名苑酒家 (已結業)

因為要攪結婚+去渡蜜月, 所以遲左一個月有多先寫食評, 希望遲到好過無到啦其實本人唔係第一次食名苑, 記得第一次食名苑, 係幾年前, 亦正正係尖沙咀呢間, 當時同屋企人食, 已經驚為天人, 之後名苑亦都係我第一次主動 + 食過番尋味 + 自己俾錢去食鮑參翅肚既中菜 (即係除左去飲 & 同屋企人慶祝), 詳情可看小弟另一篇名苑 (荃灣) 食評http://www.openrice.com/restaurant/commentdetail.htm?commentid=1963499對於名苑, 我一向有讚無彈, 某日時運高見到有遊戲, 二話不說叫埋當時仲係未來老婆既WY Chan一齊參加, 希望可以係結婚前當係慶祝 + 慰勞之前既節衣縮食 真係非常多謝OpenRice & 名苑, 今次既安排真係唔錯, 服侍週到, 未有野食前先有紅酒, 雖然我唔係咁識飲紅酒, 不過都覺得易入口, 同時間酒樓經理介紹總廚杰哥, 我覺得廚師出黎見下大家係好事, 近距離接觸下親切d, 另外每檯都有一名經理同我一齊食飯做解說, 亦都教識我地好多食物同煮法既野, 我地兩公婆食得好開心! 等左一陣, 終於開始今晚既星級晚宴!清宮明火雞煲翅: 可以同大家講, 之前我都食過名苑, 個味道係一樣的, 唔會因為試食而味道不同, 個翅既份量雖然係多d, 但如果walk in d翅都係一抽抽的其實個雞湯分開飲都非常正, 離遠已經聞到雞湯香味, 經理話個湯佢只係用雞去煲, 可以煲到咁奶白咁有雞味, 唔怪得話係商業機密啦用雞湯煲既翅, 完全同去酒樓酒席既翅唔同, 再加上d翅係一疏疏的, 連湯渣既雞都非常好味, 都無乜地方可挑剔了蔥爆鹿兒島黑豚肉: Well, 大家都對用蘋果切出黎既天鵝好有興趣 精美既刀功引來相機聲不絕原本 (灣仔果次) 好似係炒雙蚌, 突然變左黑豚肉, 個人喜歡黑豚肉多d, 好在係食第二餐!西芹同黑豚肉火侯恰到好處, 兩樣都係我平時喜歡食既野, 可惜因為要留肚, 唔係應該食食多d 北方菓木烤紐西蘭羊鞍: 一向喜歡食羊, 所以有d期望, 一吃之下, 我只係知道我食緊肉, 因為 - 佢唔羶, 原來經理話, 因為要迎合其他客人既需要, 此味係特登做到無羶味的老實講, 如果怕羶味但又想食羊, 呢味真係岩晒, 但其實想食羊但又唔想有羶, 本身已經有點兒矛盾...名廚古法三頭鮑魚伴玉掌: 咁多鮑魚放埋一齊真係何其壯觀 始終係招牌菜之一, 大廚親自出黎為大家即場表演扣鮑魚, 果真大開眼界, 食友們當然唔會錯過呢個影相既機會, 快門聲響個不停本來菜單係五頭, 但因為試食會既關係upgrade左做三頭, 另加一隻特級南非網鮑, 答中問題既食友可以upgrade, 好幸運地老婆大人成為幸運兒, 唔通人逢喜事真係好運d? 這次名苑試食條件為答一條問題, 到底咩飲品最配合食鮑魚呢? 如果根據名苑今次既餐單, 相信係楊桃檸檬汁, 因為食之前先來一杯名苑供應既楊桃檸檬汁, 酸酸甜甜開胃d, 相信作用亦係洗下大家既味蕾先講鵝掌, 我平時對鵝掌興趣不大, 但都覺得好好食, 加埋鮑汁真係一絕, 突然好想有碗飯可以撈埋d鮑汁食經理話鮑魚本身要準備三日先可以咁軟身, 雖然三頭鮑已經很好, 但特級南非網鮑真係非一般, 足有一個女生既手掌心咁大, 要一讚既係咁大隻都可以炆到咁"林"咁入味, 鮑魚香味在刺激每一個味蕾!頭抽生煎海花竹蝦: 我覺得佢好似外星生物... 實在大的有點嚇人煎得好入味下, 不過因為太大隻, 食起上黎有d難度, 不過啖啖肉既感覺真好,而且好多蝦羔, 喜歡食蝦頭既人應該好開心!福祿臨門沙巴海老虎班: 因為開始飽, 所以呢碟手腳開始放慢...老虎班即係老虎班, 肉質非常好, 起埋肉更加貼心, 因為本人食魚一向唔鐘意"輪"骨 (笑), 而且我幾鐘意佢d"貓耳"咁既雲耳, 連魚汁吃真的非常好, 不過個頭有d紅色有點驚嚇黃金脆皮文昌雞: 這個真是驚喜, 皮脆肉嫩雞味重, 好耐無食過咁好味既雞, 本來諗住留肚食甜品, 但見個個讚不絕口, 都忍唔住食多幾舊!金柱鮮竹泡翡翠: 食菜時間, 全晚唯一蔬菜, 突然覺得好珍貴雖然只係菜, 但個湯都係雞湯黎, 即刻感覺唔同晒, 腐竹 & 榣桂絲配上湯一齊食亦得好, 可惜皇帝菜唔係個個食西施龍蝦肉泡飯: 飯是即放進湯的, 食過既朋友話放飯去熱湯度時d飯會跳下跳下, 所以個個都拎定相機等 估唔到連個飯都咁有心思, 龍蝦肉+龍蝦湯唔會撞味, 炒過既飯粒做泡飯唔會好快吸水吸到漲晒, 再加上少少既焦香, 其實係唔係龍蝦做料已經唔重要了!燕窩椰汁壽桃包: 終於到甜品時間, "魚翅鮑魚燕", 食過"鮑", 食過"翅", 到"燕"了, 個包好香既椰汁味, 樣子非常吸引, 同傳統蓮蓉壽包當然無得比啦! 但燕窩我都係鐘意做糖水, 因為真係唔好食到係燕窩 (椰味太重可能都係原因)生磨蛋白杏仁茶: 名苑另一名物, 呢個一向係去親名苑既必吃, 杏仁味好香, 同蛋白出奇地夾!宮廷桂花糕: 個樣真係超靚, 但唔知咪因為太多層, 好似比較易散, 而且味道偏向左椰味, 桂花相對失色左, 始終個名係桂花糕嘛! (話雖如此, 我都係有encore的 )北海道3.6牛乳布甸: This one very nice! 我到最後好飽都要encore! 超香奶味, 再加上芒果真係甜到入心! 雖然好飽我都encore左, 四個甜品最like!最後真係要再一次多謝今次既試食, 雖然話係寫得好既人先有得參加, 但有得同老婆係結婚前放縱下真係好開心, 再一次要鑽下名苑, 呢個價錢咁既質素真係值得一試另外一個少少意見, 因為去過既兩間名苑都唔算得上地方大, 唔知名苑到底有無做結婚酒席, 如果名苑考慮做埋酒席的話, 可能我同老婆結婚都會揀名苑, 哈哈!…查看更多

高興被openrice揀選與名苑合辦之粵菜鮑翅試食晚宴，升呢做了星級食神。當晚試食之菜式有13道菜，並由星級大廚星哥為我們煮出美味菜式，每道菜之賣相亦相當靚，唯獨我沒有一部較佳之相機，希望大家見諒。試食晚宴十三道菜式1. 清宮明火雞煲翅2. 蔥爆鹿兒島黑豚肉3. 北方菓木烤紐西蘭羊鞍4. 古法扣三頭鮑魚(玉掌伴)5. 頭抽生煎海花竹蝦 6. 福祿臨門沙巴海老虎班7. 脆皮黃金雞8. 金柱鮮竹泡翡翠 9. 西施龍蝦肉泡飯10.燕窩椰汁壽桃包11.宮廷桂花糕 12.生磨蛋白杏仁茶13.北海道3.6牛乳香芒布甸清宮明火雞煲翅 – 我十分喜歡食魚翅，尤其是用鮮雞作湯底(不是打茨那種)最能帶出魚翅之鮮味，每一碗都十分足料，一梳梳的翅，好香好濃鮮雞湯味，但湯面並不油膩，不會喝到一嘴油的感覺，店經理還提及除了用雞去滾個湯底外，亦放了大量雞腳，令個湯有更多的骨膠原。不過不知是否我們用了些時間來拍照，所以當喝這個湯時，已不太熱了，令個湯有點失色，若果湯翅是夠熱的話，更能發揮到雞煲翅原有的鮮味。北方菓木烤紐西蘭羊鞍 - 肉質淋，唔騷，食落有點果甜味，怕羊騷味既我，也能整件食完。店經理推介，紐西蘭羊鞍是冇咁重羊騷味，適合大伙兒既口味。古法扣三頭鮑魚伴玉掌 – 吃三頭鮑前，先來一杯桃汁加檸檬汁來清一清口腔之前所留下食物既味道，來品嘗期待以久既主菜 登登登登 ~~ 三頭鮑魚啦~~ 當刀叉切落鮑魚既一刻，就知道鮑魚用了很長時間來炆，鮑身很淋，食落去時更有種彈牙既感覺，而伴汁方面，是一種濃郁既鮑汁味，吃到最後一口，我切淨最大件鮑魚放入口，感受淋得來而彈牙既感覺，真的非常有口感呀！另外，值得一讚既係，佢既伴菜 - 玉掌亦煮得一d都唔馬虎，玉掌肥美，食完嘴唇有種痴泣泣既感覺，相信就係店經理所講既骨膠原吧！頭抽生煎海花竹蝦 – 未食前，賣相已經很吸引，也聽到不少歡呼聲，因為花竹蝦既外型很大隻，而且仲聞到一陣陣既頭抽香味，我亦急不及待急拿起一隻花竹蝦來吞吃。大廚果然煎得入味，亦不會落過重頭抽調味而蓋過蝦既鮮味，真的有種啖啖肉既感覺，蝦殼亦煎得很脆，不過就沒有咁誇可以連殼都食得落，畢竟花竹蝦真的有某程度大隻，而殼就自然偏硬，所以要食，也是吃蝦的尾殼或觸鬚吧。西施龍蝦肉泡飯 – 這個菜也是令我感意外地好吃，最初店經理表演了一幕將飯及米通倒在龍蝦清湯裡，之後渣~~一聲，都幾得意，不過我心諗，可能都幾油膩個湯底，但當我試吃一啖之後，竟然沒有油膩既感覺，並且喝得到龍蝦湯既清甜味，帶有一種煎燶了既龍蝦殼既香味 (當然大廚真的有此煮法啦)，所以我亦推介大家可以試試呢！最好少飯多湯 哈！燕窩椰汁壽桃包 – 大大隻，賣相亦相當靚同飽滿，不過我分開一半時，沒有流沙，或許已經不太熱，又或許太多椰醬，沒有我預期般好吃，椰汁過多搶了燕窩既味道，不過都係一試無妨既。宮廷桂花糕 – 清香少甜，不錯！若果沒有椰榚合併，更合我味道。生磨蛋白杏仁茶 –這個甜品，做得比較出色，杏仁磨得很滑(聽聞分別磨了共四次)，有杏仁既自然香味，我一向都不愛喝杏仁茶，但也被佢既香味細滑所吸引，又飲了一碗啦。我不打算逐一細說十三道菜之味道如何，有待大家可到此店一嚐新派粵菜。不過今次試食，真的食到肚滿腸肥，並且大廚操刀之手所煮既食物，原本由我接觸過而對一些不愛吃的食物，因此而再去嘗試或愛上了。:)整頓晚餐，我用不上一根牙籤，就知道食物的質素和烹調手勢有多好了。…查看更多

我愛日本菜、意大利菜、法國菜...粵菜從來，粵菜在我的排行表都不是排第一位，或許在家吃或一些飲宴品嚐會比較多的。平時很少三五知己專程品嚐粵菜 為何呢？不是價錢問題，不是味道問題；或許，在家吃粵菜已成習慣吧！或許，在飲宴吃的總是不像樣吧。今天，Openrice x 名苑酒家為我帶來新的體會，當主持人介紹新派粵菜時，第一個念頭是：「新派？即是不傳統吧！中菜不是傳統才好吃嗎？」當我帶著疑問的同時，試食會正式開始；不管怎樣，品嚐吧：自問不是什麼食家，我只是一個平凡的小市民罷了，就用平民的心態開始食吧。清宮明火雞煲翅 - 很濃烈的雞湯，再配充滿口感的翅 (不是碗仔翅呢!) 味道一流，十分鮮甜；唯一要說的是不夠熱，但這點可以原諒的，因為我們為雞煲翅這模特兒影相的時間也不少，或許她有點冷倒了吧。:)蔥爆鹿兒島黑豚肉 - 名字有點俗套，因為工作上經常接觸不同食物名稱關係，總覺得蔥爆...與這次高貴的試食會有點不配:(，味道呢？西芹，算是爽口 ，黑豚肉呢，味道上不算十分突出，但口感不膩，不像一般中菜小炒，滿口是油)北方菓木烤紐西蘭羊鞍 - 其實是很入味的，十分香口。但好羊之人總是希望品嚐到那種羶味；若果不當作是羊鞍的話，這絕對是一道非常好味的菜色。當然，品嚐羶味羊還是食北方羊才是王道吧，要求不同，自己覺得可以接受。古法扣"升呢"三頭鮑 (主持人特登把五頭鮑"升呢"為三頭鮑)- 每逢飲宴，總有 "鮑片" 品嚐，小弟也嚐試到訪一些自稱 "十幾頭鮑"的中菜館品嚐，他們總以為頭數越多，氣勢越大似的，到真正上菜時，還不是用放大鏡才能看到，這次總算當上真正食家一次 (常在電視節目看一些食家品嚐鮑魚，總像食小菜似的平凡)一入口，口感有點粘的，真正有鮑魚鮮味；不得不提的是個汁，十分香口；另外鴨掌本人以前是食的，但今次，比我食哂!豉油皇生煎海花竹蝦 - 小弟見識小，在我的記憶中，我可以肯定，龍蝦以外，這是最大隻的蝦，殼是可以吃的，蝦肉很鮮甜:)。福祿臨門沙巴海老虎班 - 呢味不算十分淋，豉油不算太咸，只算是合格之作。:)黃金脆皮文昌雞 - 在香港食雞不可要求太多，這隻雞總算不太肥，廚藝令我總算品嚐到少雞味。,:)金柱鮮竹泡翡翠 - 嘩哈哈，有菜食啦，太多肉，這味為我這肥仔帶來一個清泉吧！西施龍蝦肉泡飯 - 印象最深刻的一味菜，第一，待應把煎過的蝦殼倒進熱的泡飯中，"嘩啦"一聲，好似睇表演咁，十分精彩；第二，一入口，十分鮮甜，我又是從來不吃泡飯的，也被這味菜迷倒了。宮廷桂花糕 - 少女們最受的甜品出場，看見她們的瘋狂，我的第第二個肚也回來了。個人覺得椰汁味比較重，其餘的還算合格。燕窩椰汁壽桃包 - 第一次食燕窩椰汁做流心的壽桃包，味道不會太漏。:)北海道3.6牛乳芒果布甸 - 這次讓給愛甜的少女們，因為之前自己已經品嚐過，布甸，芒果的份量頗為足料。生磨蛋白杏仁茶 - 又一樣另我突破的是，平時又是不食同杏仁有關的食物；這個沒有藥味的杏仁茶另我全部食哂呢！這次的體驗令我對新派粵菜有所認識，原來粵菜是可以很好食的，原來新派粵菜不會帶走了傳統粵菜的重心。…查看更多