六，但人都好少，我地左一个套餐有元贝同烧腩仔，个烧腩仔皮好脆但元贝好细，但味道不错。讲番只10蚊烧鸡，真心正，唔系hea，坚好食。我仲叫埋特价蚝同埋个炖汤都好食，我妈妈话个汤系真材实料。而其他食物都好食又大碟。佢仲有任食大闸蟹，但要＄4XX我觉得有D贵，但当晚我都有叫左两只大闸蟹食都系＄98系抵食嘅，质素都好。
继续阅读