螢壽司

在炮台山工作的我, 銅鑼灣是我常去食飯的其中一個熱門地區, 放工搭電車過去銅鑼灣最寫意, 早前去了螢壽司日本料理食晚飯.由於我不食魚生, 所以刺身一律不用預我, 我就選了其他啱自己的食品.串燒是其中我愛食的類型.串燒選擇也有不少, 最後揀了豚肉蘆筍, 牛舌和雞翼.豚肉蘆筍, 豚肉夠薄身, 所以夠腍身, 捲着蘆筍, 多了一份清新, 入口無咁單調.牛舌幾有咬口, 而鹽能帶出牛舌的味道, 所以更好味.雞翼外層燒到脆身, 略為硬了一點, 內裡的雞肉尚算嫩滑.接着, 點了雜綿天婦羅, 包括蝦, 南瓜, 茄子, 冬菇, 蕃薯.天婦羅炸粉夠薄身, 又夠鬆化. 不會蓋去了材料的口感.蝦幾大隻, 夠爽口. 各款蔬菜也幾甜.即使食了咁多天婦羅, 不會覺得個口好油.花膠雞絲濃湯手打烏冬.這是用個石鍋上枱, 所以能夠保持較長的熱度, 對於鍾意食熱野的我來講重要一環.剛才一口氣食了較濃味的串燒和天婦羅, 飲一口清甜的湯和較清的雞絲烏冬, 可以起中和作用.當中的材料相當豐富, 有雞絲, 花膠, 溏心蛋, 素翅, 木耳絲等…雞絲幾嫩滑, 而花膠本身較為淡味, 但兩者也吸收晒湯的精華, 非常好味.烏冬幾煙煙韌韌, 有點口感. 海膽芝士釀蟹蓋.上枱時已香味撲鼻.蟹蓋面放滿了芝士.內裡有帶子粒, 蟹柳絲, 入口有淡淡的芝士味, 全部都好夾, 海膽再濃一點更吸引. …查看更多

這夜來到銅鑼灣，走上了東角某專門店買完相機配件後，就在附近找找吃吧。來到駱克道面對著街上的傳單阿哥阿姐的你一言我一句，最後走上了螢壽司。甫開電梯門，大大的招牌與放了數個清酒桶的玄關，格局有感是一貫的樓上食店的設計。走進店內，壽司吧枱、放滿日本清樽作裝飾的牆身，也添上了幾份居酒屋的氣息。除了主餐牌外，晚市還有二人餐以供選擇，還有黑板上的廚師推介，有各色的刺身、盛合，另一端的則有燒物等熟食…螢特選刺身盛 $428想吃刺身但看著餐牌又無從入手，還好有黑板上廚師推介的螢特選刺身盛。我們選了馬糞海膽，配上牡丹蝦、油甘魚、間八及螢光魷魚，雖然款式在餐牌裡大概也找得到，然而單點的話相同價錢大概只能點選前三款吧。馬糞海膽入口幼滑，甘甜美味。油甘魚的清爽與間八的甘香，同樣吃出食材的新鮮。至於肥厚的牡丹蝦黏度十足，爽滑彈牙，不錯吃。若然沒將蝦丹蝦一開二的話，口感應該更見回味~蝦頭湯 $10 x 2牡丹蝦的美味，蝦頭也是不能錯過！正當我們還在計算如何吃多$20才能享用信用卡優惠之際，店員說可加錢將蝦頭弄成揚物或麵豉湯，$10一碗湯其實也是不錯之選。蝦頭湯拿起來已覺鮮香撲鼻。麵豉湯盡吸蝦頭的蝦膏精華，每一口均鮮甜滿載！鹽燒厚切牛舌 $48吃完刺身，來一點熱呼呼的串燒。燒得外脆內腍的厚切牛舌肉味豐膄，嚼勁教人滿足！豚肉露筍 $32外層豚肉燒至金黃香脆，伴以濕潤的露筍，味道層次豐富，佐酒一流！鹽燒手羽 $22雞皮燒至不感油膩，雞肉也見嫩滑，添了點檸檬汁後，滋味之中帶點清香。特色燒廣島蠔 $72/2隻也點了廚師推介的燒廣島蠔，伴以蔥花與蒜香同燒的廣島蠔肉身飽滿，整顆入口盡是鮮甜惹味，好吃！花膠雞絲濃湯手打烏冬 $128最後也嚐了手打烏冬，選的是女士恩物的花膠雞絲。手打烏冬質感爽滑，雖然浸了一段時間仍見彈牙，不錯。還有將仿翅(應不會是真翅吧？)與烏冬及木耳同吃，那份清爽也教人回味。花膠滿是膠原的黏稠，吃多幾片會帥氣了點嗎？(笑)烏冬以木托盤與燒鍋盛載，吃至最後仍覺溫暖，窩心十足。日本料理是否出色，熟食必然是最能看出高低的一環。這裡的串燒燒物甚具水準，若然因為其名字而只吃壽司刺身，只能說走寶了。…查看更多

朋友介紹我一起到這間餐廳，原因是她吃過這大廈的大部份餐廳，就差6樓這間日本菜一直未有機會試，所以就相約一起來吃晚飯。環境上比較一般日本餐廳狹窄了些，但就更方便店員隨傳隨到。餐牌上的選擇很多，畢竟同區都有很多同類餐廳，多元化是其中一個取勝的優點。首先點了每人一隻生蠔，想不到美國蠔都這般巨型！厚身的生蠔十分爽口，海水味不重但充滿鹹鮮。特上壽司拼盤有吞拿魚細卷、三文魚、牡丹蝦、鱆紅魚、赤貝、魷魚、吞拿魚、油甘魚壽司，還有海膽、蔥拖羅腩蓉、三文魚籽軍艦，都頗為豐富。不過吞拿魚及拖羅的味道都不夠突出，欠缺脂香。而值得一讚的是軍艦的紫菜依然保持香脆。吃完後，蝦頭除了生食，還可以選擇加＄10炸或熬湯。燒過的蠔就沒有生的大隻了，燒得比較乾身，但上面蒜粒很多，非常香口。牛舌果然是非常厚身的！十分多汁，咬下去會濺出油花，不過鹽燒實在放得太多鹽，鹹得過份。而豚肉露荀則非常驚喜。少有露荀得燒到造般多汁，一般的都燒得乾柴般，但這個咬下還會溢出汁液，燒的時侯將水份完全鎖住。雞皮一般都不會吃，但這個將雞皮緊緊地包裹着大蝦，雞皮燒得十分香脆，而且完全沒有了平日油膩的口感，油份已經完全逼出，所以吃起上來都不會太罪惡，加上大蝦爽口彈牙的口感，兩者原來這麼般配！最期待的就是蒲燒鰻魚朴葉飯，容器本身就十分精緻，充滿日本風情。鰻魚十分厚肉，燒得嫩滑，可惜燒汁味道不夠濃，扣了分，飯粒吸盡了朴葉的香氣，但朴葉的味道未必人人喜歡喔！最後有這個抵食的花膠魚翅烏冬，聽起來就知道fusion吧！其實吃下去一樣，花膠雞絲紋煮後成茨汁，稠稠的茨汁拌烏冬，個人覺得茨汁口感一般，味道亦較普通。不過花膠實在非常非常非常足料，至少有上20條，而且魚翅都一大撮的。用上這麼矜貴的食材，份量又慷慨，但價錢亦不貴，算是抵食的一道。…查看更多

這晚約了我家那位晚飯，因為他剛巧有事到銅鑼灣買東西 (´・ω・｀)但其實事先並沒有決定好要吃哪一家~所以走過京都廣場時碰到一堆派傳單的就拿了來看看然後看到一家日本餐廳就想～好像回香港後只吃過拉麵而已時間尚早，所以不用等位便有得入座了。這裡有可以看到壽司師傅的吧桌位置，不過拿著一堆東西還是坐普通的桌子就好雖然店子小小一家～但也用了不少日本擺設和酒去裝飾呢既然是久違吃的本料理，刺身應該是不可或缺 ?!螢特選刺身盛 ($428) 分別是馬糞海膽、牡丹蝦、螢光魷魚、油甘魚、間八油甘魚很肥美，口感亦很彈牙；間八的口感則帶點脆感，鮮味十足螢光魷魚平時都是醬油漬的吃法，原來這種刺身吃法也不錯海膽的味道則是濃郁且帶點甜味。最後的蝦肉質頗爽口彈牙，而且蝦頭還可以製作成湯或是拿去炸 (・ω・｀)我們選了煮成 蝦頭湯 ($10) 湯底其實是麵豉湯底吧~ヾ(○゜▽゜○)加上蝦頭讓整個湯底的味道昇華，加添了一份鮮味~另外湯內還有豆腐和海帶鹽燒厚切牛舌 ($48)豐富的肉汁也很有咬口～鹽味更帶出牛舌本身獨特的味道豚肉露筍 ($32) & 鹽燒手羽 ($22)豚肉味道較濃，配上鮮甜的露筍讓味道剛剛好 ( ´∀｀)相較之下雞翼反正燒得比較乾身，雖然雞肉還算嫩滑~但總感覺還是缺了少許特色焗廣島蠔 ($72/2隻) 看到牆上的黑板上有這個推介就試著點喔雖然沒有芝士，但蒜蓉和葱粒已經足以調味花膠雞絲濃湯手打烏冬 ($128)因為花膠的關係，讓湯底更具黏性~而且花膠的數量也不算少呢烏冬是較為扁身的那種 (･∀･) 但吃落也算彈牙～～配上充滿骨膠原的湯更為順口除了雞絲外還有素翅，是一個很豐富的烏冬!!另外還有我喜歡吃的糖心蛋～很入口味的甜甜醬油味。…查看更多

全世界經濟不好景，香港食肆難做，香港人要振興香港，多Ｄ外出吃飯，購物😁。今天就已身行動，約了好友去吃日本料理，朋友介紹價錢經濟，食物新鮮美味😘。油甘魚的肉質較軟身，肉身油分高，啖啖充滿魚油香氣。間八和油甘魚的肉質不同，間八偏結實。牡丹蝦相當新鮮大隻☺， 晶瑩通透，美味彈牙，蝦頭還有很多蝦膏，店員提議加多10元，可拎蝦頭去煮味噌湯。螢魷魚小小的好cute, 一啖一口連內臟吃完全沒有腥味，只有魷魚濃郁鮮味👍。海胆是北海道產的馬冀海胆，鮮甜無比😋👍。鹽燒厚切牛舌，豚肉蘆筍， 鹽燒手羽先各款燒得不錯，非常可口😋。燒廣島蠔是用蒜蓉來燒的， 體積雖然細小，但味鮮味😃。最後是中日合璧的花膠雞絲濃湯手打烏冬，烏冬彈牙不在話下，花膠的骨膠原非常之濃，幾乎膠着口☺，還有素翅😍飽餐一頓回家要多謝好友的好介紹😄…查看更多

忙碌的生活總要有時間偷閒一下、雖然今天星期一剛剛放完Ｗｅｅｋｅｎｄ、但堆積的工作令我透不過氣、相約好姐妹亞Ｌ來到銅鑼灣一間日式料理店、享受一頓豐富的日本菜放鬆、放鬆。装潢並不華麗有平實感覺。環顧牆邊放滿多款日本酒、可惜明天還有早會、要不然喝過痛快。先來特選剌身盛、全由厨師發辨、將即日鮮送到我面前。嘩啦啦。。。馬糞海膽、甜蝦、油甘魚、墨魚和間八、全是我喜愛的。入口即溶的馬糞海膽、有著濃郁、歴久不散的味道。甜蝦頂呱呱、色澤晶瑩透徹、肉質漿口、有感皮膚充滿了彈性。蝦頭的蝦膏濃稠、忘不了。油甘魚油脂豐腴、啖啖脂香。我平時不太喜愛食墨魚、但今日改觀了。入口爆發了墨汁的香濃、滋味。間八肉質頗為結實、有嚼口。吃過刺身、再點串燒三味、有鹽燒厚切牛舌、豚肉露筍和鹽燒手羽。整體不過不失、沒有太大驚喜。今日推介是蒜茸燒廣島蠔、雖然細小但勝在重口味、蒜茸並沒有嗆味還提升了鮮甜味。再來一道中日Ｆｕｓｉｏｎ菜、花膠雞絲濃湯手打烏冬。湯底果然雞味濃郁、鮮甜好味。絲絲的素翅幾可亂真有嚼口。花膠雖不是上等貨色、考慮到價錢己相當不錯。食過美味的一頓晚餐、己充滿能量、明天又重新開始新的一天了。…查看更多

又到高水準日本料理雲集既銅鑼灣開飯！今次選左 Open Rice 食評唔既螢壽司開飯。同朋友兩人坐低，一貫日式簡單既裝修，壽司師傅魚生櫃放滿左魚生，種類唔少，調魚見佢都好幾款。餐牌食物種類唔少，前菜、沙律、刺身、壽司卷物、串燒、爐端燒、炸、飯、鍋、烏冬、天婦羅、甜品等等等等等等………應有盡有，感覺比一般日本料理更多選擇，可恨得兩丁友，大食極有限…有選擇困難症者注意！前菜選左…小食併盤，咩都試下。有三款，冰糖漬、龍蝦沙律、明太子沙律！其中以冰糖漬最特別，食既係三文魚頭部份，甜甜酸酸地、爽爽地、韌韌地，口感好得別。龍蝦沙律加入左芥末，香而不辣。明太子沙律切成方塊，伴以蛋黃醬，甚為開胃。再黎就係刺身，點左琵琶蝦、左口魚、深海池魚、油甘魚！琵琶蝦雖爽口，但係小弟都係鐘意牡丹蝦既甜味。左口魚一向淡口，但仍食出其淡淡鮮味。深海池魚........有骨 ..........O 咀，都好少遇到有，好彩食到呢度都满意，如果唔係要發難！油甘魚勁厚切，一向鐘意食油甘魚既魚香味，佢仲要厚切…極度享受，全個併盤最正。再黎三款壽司，牡丹蝦放上蝦籽，牡丹蝦本身新鮮的話都無得點輸，火炙的鯛壽司就一般，鯛魚本身唔係好夠鮮味，上面放左一小片青檸，搶埋D味添。海胆帶子壽司，海胆同帶子都好正，好鮮味，兼且炙過，好鬼香。食剩牡丹蝦頭佢可以炸或湯上，一般都會炸，咁岩病病地，都係湯上，不過佢用既麵鼓湯就好濃郁，反而成為重點。明太子燒杏鮑菇，明太子味唔好出，皆因比排山倒海厚厚既蛋黃醬蓋過，好彩我係蛋黃醬人，照單全收，兼且杏鮑菇爽甜，唔錯。厚燒牛舌夠厚肉，有口感，外層燒得香脆，鹽及黑椒調味岩岩好… 花膠雞絲濃湯手打烏冬，用上花膠，算係幾Fusion下。一上桌，湯既香味撲鼻，雖然已經係飽左八成，都流一流口水。要讚既係佢用既花膠，唔係求求其其，份量足，兼且係厚身彈牙花膠，驚喜。鐵板蒜香豆腐，外表平平無奇，不過好味，豆腐外表微微香脆，入面嫩滑，配菜洋蔥油左少少，但係醬汁惹味。最後整杯濃味既士多啤梨茶，為呢餐美食劃上完美句號。整體上道道菜都有水準，甚至有驚喜，用不同食材同烹煮手法，幾Fusion 又有創意。座位初入座舒適，係之後人多就有少少迫，枱同枱間距唔夠，不過服務非常勤力…兼且待應都好熟餐牌食物。大飲大食，開懷既一餐…價錢實在合理。…查看更多

其實唔特別想食壽司，不過上到黎見個場幾靚，又唔洗等位，於是就同個fd坐低試下~打開menu，見到原來壽司以外都有好多選擇，好似有唔少特色串燒，比我地揭揭下，仲發現有兩款限量供應嘅手打烏冬，於是毫不猶豫咁決定一人order一碗再share食！首先係特選蟹味噌濃湯手打烏冬，飲一啖湯已有好濃郁味，阿廚話係用左兩隻膏蟹熬湯兩粒鐘，之後整烏冬時再加入一隻，認真足料，只賣$118，算係成本價~另一款係花膠雞絲濃湯手打烏冬，聽落好補身，真係估佢唔到日本餐廳竟然有花膠食，原來個濃湯每日用8粒鐘黎熬，花膠咬落好彈牙，只售$128，都係超值~所以即使唔食刺身壽司嘅朋友，都可以黎試下手打拉麵~…查看更多

駱克道一帶非常多食肆，尤其係京都廣場！樓上有好多人派傳單爭生意，今晚就揀左螢壽司試下。 餐廳主要以黑色做主調，更設有vip房，人多的話不妨訂間房。我坐既位對正刺身壽司吧，個個師傅都打晒呔執得好整齊！另外店內有股不知名既香氣，令人食欲大增。 首先黎個刺身拼盤-有三文魚、帶子、甜蝦、拖羅同𩶘魚。 帶子真係好正 又好大粒！一粒已經填滿我個口！好新鮮而且有入口即溶既感覺 三文魚肥美，魚油甘香。𩶘魚就爽口彈牙，油份充足！ 花膠雞絲濃湯手打烏冬係比較創新既菜色。首先烏冬有彈性好有口感，唔會好淋，仲有花膠同雞肉熬成既鮮美湯底，真材實料！素翅本身冇味，但爽脆既素翅正好吸收濃濃既湯汁。溏心蛋一絕，生熟程度掌握得好，蛋味濃。 最後點左個朴葉鰻魚飯，飯係即點即蒸所以要等耐少少～一上碟已經聞到淡淡既朴葉清香，原來就係充斥店內既香味！一大塊朴葉覆蓋住鰻魚同飯，所有香味滲晒入去。 鰻魚肉厚，配上自家饅魚汁撈白飯。白飯就煮得剛剛好，軟硬適中，朴葉香飽滿，食完好滿足  食飯期間聽到店員細心留意每檯食飯既速度配合上菜時間，相當細心。臨走發現𨋢口貼左好多老闆同方力申合照，可能食得多鰻魚飯游水都快啲 LoL…查看更多

收工和朋友們吃飯, 不想太迫太槽, 想舒舒服服, 傾計慢慢食, 女友提議到這間樓上日本菜.....來到這裏, 環境的確唔錯...肚子餓餓, 就立即同朋友點左幾味壽司剌身來食...先來一個<特上刺身併盤>併盤有牡丹蝦、三文魚、中拖羅、赤貝、油甘魚、不得不提呢個牡丹蝦...口感黏黏, 真係好好好甜, 牡丹蝦之大, 絕對可以佔去整個口, 令人一試難忘~~~而海膽也很鮮甜, 絕無臭味.....三文魚、中拖羅則厚切新鮮, 油脂平均~~然後再來一個<上壽司拼盤>人多...只能吃帆立貝和鰻魚....吃帆立貝時....看到帆立貝切成跟壽司形狀一樣,相信係為左令帆立貝不會在壽司飯上東倒西歪, 帆立貝超厚....我在想如果無切過的話....應該有手心咁大.......咁鮮甜...如果可以原隻食...就正爆啦......至於鰻魚....也不錯...如果鰻魚汁多些會更好嚐鮮過後....開始吃一點日本料理了, 剛剛<特上刺身併盤>的牡丹蝦吃剩的牡丹蝦頭, 原來加10元.. 可以做一個湯或炸蝦頭....我們當然食盡佢...連蝦頭都不放過....料理來了, 先有<鹽燒牛舌><芝士燒大菌><士多啤利汁鐡板鵝肝><汁燒雞肉><蒲燒鰻魚朴葉飯><燒蠔4 味, 芝士明太子, 黑松露,海膽,蒜香><花膠雞絲濃湯手打烏冬>…查看更多

相約朋友飯聚，目的地又是銅鑼灣。午飯時段試過螢壽司味道不錯，如是者今晚落腳點就在這裡 ~是日豐富晚餐菜式~特上刺身拼盤 (HK$428.00)黑豚肉露筍　(HK$46.00)燒蠔 (HK$34/隻)芝士燒大菌 (HK$38.00)士多啤利汁鐡板鵝肝 (HK$108.00)汁燒雞肉 (HK$16.00)蒲燒鰻魚朴葉飯 (HK$108.00)花膠雞絲濃湯手打烏冬 (HK$118.00)特上刺身拼盤 吞拿魚腩、三文魚腩、海膽、牡丹蝦、赤貝及魷魚三文魚腩光澤明亮,用手指按一下, 凹陷處立刻彈回來, 證明十分新鮮 ~吞拿魚最好食就是拖羅(魚腩部位), 當然拖羅也有分很多段,其價錢亦會不同。可惜剛剛入門食, 否則可以評論一下 最出色還是牡丹蝦, 咬下一啖肉在口中, 你會感受到黏口, 肉質綿密的, 味道非常鮮甜。肉質爽滑而且彈牙, 好味程度太高,根本不忍心要分享出去 剩下鮮蝦頭, 可以有3種方法處理: 1)生食; 2)香炸食法; 3) 面豉湯食法 (PS:後兩者要加$10)我分到一碗面豉湯飲XD, 正常面豉湯味, 但蝦味唔算太出 ~黑豚肉露筍 黑豚肉露筍至從吃過黑豚肉露筍串燒後, 每次吃串燒也必點的菜式。多汁的蘆筍被透薄的黑豚肉片包裹著, 豚肉的油脂加上蘆筍的新鮮多汁, 作為開胃菜十分合適 ~４款燒蠔: (左至右:芝士明太子, 黑松露,海膽,蒜香) 本身對蠔不大討好，待應親切提議可以試試蒜香味，因為會較易入口，果然，因為香濃的蒜香味大幅蓋過蠔的海水味，怕海水味的也可以一嚐蠔的滋味 ~芝士燒大菌 大菌面上鋪滿芝士，對芝士迷來說視覺無語論比～大菌香甜多汁，配合芝士濃郁的口感，又一必食菜式 ～士多啤利汁鐡板鵝肝 鵝肝多士食得多，有士多啤利汁的還是第一次吃。鵝肝經過半煎炸方式整熟，配上香脆法式多士，底部擦上士多啤利汁，香濃鵝肝味中帶點甜味，味蕾受到新鮮配塔的沖擊 ～汁燒雞肉 雞肉面擦上燒汁，光澤鮮明，雞肉滑而鬆化，輕食之選 ～蒲燒鰻魚朴葉飯 鰻魚飯以竹器具盛載，飯的底部放上朴葉，配上一條蒲燒熳魚。飯筒最愛 ～花膠雞絲濃湯手打烏冬 未夠飽，再點多了一個花膠雞絲濃湯手打烏冬，材料非常足：花膠、溫泉蛋、素魚翅、花膠、雞肉、粟米,木耳。朋友本身都有少少飽，但聞到它的香味也忍不住要試一試。湯十分濃郁，因為花膠的關係，質地就像 "羹"一般黏口，配上手打烏冬的香滑， 黏口與香滑的極端組合，令人一試難忘 ～輕鬆的一餐美味晚餐，銅鑼灣又有多一處聚腳點~…查看更多

因近排忙於為家中細細搜購旅行衣物，所以很多時午膳時間也會到銅鑼灣先用膳，後購物，善用所有時間 =P。螢壽司開業於京都大廈內，店內格局四正，四週牆邊都掛有富和風特色的掛畫或裝飾。座處一旁設了一酒架，放了不少日產佳釀，望見余市酒品，更勾起即將到訪北海道的期待。午市有一系列定食供應，價錢由 $69 至百餘元不等。每客定食皆含沙律、麵豉湯、蒸蛋及飲品。沙律以新鮮生菜為主，附以蕃茄粟米，並澆上芥末醋汁，食感清新中又帶微微刺激，是合適的冷盤前菜。麵豉湯口味比預期甜一點，海帶量豐富，當中的少量葱粒是平實味道中的惹味之源。至於蒸蛋，蛋香滑度中等，餸料有魚蛋（片）、蟹柳、雞肉、銀杏等等，頗為豐富。同枱好友鍾愛刺身，一般定食選材實在未能滿足其要求，在多番商討下，縱使筆者覺得在有定食選擇的前提之下，散點一份刺身盛實在有點不抵，最後還是乖乖就範，要了一份特上刺身拼盤。拼盤內含六款刺身，每款兩件，包括金目鯛、三文魚腩、呑拿魚腩、赤貝、海膽及牡丹蝦。就賣相而言，擺盤只屬一般，刺身在敞闊的圓碟下，份量亦顯得有點少。金目鯛外層經輕輕燒過，魚油被充份迫出，味道顯得格外油潤甘香。三文魚腩用上的部分固然比一般赤身肥美味豐，建議進一步去除面上的魚皮，賣相應可更上一層樓。當然，要享受再高一層次的甘香滿足感，呑拿魚腩絶對是不二之選。將厚厚一塊呑拿魚腩刺身置於口中，脂香慢慢溶於口中，幸福感滿瀉！吃赤貝最怕韌身及帶有不新鮮的腥感，這兩片赤貝刺身則絶無此弊處，反之而言，刺身食感甚爽口，輕盈的鮮甜味道亦很突出。海膽刺身是最濃甜之選，建議最後品嚐。牡丹蝦是筆者至愛刺身之一，論其鮮甜味道及爽滑口感實在無從挑剔，更驚喜的是蝦頭亦沒有浪費，餐廳可安排放湯或炸香後製。筆者選了炸香製法，簡單以椒鹽提味，脆香感十足，值得推介！ 定食跟上的主食是西京燒銀鱈魚，鱈魚外層燒至微微焦香，魚肉白滑，魚香合預期。另一散點主食花膠雞絲濃湯手打烏冬，花膠選材薄身細隻，膠質不重。雞絲嫩度不俗，但雞香不算濃。烏冬口感滑身，質感稍腍，伴上的湯汁與食材以淡味爽口為主，整體評分一般。整體而言，筆者頗滿意刺身的質素，但擺盤賣相可改善，定價亦略為進取。至於午市定食與散點的烏冬，水準屬普遍，性價比合理。…查看更多

與契妹好友MH兄新相識，真係有種相逢恨晚o既感覺，皆因大家都愛食！MH兄可稱得上為銅鑼灣怪，區內每逢有吸引o既新餐店上場都會好快去試，奈何因冇影相或寫食評o既習慣，情報都要等見面靠佢口述先會知。初次見面，二人大談食經，佢極力推介仍在試業o既「螢壽司」，聽到小肥即場約契妹去食，仲好客氣地借咗張九折優惠咭俾我地添！ 「螢壽司」位於銅鑼灣核心地段，四周不乏食肆，喺眾多日本料理中究竟如何能夠透出新店o既螢光，突圍而出呢？！始終同MH兄暫時都只係有一面之緣，XO仔都係抱著好奇o既心態去探索一下 。踏出升降機第一刻先被木屏風頂上o既燈籠吸引，彷彿每個籠入面都躲有螢火蟲喺度閃出燈火 。正門右邊牆身掛滿願望牌，令人充滿希望 。食店差不多一眼可以望哂，感覺都好開揚，以木為主o既裝修亦覺簡潔通爽。大堂中央擺放有二至四人散座，木造o既枱櫈可隨意合拼成長枱，人多都冇問題。店子右手邊近窗位置其實有兩個四人卡位，當中角落頭嗰張都幾隱蔽吓。卡位頭頂上吊有金光燈飾，唔知係咪特別為情侶食客而置呢？！店子名為「螢壽司」，當然唔會少咗個壽司吧啦！餐店仲有兩間私人房，冇窗嗰間可坐六至八人，最低消費為$2,800。有落地玻璃嗰間大房可坐十至十二人，最低消費為$3,800。除咗牆上幾幅和味極濃o既畫之外，餐店簡單地以日本娃娃、清酒、酒瓶、承酒o既器皿等作裝飾。架上擺放有一枝唔係好多地方有得賣o既「艷」，記得幾年前飲過一次已被迷倒 ，所以立刻向店員索取飲品牌，方才發現新店未領取到酒牌，現階段未能提供含酒精飲品，小肥唯有期待下次光臨再一嚐美酒。雖然冇酒飲，不過靚女姐姐都不忘推介兩款人氣飲品，見契妹揀飲巨峰味，XO仔就要咗杯清新香甜o既白桃味乳酸梳打。食物方面，我地先應姐姐仔介紹，叫咗兩款時令魚生黎試。 活瀨尿蝦壽司（$78/件）：師傅先將活生生o既瀨尿蝦煮熟咗先做壽司。長長o既瀨尿蝦面上已塗上薄薄o既甜醬，中間夾有一層厚厚o既蝦膏，第一口咬落會覺得有少少嚡口，質感未必人人接受到，不過連同生磨芥辣一齊食，味道都幾得意。 秋刀魚兩吃（$248/條）：每年秋季，肥肥家族都會盡情食用秋刀魚，既然靚女姐姐確認魚貨剛剛空運到，小肥當然係唔會放過啦，一於食齊刺身同壽司 ！冰面o既秋刀魚刺身美艷動人，紫紅色o既魚肉層次分明，有型又有款，入口更覺魚味香濃，油份充裕，軟滑得黎帶半分爽嫩，超 ！秋刀魚做成壽司更加係不得了，除咗可見其光滑o既外表，飯底中和咗魚油，整體更覺軟潤肥美 ！眼見厚厚o既餐牌有太多選擇，有選擇困難症o既我地就決定叫個二人套餐，再加一碗熱烏冬黎分。「螢極上二人套餐」售價$698，包有前菜三味、刺身或壽司拼盤、揚物、魚奶湯兩碗、串燒拼盤、豚角煮、雜錦天婦羅、士多啤梨鵝肝多士、生姜牛或豚石頭飯、及甜品，包羅萬有，聽落好豐富，食落仲知飽肚又抵食 ！套餐由三味前菜開始，左起分別為龍蝦沙律、明太子沙律、及三文魚唇。以青瓜墊底o既龍蝦沙律香嫩惹味。中間o既明太子沙律爽脆非常，濃味得黎一啲都唔咸，係三味中個人最鍾意o既一味。三文魚唇以迷你煲仔承載，滴骰趣緻。魚唇爽滑，其魚味雖重，但因有酸酸甜甜o既調味中和返，食落都幾醒胃。是日揚物為「雞肉櫻花蝦卷」，配酸汁食用。雞肉帶少少嚡口，但卷物炸得好夠鬆化，而且櫻花蝦一啲都唔硬，完全食唔到佢有殼 。接著上枱o既魚奶湯真係同個名一樣呈奶白色，熱辣辣之餘，湯面絕無油層，淨睇都已經知道唔係開粉溝水。魚湯濃味得黎好清，火候十足，而且一啲都唔腥，好暖胃。士多啤梨鵝肝多士每人一件，多士上o既鵝肝皮脆心軟 ，但底下o既士多啤梨乳酪就有少少怪怪，配搭其實都幾新穎健康，不過效果就麻麻，契妹建議簡單地換上士多啤梨果醬即可解決問題。正當我倆估計壽司拼盤會係主角，串燒每人最多都係一條時，姐姐仔即呈上合共五條o既串燒拼盤，即每人兩條半，都幾震撼 ！每人原隻燒蝦，成枝竹籤咁長，熱辣又爽口。最左手o既牛脷係四味中最為美味o既，厚身又爽脆，惹味又香口！中間o既雞翼皮脆肉嫩，而且一啲都唔油膩；豚肉口感其實都爽架，不過面層o既七味粉調味就略為重手咗少少。深啡色o既豚角煮用煲上，好夠滾熱辣，半肥瘦o既豚角香甜入味，肥o既部位軟腍，而入口不膩，但係瘦肉嗰邊就帶少少嚡口。嘩，雜錦天婦羅上枱又再一次嚇倒二人，每人除咗有一隻大蝦，碟上仲跟埋多款雜菜，豐盛足料！天婦羅蝦爽脆彈牙，同炸雜菜一樣咁乾爽鬆化，全因其炸粉好夠薄脆輕巧，精彩美味 ！食完多輪熱食終於排到壽司拼盤！做大o既永遠都會錫住啲細佬妹，小肥都係一樣，讓俾契妹揀食邊幾款 。XO仔食咗幾款都好滿意，三文魚甜濃軟滑、赤貝爽脆香滑、魷魚光滑半煙韌，唯獨食完串燒大蝦及天婦羅蝦後會好自然地玩比較，就會覺得熟蝦壽司遜色咗少少。跟餐o既豚石頭飯新鮮熱辣，香氣洋溢，靚女姐姐怕我地會燒傷，仲主動幫我地撈起同分配，服務認真貼身！石頭飯香甜夠熱，豚肉軟腍易咬，每人有成兩碗。套餐黎講，咁多道菜，份量真可稱得上為勁量級，如果二人早知份量咁足就唔會叫多碗烏冬黎分。 花膠雞絲濃湯手打烏冬（$118）：為咗要快啲寫夠五百編食評，小肥最近少咗喺屋企食飯，湯水都少飲咗好多，哈，依碗濃湯烏冬正好為細佬保充骨膠原，契妹話齋，湯底就好似老火湯一樣咁有營養，似乎「螢壽司」都好講究「營」 。單憑食材及餸名都已經睇得出廚師中日交匯o既烹調方法花過心思創作，烏冬煙韌彈牙，花膠爽脆入味，湯底味濃料足，如果雞絲可以做到嫩滑啲就更加完美啦！套餐甜品為雪糕球，有綠茶、朱古力及芝麻三款。平心而論，XO仔件綠茶味雪糕真係幾硬 ，睇黎廚房要調高少少雪櫃個溫度。唔知係咪見小肥同契妹一邊食一邊喺度寫筆記呢，埋單前高高大大o既華師傅突然上前問及二人對餐店同食物o既意見。餐廳正式開業不到一週，我地大致上都覺得好滿意，對各款菜式o既詳盡感想亦如實告知，華師傅不但細心聆聽，仲同廚神契妹研究改良方案，態度極為誠懇認真 。閒談間得知店子o既午市套餐量足又抵食，細佬已準備好週末帶同父母一齊再黎擦餐勁。多得新朋友介紹，得以一試開業只有三日o既「螢壽司」，與餐店似乎頗有緣份。店子環境簡潔，服務優良貼身，食物高質、量足、抵食，毫不吝嗇，非常大方！手持九折咭o既XO仔同契妹好唔客氣地叫到成枱食物，飽肚得黎仲要覺得超抵食，當真腸胃心靈都咁滿足 ！…查看更多