【东涌新玩法】开箱五星酒店 Staycation+郊游导览
而家放假都想远离市区呼吸吓新鲜空气,大屿山东涌当然系人气地点,背山面海又有Outlet,郊游完去行个街几爽!但原来东涌仲有个新玩法~就系去12月1日新开幕嘅5星级酒店Sheraton (香港东涌世茂喜来登酒店),酒店入面有4间高质餐厅齐晒自助餐丶西餐丶中菜同High Tea,郊游完嚟食嘢Chill 吓又得;索性嚟Staycation 玩两日一夜,食饱返房望吓海景放松又得。

外国浪漫风Sunset Grill 户外座位远眺机场靓景
每间餐厅都由经验大厨主理,好多菜式都用心创作。锺意精致西餐嘅话,就有呢间Sunset Grill。餐厅喺Sheraton酒店19/F,由外藉大厨David Parkin主理,全店落地玻璃对正海景,装修好型格西餐feel,喺度食饭真系有种去左外国嘅感觉。同场仲有户外座位,远眺机场靓景,如果嚟Staycation 嘅话,就算唔喺呢度晚餐,夜晚都一定要嚟呢度饮杯酒Chill吓。
餐厅气氛走外国风,有驻场Bartender 调制各款Cocktail。
VIP房隐私度高,超长枱设计贯彻外国餐桌传统。

炭烧矜贵Porterhouse Steak
大厨引入多款外国料理,个人觉得想测试一间西餐厅食材靓唔靓,食牛扒就试到真章。因为靓牛扒调味简单,更食得出牛扒本身嘅软嫩肉质+Juicy肉汁。呢度就有满足牛控几个愿望嘅Porterhouse Steak,点解咁讲?因为Porterhouse Steak 中间有大T骨,T骨两边分别系西冷同牛柳,一次过食到肉味浓嘅西冷同软腍嘅牛柳。
牛柳位够大先称得上Porterhouse Steak,肉价特别矜贵。 
店内特设大炭烤炉,用均匀火力锁住肉汁,并带天然炭香味。除此之外,餐厅仲供应乾式熟成牛扒,令牛肉本身天然嘅风味更加突出,呢样野唔系经常食到嫁。

外国料理 烟熏有机走地鸡  
除咗牛扒外,呢度亦有外国料理常见嘅原只烤鸡。呢度系用有机走地鸡,即系用有机天然壳物饲养之馀,亦以放养方式畀鸡只四处走动,肌肉更多咬落自然更弹牙。大厨特别用香草烟熏全鸡,慢烤令鸡肉Keep 到软嫩唔嚡口,食落会慢慢渗出一种独特烟熏香。
大厨用天然香草烟熏全鸡。
慢烤Keep到鸡肉Juicy,食落又有独特烟熏香。

青口煮意大利珍珠面 独特弹牙口感
海鲜类则推荐呢道青口及钻石蚬配珍珠面。高质贝类轻轻一煮已经够鲜甜,配上古老时代已出现嘅意大利面—珍珠面,令精华更易渗入粒粒面之间,有咬劲之馀仲有种独特弹牙口感,唔少外国人都会用嚟煮炖饭或海鲜汤㗎!
煮制青口时加入白酒更香。
骤眼睇以为系意大利饭,其实系有特别口感嘅珍珠面。

少女心爆发 焗朱古力夹心棉花糖
甜品同样系外国Size,相当够份量。呢道焗朱古力夹心棉花糖好有少女心,棉花糖表层焗至微焦微脆,内馅软绵绵加埋浓郁朱古力酱,好啱情侣闺蜜影相同Share。
𢳂开内馅,即Feel到软绵绵质感。

全城急CALL 爆正自助餐Cafe Lantau
嚟五星酒店当然会想食自助餐,呢度有主打Buffet 嘅Cafe Lantau。环境同样走外国风,但对比Sunset Grill 有种更简约轻松嘅感觉。最欣赏呢度每张枱之间距离宽敞,进餐倾计更有隐私感;走道空间同自助餐区都好阔,行出行入拎嘢食都唔会撞嚟撞去,成个用餐过程都好舒服,好啱家庭客带埋小朋友食自助餐。
设计简约轻松,三五知己仲可以拣高凳位边食边饮吓酒。
座位距离宽敞,行出行入都好方便。

超丰富冰镇海鲜 多个Live Station 即煮料理
自助餐必食嘅生蚝丶龙虾丶蟹脚丶扇贝等冰镇海鲜都有齐之馀,同场仲有好多Live Station 如即制芝士意大利饭丶和牛串烧丶法式可丽饼等,食落新鲜滚热辣特别好味。
冰镇海鲜有齐生蚝丶龙虾丶蟹脚丶扇贝等。

超巨巴马臣芝士 即捞白兰地蘑菇意大利饭
先赢个气势嘅超巨巴马臣芝士即捞意大利饭,单睇咁大个芝士已经极吸引!倒入白兰地蘑菇意大利饭边捞边闻到芝士香~Creamy 意大利饭嘅浓郁芝士味夹杂菌香,後续又有淡淡白兰地酒解腻啱啱好,边个话食Buffet 拣饭类会蚀㗎?
边捞边闻到芝士香,愈等愈想食。
拉丝芝士包住Creamy 意大利饭。

即烧串烧 无限食Akaushi和牛
串烧Live Station 离远已闻到好香!因为呢度唔系用普通牛肉,而系日本产美国和牛Akaushi,系日本熊本赤色和牛牛种,布满丰富大理石花纹,食落充满油脂香,厚切方法亦保留到和牛口感。
即烧串烧劲有火喉。
厚切方法,食到油脂香又有咬口。
 
脆卜卜原只烧猪  + 招牌担担面 
平时可以有成只烧猪食嘅机会唔多,呢度就有原只烧猪,外皮炸得超脆。而面档有多款面类选择,鱼蛋丶牛丸丶牛腩等配料轮流上场。必食即煮担担面,面质够滑又挂汤,汤底够浓郁同花生香,系我个人好锺意嘅担担面汤底。大厨私心建议一定要落两滴花椒油吊味,微辣味道最有担担面神髓。
面档有多款面类丶配料选择。
担担面汤底够浓郁同花生香。

自家制蛋糕 甜品师即制可丽饼
甜品方面除咗有一系列自家制蛋糕甜点外,亦有Live Station 即制法式可丽饼。甜品师喺新鲜即制嘅可丽饼上,淋上橙酒同焦糖煮至可丽饼完全吸收软绵,味道酸酸甜甜。
有多款自家制蛋糕同甜点。
甜品师即制法式可丽饼。
放上新鲜水果点缀就食得喇~

多款独创菜式 设露台房中菜厅YUE
酒店内仲有高质中菜YUE,环境走雅致风格,一家大细或宴客都好啱。中菜由多年私房菜经验锺志强师傅主理,师傅擅於将传统中菜加入新元素,独创菜式冲撃味蕾~
环境典雅,好啱宴请亲朋。
餐厅内设多间VIP房,当中仲有露台海景房,可以举行简单婚礼。

尽显刀功 自创独一无二豆腐花
呢道姜味绣球就系师傅自创菜式之一,一改以往豆腐花嘅呈现方式,利用刀功将豆腐切至极薄成绣球花,再倒入姜汁丶洒上黄糖。味道明明系传统豆腐花,口感却细腻融化。
师傅亲展刀功,将豆腐切成花。
倒入姜汁黄糖,变成新颖豆腐花。

大吉大利 柚子虾饺
中菜厅仲有多款点心丶小菜,点心方面就有可爱桔仔造型—柚子虾饺,外皮以橙汁制成;内馅则用柚子肉丶柚子皮同柚子蜜等混入虾肉,入口有种柚子清甜微涩味,相当特别。
虾饺有柚子嘅清甜微涩味。

双重口感 花雕蛋白蒸龙虾球
中菜擅於演绎龙虾,师傅今次就以蛋白突显龙虾肉嘅嫩滑。将龙虾肉丶花雕酒撞入蛋白蒸熟,再铺上其馀龙虾肉同鱼子酱,一啖滑溜龙虾汁蛋白;一啖弹牙龙虾肉轮流食最正。
滑溜蛋白加埋龙虾肉,轮流食感受双重口感。

原只炸子鸡起皮配黑松露 薄脆+啖啖肉
想一试师傅手艺,仲有呢道黑松露手撕鸡。手撕鸡望落简单其实内有乾坤,因为师傅将原只炸子鸡起皮再手撕鸡肉,食客可以食到薄脆鸡皮之馀,又Enjoy 到手撕鸡啖啖肉嘅过瘾。
要将炸子鸡原只起皮,相当考工夫。

Lobby Lounge 极有质感座地3层下午茶 
郊游後想有个地方坐吓High tea,Sheraton酒店有Lobby Lounge 提供3层下午茶。最特别嘅地方系下午茶层架唔系放喺枱面,而系一个座地高脚3层架,令枱面有更多空间,想一边食一边睇吓书丶玩吓电话都舒服得多。
下午茶有多款咸点同甜点,从上至下慢慢食。
甜品控可以试埋多款自家制蛋糕。
有件装或原个蛋糕拣。

五星级Staycation 都可以郊游
如果想去东涌郊游都唔使自己Plan 行程咁麻烦~Sheraton 酒店就有两日一夜Staycation+蜂园导赏团Package,真正可以Hea 住嚟叹酒店同亲亲大自然。想知详情就去酒店官网睇下啦!

香港东涌世茂喜来登酒店
* 资料由客户提供