寿々乃

疫情第四波來勢洶洶， 政府實施限聚令將會進一步嚴緊；心情難免受到影響。而各行食肆面臨再一次挑戰，尤其是日本菜打擊更甚。今晚阿妹和我決定來個最後衝刺盡享美食，只要做好安全措施小心保護自已。今次的日本料理是主打日式刺身，設有廚師發板為客人製作當日新鮮的刺身。首先來個前菜：魚頭骨顎原來是魚頭的軟骨位，用米醋和糖醃製兩三天；故味道酸甜又有嚼口。海膽豆付口感幼滑，富有甘香濃郁海膽味。金黃色的粟子用甘露來煮，香甜又搶眼。蝦炸得鬆化，由頭至尾都很鬆脆。主菜分別有數欵：鹿兒島老翁刺身肉質鮮甜通透，以金箔點綴，精美雅致。加些紫蘇葉酸醋更覺滋味。縞鰺魚魚生兩片厚厚的刺生咬落爽口鮮甜，是入冬珍貴魚種。吞拿三味大廚採用了吞拿魚嘅魚腩、中吞拿和魚腰部份。魚腩油脂豐富，入囗卽溶。中吞拿油脂分佈較平衡，食落毫無油膩感。至於最後的魚腰部分就比較淋身。粒貝大大隻粒貝即開薄切，非常爽口；若加些海鹽能大大提升其鮮味。北海道蠔蠔是來自知來縣，味道不會太濃但十分肥美。目光魚炸物炸得鬆脆唔肥膩，連頭連骨可食埋。無論佐酒還是單吃都非常好吃。金目鯛壽司用熱水輕輕一拖就連魚皮都可以食，肉質驕嫩幼滑。拖羅壽司 拖羅脂肪頗高，在上面洒些鹽可減低其油份又係另一種味美的食法。岩手県蝦刺身蝦膏帶甘甜，而刺身食落漿口是它獨特之處。馬糞海膽壽司海膽來自北海道根得市，入囗即溶齒頰留香。三文魚子壽司魚子大大粒晶瑩剔透，好新鮮。芒果水羊羹末食過以為係熱葷， 原來是一道凍製甜品， 酸酸味味可舒緩飽肚感。…查看更多

2020年因受疫情困擾，今年嘅生月活動及東瀛遊計劃都被取消哂得七七八八，小表弟從英國回港辦理簽證手續後好快又要返去升學，唔知幾時再見，所以一得閒即相約小肥表哥一嚐「寿々乃」嘅廚師發辦晚餐，仲話襯返店名中兩個「壽」字，一次過補壽兼預壽，勁有心！步出升降機門，已見和式木造嘅門面閃出金光，眼前一亮。話明係黎食壽司就當然要訂定壽司吧啦！可容納十二人嘅壽司吧由三位師傅掌舵，每組食客都有塊膠板隔開，衛生又合法。吧位除咗包圍住開放式壽司廚房之外，同時亦圍繞著擺放海鮮食材嘅透明玻璃雪櫃，方便師傅展示新鮮魚材嘅真身。店內其餘嘅散座都隔得好開，相信最舒適闊落就係拍牆嘅卡位。埋位即有熱茶飲，不過酒鬼慶生就梗係要飲返兩杯！酒牌共有兩頁之多。店子設下之開瓶費為$200一樽720ml及$500一樽1.8L，每幫襯一枝則可免一枝開瓶費。為怕表弟過份破費，當晚就慢慢地咁飲三得利生啤（$88/杯）。晚市共有兩款$1,280/位及$1,580/位嘅「廚師發辦」套餐，均包有季節前菜五點盛、季節清湯、時令刺身、季節和食料理二道、壽司、麵豉湯、精選甜品，兩者分別在於刺身及壽司嘅件數。如果客人有特別要求或食物敏感問題，師傅都會因應個別情況作出調整。第一次幫襯，兩口子就揀咗平啲嗰款，唔夠先追加。厚本餐牌仲有八頁嘅散點項目可選，中英對照，並附有彩圖參考。吧位嘅桌上有自用餐碟及筷子，另附乾濕紙巾，最別緻就係個櫻花筷子座。廚師發辦以「季節前菜五點盛」作序，左起順序為軟嫩微辣嘅醬油山葵漬紅蝦、惹味且連殼都吞得嘅脆炸川海老、鮮甜冇榨嘅丹波栗子、酸甜醒胃嘅紅白蘿蔔卷。「季節清湯」清澈見底，秋季用節令秋葵、紅蘿蔔及檸檬皮，十分清爽。湯中嘅卷物原來係海鮮腐皮卷，以東寺盛產嘅腐皮包住蟹肉及魚肉攪製而成嘅餡心，腐皮卷同清湯底一樣咁清甜可口。雖然帶住口罩，但細佬早已憑師傅雙矇豬眼認得出佢就係「日曬雨淋」嘅「日」霖師傅，嘻嘻，提起幾年前母親節午聚嘅一啲同賭博有關嘅細節後，佢終於記得XO仔嗰年喺壽司吧與一眾母親狂歡。大家相認後好自然地飲多兩杯，霖師傅仲送咗啲香口嘅富山灣炸白蝦小食俾二人送酒，認真客氣！時令刺身五點第一味為松鰈魚薄切，另配碎蔥蘿蔔蓉酸汁。松鰈魚以金箔點綴，精美雅致，大方得體。師傅展出紅皮嘅松鰈魚先知魚品嘅特徵係下巴嗰兩條鬚鬚，外貌老成持重得好可愛。喺薄薄嘅松鰈魚捲入紫美嘅紫蘇花，DIY紫蘇松鰈魚卷芳香軟潤，點上碎蔥蘿蔔蓉酸汁份外醒胃及醒神。接著銀邊白肉嘅天草縞鰺魚刺身爽厚潤甜。五款刺身中最有驚喜必數砌到成幅畫咁靚嘅北海道水八爪魚二重奏！左邊三片八爪魚肉雪白有光澤，且巧薄爽彈，鮮味非常清麗，輕輕沾上其右旁嘅醬油漬山葵加添辣勁，堅掂！右方嘅吸盤粒粒除咗爽口有彈性之外，仲多咗份脆爆，咬落脆到真係喺口入面卜卜聲咁爆裂，塗上右邊嘅生磨山葵足以吊出鮮甜，妙哉！再睇埋水八爪魚粗長澎湃嘅身段更覺震撼！二重奏後就輪到取自吞拿魚腩不同部位嘅三色拖羅刺身。紫蘇葉上最粉嫩嘅大拖羅只需輕輕灑上鹽粉，魚油及鮮香即溶喺口；右上方淺粉紅嘅中拖羅柔潤肥美；下方紅色嘅腰位叫「天真」，瘦得黎最有韌度。刺身最後嘅帶子質感軟嫩，因已黏上檸檬精華，加少少鹽粉已覺清新香潤，旁邊薄薄嘅裙邊亦巧脆非常。和食料理第一道鹿兒島A4和牛係成餐飯唯一嘅肉食，碟上連紫艷嘅蝴蝶草都可以食得落肚。頂多一成熟嘅和牛薄片軟腍中帶點嚼勁，連同蝴蝶草及頂面嘅夏蔥食落口，組合不膩口，芬芳中帶丁點爽脆。連殼上嘅知內蠔肥嘟嘟、脹卜卜、滑捋捋，閃亮爽厚，肥潤多汁，冇得彈呀！為壽司環節打響頭炮嘅根子三文魚籽一反傳統地以碗仔上，碗底墊入壽司飯，面層再舖上三文魚籽，貴客可用匙羮撈埋兩種食材黎食。三文魚籽粒粒晶瑩橙亮，爆出濃烈嘅鮮味及柚子香慢慢滲進味蕾並洋溢鼻腔，細膩得很！接棒嘅其餘四款壽司均擺放於光滑修長嘅綠葉上，好有大自然嘅感覺！爽脆嘅蘿蔔及薑片仲要係任添架！橙光閃爍嘅甘目鯛壽司柔韌鮮潤。拖羅壽司嘅蛇腹紋理清晰，粉嫩潤澤，幼滑鮮美，滋味無窮。秋季尾嘅秋刀魚壽司油脂尤其豐腴，肉質爽彈，魚味鮮濃，當真百吃不厭！壓軸嘅北海道馬糞海膽壽司以大大塊烘熱過嘅紫菜包住，皮層暖手香脆，海膽壽司餡心幼嫩滑溜，份量十足！最後追加多件拖羅壽司，再一次把肥蛇摟腰轉進肚裡，美味程度，應不言而喻！飯後一碗麵豉湯香濃暖胃，更可助分解腸內嘅魚油。甜品日本蜜瓜色澤橙潤，超甜又多汁。銅鑼灣樓上壽司屋「寿々乃」環境光亮企理，師傅幽默好客，廚師發辦晚餐價格合理，用材新鮮，刺身壽司質高味佳，有心食肆值得一試。…查看更多

環境5分：樓上日本菜餐廳响銅鑼灣崇光旁邊，位置方便，入面Ｄ卡位枱夠梳，响壽司吧食Omakase最新鮮同最享受，可以畀五分。衛生5分：燈夠光，壽司廚房同吧位D枱面乾淨企理，Ｄ魚生就响面前雪櫃，夠衛生，一樣畀五分。服務5分： 一埋位就有熱茶飲，效率好高。服務員落單，加茶，埋單都十分之爽手，大師傅好專業咁每樣魚生介紹，成條魚响師傅手上面舞嚟舞去，真係大開眼界，服務當然滿分。味道5分：1)     季節前菜拼盤之中最吸引就係剝左殼嘅紅蝦仁，用wasabi吊味食落非常鮮甜新鮮，絕對想再encore。然後隔離有個炸到脆卜卜嘅川海老，連殼都可以食埋。粒丹波栗子非常之甜。正方形件蘿蔔酸酸甜甜好開胃。2)     季節清湯好精緻，打開個蓋發現有舊卷同Ｄ秋季蔬菜，卷係用東寺盛產嘅腐皮包，入面嘅蟹肉同魚肉好清好香。半碗嘅清湯就打開咗味蕾，迎接之後嘅魚生壽司。3)     薄薄四片松鰈魚魚生，上面附上金箔，非常高級同新鮮，點酸汁食特別開胃。4)     兩片厚切縞鰺魚魚生，食落非常之爽甜，估唔到生魚肉可以咁爽。5)     日本北海道水八爪魚魚生拼盤當中包括吸盤同埋八爪魚肉，好鮮甜同好特別，見到師傅攞成條八爪魚鬚出嚟，真係有D震撼，絕對有成米咁長。6)     重頭戲拖羅刺身，三片拖羅唔同部位，最好食當然係大拖羅，入口即溶仿似肥豬肉，油脂非常之香，超級好食。7)     原隻帶子刺身處理得非常乾淨，帶子裙邊爽甜，帶子肉鮮甜，非常好食。8)     和食料理二道有鹿兒島A4和牛同知內蠔，呢兩個配搭非常之好，和牛少少燒一燒，帶出和牛嘅油香同油脂出嚟，食完個口D和牛味仲喺度，非常誇張。9)     跟住個生蠔，當然新鮮無比，兩個配合一絕。10) 三文魚子壽司呢個非常特別，真係人生第一次咁樣食，件壽司用隻杯上，下面有飯，上面鋪滿滿滿嘅魚子， 又新鮮又好食。同埋之前師傅成條魚子攞出嚟逐粒處理，非常之有心思。11) 甘目鯛魚有紅色外皮，隻眼大大地，作壽司食落新鮮鮮甜。12) 拖羅壽司當然超級肥美，魚油超香。13) 秋刀魚壽司差唔多時限嘅尾聲，遲一兩個月應該冇咁肥美。14) 海膽壽司鮮甜，海膽份量充足，大大塊，包埋塊紫菜食冇得輸。15) 食完飲返碗熱辣辣嘅麵豉湯非常滿足。16) 日本蜜瓜做最後甜品，非常甜。抵食5分：Omakase晚餐千零蚊食足成晚，有十多款唔同嘅魚生壽司選擇，師傅即刻同你整，件件超新鮮，絕對超值。…查看更多