一鍋 - 台日式精緻小火鍋專門店

入冬最凍一天，熱愛打邊爐o既honey一早已諗好要去天后試玩佢同事一再推薦o既一人一鍋「iPot」火鍋店。「一鍋」店舖唔算大，幸好我倆六點三前已入座，因七點未到店子已座無虛席。 得知二人第一次幫襯，姐姐仔好仔細地介紹火鍋料屬半自助形式，食客可自選調味混醬。因各自有個爐，每人可揀不同o既湯底。從餐牌上再選擇肉類及海鮮。其他蔬菜類、丸物、粉麵、汽水等則屬自助任食項目。佢話我地兩個人其實可以試吓個「二人前龍蝦或毛蟹套餐」，因有齊海陸美食加啤酒，抵食過散叫好多 。Honey二話不說就應推介叫咗個「二人前龍蝦套餐」。辣妹情人要咗個「台式麻辣鍋」，辣度選中等o既「醫院辣」。唔辣得o既小肥就叫咗個建議湯底「養生蕃茄鍋」。毫不油膩o既蕃茄湯底清甜香濃，飲落又真係幾健康養生 。火爐強弱自己控制，操作簡易。套餐中可以揀兩款自選肉類。 紐西蘭小羊捲：薄薄o既羊捲好快就熟，肉質極為軟腍。 日本黑豚梅花肉：肥瘦均勻o既黑豚肉同羊捲一樣咁薄，而且香軟甜美， 呀！ 海鮮拼盤：海鮮方面，每人有一隻帶子、廣島蠔、及半邊龍蝦。帶子尚算軟嫩，蠔隻鮮甜肥厚滑溜，龍蝦更加係爽脆甜美，套餐主角果然美味 ！雪櫃內雖有多款食品供食客任攞任食，但鏡上都貼有溫馨提示，提醒大家唔好浪費食物 。XO仔鍾意食丸，任食部份亦主攻幾款出面未食過o既丸物 。 海味墨魚包：呈黑白色o既墨魚包比外間o既墨魚丸香軟，好啱細佬口味。 龍蝦球：龍蝦球則爽脆鮮甜，是不錯之選。 蟹粉蟹籽包：不過最有特色都可算係此味蟹粉蟹籽包，柔軟o既外皮包住半脆鮮香o既蟹粉蟹籽餡，如果唔怕熱一口食落去其實都可以幾爆吓。每逢冬天，小肥都要陪honey打邊爐取暖，兩口子去過不少所謂任飲任食o既火鍋店，大多消費每人都要三百幾蚊左右。今次幫襯o既「一鍋」以一人一鍋半自助式經營，火鍋店提供o既海陸套餐食材屬中上貨色，四百蚊有埋龍蝦真係唔算貴囉。…查看更多

爹哋家住銅鑼灣，每天皆往維多利亞公園散步養生，是晩我做孝順女，陪伴散步後跟他撐枱腳，在天后興發街附近覍食，找到一鍋。街坊小店，裝潢簡約，據服務員說，老闆寧願把成本放在食物上，亦正合我心意。一人一鍋，吃得衛生之外，二人可試兩款不同。台日式混合風格，湯底花款多多，有台式養生花雕雞鍋、埔里麻辣湯丶日式鰹魚丶北海道牛奶鍋及傳統的豬骨等等。我們選擇了二人龍蝦或蟹餐，本來松葉蟹亦好，但懶得開殻，先試龍蝦，選定主角後，場景各是養生番茄鍋及北海道牛奶鍋。鍋仔細細，但二人亦足夠分享。養生番茄湯底，用新鮮牛番茄及豬骨製成，不落味精，番茄肉果然香甜，湯喝完亦不口乾。北海道牛奶湯頭，原來加進珍珠米及豬骨熬成，怪不得白雪顏色亦不稀薄，未嚐已感美顔。預先準備好的湯汁隨時可加。配角是牛豬羊或雞肉四選二，是來自世界各地的佳麗，美國安格斯牛小排丶日本黑豚梅花肉丶紐西蘭小羊捲或美國無骨雞肉片，我們選擇頭兩款。牛小排肉脂肪雪白豐富，紋理尚算平均，黑豚梅花亦帶多少脂肪條紋，色澤鮮明，身軀堅廷，上乘冰鮮貨，全部切至薄片。牛肉一灼即半熟，顏色立刻轉深，多灼二秒便可吃，肉質嫩滑，但肥美感始終不及本地手切肥牛。豬肉就要多灼幾分鐘，嫩而有嚼勁，但肉質不算十分特出，相比早前在西餐廳吃到的粗切的黑豚肉，後者較有肉香及咬口。身為主角的龍蝦並無令我們失望，一人半只，非常有份量，估計有8吋身長，放一罐啤酒在旁有對比，大家可見巨大身形。肉質雪白，蝦膏明顯填滿蝦頭，剛好勉強可以放進小鍋，肉質果然鮮甜彈牙，美味好貨式。生蠔及帶子各兩只，同樣地，新鮮肥美，放進不同鍋底，風格各異，番茄的果酸令甜味更出，牛奶令口感更肥。半自助餐形式，我們可以無限量添加丸餃丶蔬菜丶菇菌丶粉絲麵類，共三十多款，樽裝汽水亦可任喝。推薦這個蟹粉蟹籽餃，頭尖尖的形狀與別不同，橙黃色的餡料，有蛋黃口感，說實話，蟹粉不明顯，但總比腥的好，調味不俗，放進不同鍋裡煮，味道差不多，我吃了四只。另外個子小小的鴨肉丸比較少有，真正有濃郁鴨肉之味。台式貢肉亦不俗，並不爆漿，但有嚼勁。蔬菜最選，片片菜葉皆嫩綠。最後把烏冬加進牛奶湯鍋，連同豆腐及金菇菜吃，熱辣日式烏冬牛奶湯作完結，飽肚暖胃，唯獨烏冬質地不夠滑。二人龍蝦餐包台灣啤酒兩罐，選擇了芒果及青梅味道，酸酸甜甜易入口，仿似cider蘋果酒般酒精濃度低。服務恰到好處，價錢合理，家常便飯，多一個好去處。…查看更多

一人一鍋晌香港已經唔喺咩新事物，晌台灣亦喺好普遍，舊年就曾經到「一鍋」試過其台日式精緻小火鍋，印象唔錯。今次重臨，事緣新出咗兩款雞鍋底：古早柑桔雞鍋及上品花雕雞鍋，都甚有興趣想知道兩者味道如何！座落晌天后琉璃街嘅一鍋，鄰近天后地鐵站，交通極之方便。而店內環境簡單骨子，感覺舒適，無一啲做任飲任食火鍋嘅酒樓咁嘈。此外，以2、4人枱居多，適合三幾個朋友嚟聚聚。店員話為方便管理，分咗3個時段：6:00pm-8:30pm、8:30pm-10:30pm、10:30pm-12:30pm，不過，都解釋依個都唔喺硬性規定，如果當晚人客唔算太爆，都唔會太跟足個時段做嘢，早啲嚟又得，晏啲走都得，但如果撞正日子旺，就最好麻煩要依時交枱喇。雖然以前個食評已寫過，都概略講講一鍋嘅收費方式。享用模式好簡單，一條方程式就明晒：湯底1鍋 + 肉類1份 + 配菜飲品自助 + 加送台灣啤酒1罐 + Haagen-Dazs雪糕1杯，而收費取決於所揀選嘅肉類。肉類分為4大類、5個級別價錢：牛肉類- 美國雪花肥牛200g（$198）- 美國安格斯牛肩胛肉200g（$248）- 美國安格斯去骨牛小排200g（$298）- 美國頂級肉眼200g（$348）- 澳洲和牛肉眼180g（$498）豬肉類- 培根豬200g（$198）- 日本松阪豬肉200g（$248）- 日本黑豚梅花肉200g（$298）羊肉類- 紐西蘭小羊捲200g（$248）雞肉類- 美國無骨滑雞肉片200g（$198）此外，亦可以以優惠價再追加，例如第5級別嘅雪花肥牛、培根豬、無骨滑雞肉片都只不過$20 / 100g，其他為$30 / 100g（第4級別）、$50 / 100g（第3級別）、$80 / 100g（第2級別），而第1級別就當然喺最貴，追加價為$150 / 100g。（以上所有價格當然要加收10%服務費）上述都喺基本套餐，仲有1款龍蝦 / 毛蟹餐，1人份收$398 + 10%，2人份收$738 + 10%，前者包括龍蝦或北海道直送毛蟹1隻，湯底1鍋，肉類4選1（牛小排、梅花肉、小羊捲或滑雞肉片），配菜飲品自助（加送台灣啤酒1罐），Haagen-Dazs雪糕1杯；而後者則湯底2鍋，肉類4選2，另再加一份海鮮拼盤（廣島蠔及帶子）。湯底比以前所見多咗3款，依家一共有成11款：台式麻辣鍋、日式壽喜燒鍋、北海道牛奶鍋、養生蕃茄鍋、香濃咖喱鍋、牛骨湯、豬骨湯、素菜湯、冬蔭功湯、昆布麵豉湯、日式鰹魚湯。對上一次已試過日式壽喜燒鍋及養生蕃茄鍋，以後者做得突出且啱心水。今次既然衝著新出品而嚟，就當然試新產品為首要目標，可惜，個古早柑桔雞鍋太受歡迎，是日沽清，幸而仲有上品花雕雞鍋，當然，未能一次試齊兩款新品，心裡總有點「心有不甘」嘅感覺。而依兩款新鍋收費模式跟基本套餐大同小異，包雞鍋1鍋，肉類4選1（牛小排、梅花肉、小羊捲或滑雞肉片），配菜飲品自助（加送台灣啤酒1罐），Haagen-Dazs雪糕1杯，食完雞鍋加湯再涮肉類及配菜，暫時嘅試食價喺$338 + 10%。上品花雕雞鍋估唔到，雞件份量不少，睇嚟至少都有半隻雞，可知道，依個喺一人份量嚟架。鍋內仲有洋蔥、芫荽、西芹等材料一起加熱，滾起再倒入一小杯花雕酒，即時酒香四溢。鮮雞件的確好味，嫩滑以外，帶微微酒香，據餐牌介紹，此養生雞鍋更有行氣活血、驅寒保健之效。美國安格斯去骨牛小排個上品花雕雞鍋嘅肉類揀咗牛小排，原來，因為個鍋有半隻雞，所以，份牛小排喺比基本套餐少一半，即喺100g，其實，過吓口癮已好夠食。安格斯嘜頭，喺品質保證，牛小排油花多而平均，輕灼後軟腍而肉味濃厚，正。北海道牛奶鍋依個牛奶鍋相對就簡單啲，採用北海道3.6牛乳，配合自家熬製嘅豬骨湯，加點杞子、紅棗之類藥材而煮成。湯底滑溜富奶香，鮮甜健康。唔需要擔心個牛奶鍋會越溝越淡，一鍋細心之處就喺每款湯底都有預備咗獨立嘅「補充湯底」，即喺北海道牛奶鍋會加番牛奶湯底，養生蕃茄鍋則加番蕃茄湯底。相反，由於水份蒸發，怕湯底會越滾越濃，加點水溝淡少少作平衡都得。日本黑豚梅花肉足200g嘅基本份量，梅花肉刨得超薄，色澤粉嫩，肉質細緻柔軟，睇落脂肪唔算多，配北海道牛奶鍋都好唔錯。一人一鍋採用小型嵌入式電磁爐，無火既安全又無咁熱，開關及火力調較就晌枱邊，1-5度火力完全掌握閣下手中，完全自我操控。自助配菜一入門口左右兩旁就會搵到所有配菜，等小弟一口氣講晒有咩啦（由下至上，並左至右）：白蘿蔔、芽菜、紫心番薯、板豆腐、蓮藕、雞脾菇、秀珍菇、金菇、雲耳、鮮冬菇、洋蔥、豆卜、龍蝦球、海鮮球、冬瓜、南瓜、芝士蛋、芝士包、蝦腐皮卷、沙律包、幸福包、香菇貢丸球、蟹粉蟹籽包、櫻花蝦片、干貝鮮蝦丸。另一邊廂，又有菠菜、油麥菜、小棠菜、娃娃菜及唐生菜，樣樣都翠綠新鮮；兼且掛有粉絲、出前一丁、日式烏冬、統一福麵，自家製拉麵等。全部任夾任食，拎多拎少，份量隨你心意。用料都頗新鮮，尤其啲蔬菜，個別丸類又幾特別，而自家製拉麵值得捧場。自助飲品一大雪櫃放滿多款支裝汽水，如可口可樂、雪碧、芬達、玉泉忌廉，此外，上層又有幾款特飲，是晚就喺水蜜桃汁、芭樂汁、荔枝汁，其實睇佢側邊放有好多名牌（烏梅汁、冬瓜茶柑桔檸檬……等等），就知啲特飲每晚都會輪流登場。至於額外送贈嘅台灣鳳梨味水果啤酒，試咗少少，跟飲一般嘅啤酒口感差唔多，只喺味道多咗一層菠蘿味，而且入口又甜甜哋，都幾有趣。自助醬料點解臨尾先介紹啲醬料？其實兩個鍋都唔錯，淥起啲肉或配菜都有味，食咗成晚，都無乜點沾過啲醬。不過，都介紹番吓佢哋有咩醬料提供，上層有麻油、黑醋、醬油、白醋、甜白醋，而下層有蒜蓉、麻醬、蔥花、乾蒜、沙茶醬、辣椒粉、芝麻、辣天椒及乾蔥。以前有生雞蛋提供，似乎依家無咗。Haagen-Dazs雪糕最後以甜品作結，每位客人都獲奉上一杯Haagen-Dazs雪糕，可惜只喺僅此一杯。味道有雲呢嗱、朱古力、士多啤梨、同忌廉曲奇。雖然只得一杯，但亦為今餐有個美好結束。由於喺一人一鍋，真喺一時興起，一支公走過嚟涮個火鍋都唔喺咩問題，當然，始終三五知己一齊食會開心好多。雖然單以價錢而言，唔算好親民，但喺，計及整體質素，都仲喺可接受呢！再次感謝店方邀請，祝願小店繼續努力，做得更成功！…查看更多

上年曾經來過一次，感覺良好，今年店方再開發了兩種新口味，踫巧囝囝考完試，帶他來試試吧！其實位處MTR天后站附近，佔有地利，非常方便。取名「一鍋」即是一人一鍋，囝囝要了古早柑桔雞鍋，原來有半隻雞，而且用的是新鮮雞，可說是肯花成本，湯底甜甜酸酸的，又有柑桔的清香，成功地把雞肉的味道提鮮了。自己倒是點了上品花雕雞鍋，又是半隻新鮮雞，原來是先把湯汁把雞浸熟，等湯汁變濃稠後，舀起部份，然後用來蘸點其他火鍋料，果然是不一樣的風味。一人套餐可以從雞、牛、豬及羊四款中選其一，囝囝點了美國安格斯牛小排，一客有五片，油脂分佈平均，灼十零秒就可以食，肉味不俗，而且沾上肉汁後，帶少許果酸，吃起來不覺油膩。另一份是日本黑豚梅花肉，薄薄的一片，肉質嫩滑，用來蘸點花雕雞汁，很惹味。看看凍櫃的丸類，有幾款是第一次見，幸福包外形似福袋，其實是糯米包，餡料只是豬肉，不過煙煙韌韌，又幾得意。其餘還有沙律包、干貝鮮蝦丸、XO海鮮包及蟹粉蟹籽包，都是平常不會吃到，值得一試的丸類。 其實吃火鍋，除了肉類、海鮮，相信消費最貴的莫過於飲品了；大堂一角有飲品位，由最具台灣風味的烏梅汁、冬瓜茶及荔枝汁，到一向受歡迎的枝裝汽水，都是任飲。到最後，當然要點澱粉質，放點粉絲落湯，蘸滿了湯之後再食，十分惹味。另外套餐還包括一人一杯Haagen-dazs雪糕，選了香草及朱古力味道，用的都是小杯，但通通都跑到囝囝肚裡去，自已只好要了罐台灣金牌啤酒，麥味很香，回甘的味道帶有日本啤酒的風格，加上夠冰凍，在炎炎夏日下喝就最好不過。這個試食價套餐要$338，可能有人會認為有點貴，但風味獨特，想試試新口味的，還是值得跑一趟。P.S : 另外一鍋已有Facebook專頁，大家只要登入及即時post照片，便可以獲贈美食換取卡一張，下次光臨時，可以有啤酒、廣島蠔、貢丸或牛小排，其中一款；而至於其他優惠，大可看看牆上的海報。…查看更多

夏日經常出入冷氣地方, 身子一向馬馬地的我, 一入冷氣地方, 長袖外套就不離身, 好似好誇張, 但無法子, 只好一年四季都食一些養生和進補的美食。今次有幸得到食友邀請到一間主打養生火鍋湯底的食店共進晚餐, 又帶我食好野, 實在非常感激, 還有相聚的時刻, 太好了!這間食店名為《一鍋》, 皆因它是一人一鍋, 方便又衞生。大大塊黑色招牌配金色的店名字, 高高掛在門口的正中位置, 奪目耀眼, 遠遠也能看得非常清楚。門口亦貼了很多飲食雜誌的報導, 讓客人可更了解食店的賣點。內裏地方不大, 大約有四至五張六人枱, 還有二人和四人枱, 每個座位均有一個電磁爐。店主事事親力親為, 為客人送上飲品、執拾抺枱、添湯底、添加自助區食物等等, 真是力不到不為財, 雖然忙過不停, 但仍然招呼周到, 友善親切。一人一鍋套餐包括湯底一鍋、自選肉類一份、自助吧任飲任食、台式啤酒一罐及Haagen-Dazs一杯, 收貴是因應不同湯底和不同肉類而有所不同。今次本應品嚐這裏獨家首創的古早柑桔雞鍋及養生之選的上品花雕雞鍋, 可惜食店是日生產太好, 古早柑桔雞鍋一早已沽清, 只好選擇上品花雕雞鍋及另外款式湯底。我本來打算擇選養生蕃茄湯, 因有 “養生”這兩個字, 但店主介紹牛骨湯內有中藥成份, 好似仲補啲喎……所以最後選了它。湯鍋和肉類隨即送到, 第一款是牛骨湯鍋配紐西蘭小羊捲 ($248)。深啡色的牛骨湯以特選牛筒骨熬製, 配以適量中藥烹調八小時, 湯內還有不少枸杞, 充滿着藥材味, 味道濃郁甘甜, 的確很滋補。用此湯烹煮食物, 甘香的藥材滲透在食物裏, 而食物亦變成深啡色。淡紅色的紐西蘭小羊捲夾雜一層肥膏, 肉質有咬口, 但我不喜愛它帶有羶味, 反而食友覺得很有風味。接着送上北海道牛奶鍋配日本黑豚梅花肉 ($298), 乳白色的牛奶湯底以北海道牛奶配適量藥材及自家熬煮豬骨湯製成, 亦加入珍珠米熬製牛奶粥, 入口滑而香濃, 相當健康養顏, 不知把它喝光會否令皮膚又白又滑呢?粉紅色的日本黑豚梅花肉, 只看其外表已知其相當新鮮。每片肉中均夾雜着一段厚厚的肥膏, 雖入口有點油膩, 但口感相當嫩滑, 而且一點膻味都沒有, 不錯之選!最後是要較多功夫的上品花雕雞鍋配美國安格斯牛小排 ($338)。濃郁花雕酒香氣，配以嫩滑的雞件、爽口的紫洋蔥、清香芫荽及清爽的西芹等食材烹煮而成。花雕酒具有和血、行氣、驅寒等保健功能, 最適合我這種常常手腳冰冷的人仕享用, 果然是養生之選。一鍋共有半隻連骨的雞件, 連骨的位置更加美味, 每件都很嫩滑和入味, 充滿花雕酒的甘香, 一流! 因已有半隻雞, 故所配的小牛排只是半份, 其實份量相當足夠, 一個人食都未必食得晒!薄薄的鮮紅色小牛排捲, 外表同樣新鮮。每片小牛排肉中夾雜着雪花的油脂, 稍稍灼一灼便馬上變色, 肉質極之腍嫩, 而且滿有牛肉的鮮味, 雖夾雜油脂, 但不感肥膩, 推介之選!最值得欣賞之處是這裏準備好一樽樽的湯底, 當食客要添加湯底時, 並非加水而是加入原汁原味的湯底, 以確保不失其味, 相當細心!繼續便再到自助吧挑選配料及自製醬料。店子一邊放了蔬菜類、粉麵類及飲品類, 而另一邊設有醬料部和一個大凍櫃, 內裏放滿數盤配料, 選擇眾多。這裏所提供的醬汁款式眾多, 自己喜歡如何混醬便如何混。有蒜蓉、麻醬、蔥花、辣椒粉、乾蔥、指天椒、芝麻、乾蒜、沙茶醬、甜白醋、白醋、醬油、黑醋和麻油。本人用了沙茶醬、乾蔥、蔥花和芝麻製成自家醬料, 但其實所有食材均有本身的鮮味, 加上湯底濃郁, 這醬料都用不著。蔬菜類共有五款, 包括菠菜、油麥菜、小棠菜、娃娃菜及唐生菜。它們均新鮮翠綠, 滿有鮮菜香, 灼得時間剛好便爽脆清甜, 本人最愛就是菠菜和唐生菜, 不知不覺間吃了不少。粉麵類則有粉絲、出前一丁、日式烏冬、福字伊麵及手打拉麵, 我們揀選了其中兩款一試。粉絲放在雞鍋煮一會, 其完完全全吸收了雞鍋的湯底, 花雕和雞味十足, 入口軟身滑溜, 相當美味。還有手打拉麵, 店主提示要用滾水先煮散, 以免令麵條黏成一團, 果然很細心。拉麵果然條條分明, 吃時淋上預早舀起的雞鍋湯底, 味道剛好, 麵質彈牙, 頗有嚼勁。數一數凍櫃裏, 共有約二十六款配料, 選擇眾多, 包括芝士蛋、芝心包、蝦腐皮卷、沙律包、幸福包、香菇貢丸球、蟹粉蟹籽包、櫻花蝦片、干見鮮蝦丸、龍蝦丸、海鮮球、雪魚方、洋蔥、粟米、冬瓜、南瓜、鮮冬菇、豆卜、秀珍菇、雲耳、雞脾菇、白蘿蔔、芽菜、蓮藕、紫心蕃薯和豆腐。當然未能一一吃盡, 選了一些心頭好, 有粉甜的紫蕃薯和南瓜、有超甜粟米、爽脆的蓮藕片、清甜的冬瓜件、爽口的雲耳、菇香味十足的鮮冬菇和雞脾菇、略為硬身的白蘿蔔片和帶有豆香的豆卜。除了以上較為清淡的食材外, 當然不少得試試特色的台式丸。橙白條紋相隔的沙律包, 圓碌碌, 相賣可愛, 外層彈口內裏是流心的沙律醬料。鮮黃色的幸福包，底部印了一個櫻花圖案，精緻特別, 外層的魚肉膠帶有黏性, 內裏則是煙煙韌韌的肉丸。至於方形的雪魚方, 外層金黃內裏雪白, 口味特別， 而一件件不規則的櫻花蝦片混入不少材料, 口感豐富。飲品方面, 除了每人有一罐台式啤酒外, 還可在自助吧自取飲品。自助吧的飲品款式都不少, 有各款的支裝汽水、水蜜桃汁、芭樂汁、荔枝汁及阿里山頂級綠茶。試了粉紅色的芭樂汁, 味道不算太甜, 易於入口。至於台式啤酒方面, 則有八款選擇, 有台灣果微醺(白葡萄味或荔枝味)、台灣水果啤酒(芒果味或鳳梨味)、台灣金牌啤酒、朝日啤酒、藍妹啤酒及台灣蘋果梳打。我揀選了台灣水果啤酒(鳳梨味), 甘苦中帶點鳳梨酸, 味道特別, 但因受不了太多氣的飲品, 故只喝了數口。吃完一身熱辣辣, 來一杯冰凍的Haagen-Dazs雪糕實在太美好。口味有雲尼拿、朱古力、曲奇忌廉和士多啤梨。一向都得喜歡滿滿多士啤梨肉粒的Haagen-Dazs士多啤梨雪糕, 味道清新, 酸酸甜甜, 絶對沒有藥水味, 雖然已經很飽, 但仍忍不住把它吃光, 正!------------------------------火鍋給人熱辣辣的感覺, 但只要提供有創新而養生的湯底, 再加上新鮮的食材, 幾時一鍋都一樣適合。…查看更多