名煌金閣

真係好耐都冇晚餐食中菜⋯今次嚟到長沙灣呢間中菜餐廳試下～佢面積都幾大，每張檯都好大坐得好舒適。不過我哋坐咗入房，就冇咁闊落。呢度嘅定價算係中中等等，唔特別貴，亦冇話好抵。款式選擇多，由各款海鮮、小菜、煲類，到甜品糖水都有。首先真係要推薦呢個手撕雞！應該都係佢哋比較招牌嘅菜色～《麻辣手撕雞（半隻）》$148係勁大碟！就咁睇個價可能會覺得有啲吊高咗，但其實佢都唔hea, 有好多配料。調味恰到好處，麻辣唔會太重，慢慢累積會開始辣，但唔會好辛苦好麻。 唔太食辣嘅朋友都應該食到。雞肉口感都算軟嫰但我稍嫌佢未夠香同滑。可能因為佢係冇汁，所以整體都會偏乾少少。青瓜大大條，清爽味道剛好中和番雞嘅麻辣。仲有扎肉做配料，都幾出奇～而且份量唔少。《生啫大澳蝦醬唐生菜煲》$108之後講下呢個生菜煲～都幾浮誇！因為佢係臨上檯先喺個熱煲內灑水同放菜炒，炸一聲～～～ 勁多水氣令到個菜上檯時係超熱，亦保持到菜嘅爽口。個蝦醬汁掛咗上菜就啱啱好，就咁食會太鹹。個汁混有肉碎，而且食完啲菜都淨好多汁。如果加碗飯送埋佢會勁正！《砵酒焗桶蠔》$188呢個係令我頗失望嘅菜色⋯事慣我都幾鍾意食桶蠔但佢呢個製法就好似用桶蠔嚟整蚵仔煎咁——— 外層係半煙韌又帶啲啫喱感嘅粉漿，但做到腍又唔係、脆又唔係成個口感變到非常差同奇怪酸甜嘅醬汁又唔太夾個桶蠔，反而仲帶出咁蠔嘅腥味。我覺得係嘥咗隻蠔⋯可能揀酥炸會好好多。$188整得唔好食而且都係得5隻，係好令人失望嘅一道菜。《生炆斑頭腩》$148呢個算係不過不失嘅一道～魚腩份量唔算多，但勝在超熱上檯，配料亦多。最後講一講都算提升番我心情嘅甜品～《生磨蛋白杏仁茶 》＄28杏仁茶中混有頗多嘅蛋白塊，蛋白味濃，而杏仁茶嘅杏仁味都好重同味道天然又唔會好甜，淡淡地更帶出杏仁香。連我個唔太鍾意杏霜嘅朋友都覺得唔錯！杏仁茶薄身好水但味道好足。如果真係要嫌，就純粹係佢蛋白味真係好重😂好似食緊烚蛋咁。但其實真係幾好味嘅杏仁茶啦～整體而言我覺得係中中挺挺嘅中菜，勝在坐得闊落舒服，一試無妨。當中手撕雞同杏仁茶都算比較出色～如果嚟食都推薦嗌呢兩樣但上菜真係比較慢，當中個魚腩等咗差唔多半個鐘。希望可以改善！ …查看更多

受疫情影響，外出用餐的次數也越來越少，喜見疫情有所舒緩，就與朋友一起四出覓食。朋友說佢公司附近開了一間新的中菜餐館想試試，就一於打鐵趁熱試試。店內環境簡約光猛，有卡位，也有圓檯，迎合二人食飯或是三五知己或家庭敍會的需要。 餐點選擇多樣化，而價錢也相宜。 麻辣手撕雞(半隻)店員推介麻辣手撕雞，果然沒有介紹錯。麻辣手撕雞份量非常大，麻辣味濃厚兼好有層次，麻香辣味充足，我喜好食辣，所以覺得可口非常，而唔食得辣的朋友就覺得略為刺激。但由於實在美味，所以整碟手撕雞也清盆。雞肉滑嫩帶爽，配合麻辣味的確不錯。 特色鮮沙薑煎雞朋友喜歡食雞，所以也叫了一客沙薑煎雞。沙薑煎雞上枱熱辣辣，雞肉滑嫩兼入晒沙薑味，食到雞的鮮味。但由於麻辣手撕雞的味道比較濃烈，所以沙薑煎雞比較清淡，適合唔食得辣的朋友。 老陳皮古法蒸斑頭腩估唔到蒸斑頭腩的份量也大，斑頭腩新鮮，蒸魚的火喉控制得好好，斑頭腩入口滑嫩爽口，魚味鮮甜，配合味道調配得剛好的蒸魚豉油，實在推介。 馬拉盞菜心馬拉盞菜心意想不到的有鑊氣，馬拉盞味道帶鹹鮮，味道濃厚，配上本身清淡的菜芯，估唔到咁夾。菜芯好爽脆，沒有渣。 生磨蛋白杏仁茶要做一碗有水準的杏仁茶一點也不易，生磨的杏仁茶味道是特別香濃，不會帶苦澀怪味，口感也特別細滑，飯後吃番碗熱辣辣的生磨蛋白杏仁茶，感覺非常滋潤。…查看更多