Sell港式情怀!土瓜湾新开 大排档风味卖猪油捞饭泥鯭粥
2018-05-14

我相信每个人都有一颗「麻甩的心」,锺意到大排档食镬气十足嘅小炒,再加一支大啤,真系爽,但令人汗流浃背嘅夏天让不少食家却步。喂,开饭仔有好介绍喎,大排档格局,食嘢够镬气之余,仲几有花臣,而且仲系有!冷!气!各位麻甩们,有无兴趣?

呢间开喺巷子里嘅新餐厅,无论装修、餐牌、海报等等都走大排档style,麻甩又贴地,供应嘅食物都好有港式风味,尤其是呢碗港式邪恶始祖──楚捻猪油捞饭($15/碗)。斋睇似乎无乜餸,但呢碗饭却令不少60後、70後再三回味。一碗白饭,跟送猪油、豉油、芫荽及葱花4款配料,餐厅更特别以砵仔盛载白饭,更有风味。

客人可随个人喜好加入配料,将配料与白饭捞匀之後就食得。原本乾身嘅饭粒沾上奶白色嘅猪油,加上甚有嚼头嘅泰国米饭,一边咀嚼,一边渗出油香,令整个口腔充满猪油香,好味!

呢款较为新派嘅酥炸黑松露菌酱芝心乒乓牛丸($78),师傅以本地鲜牛肉入馔,将牛肉切条、切粒、剁成肉饼,并挞至起胶再油炸而成。自家唧制嘅粒粒牛丸,比起一般牛丸大粒啲,牛味亦较浓郁,弹牙非常。

内里有半融嘅黑松露巴马臣芝士,能否成功拉丝就睇各位食客嘅功力喇!不过「爆芝」容易烫伤嘴巴,难怪餐厅附设「小心爆浆」字牌啦,各位小心啲!

相信大家都食过咕噜肉,但有无见过呢款咁有造型嘅菠萝拔丝咕噜肉($68)呢?以糖霜做出拔丝效果,形成呢个千丝万缕嘅鸟巢。以咕噜肉先炸後炒,再加入糖醋汁而成,口感带点酥脆,味道却酸酸甜甜,好清新。大厨特别选用梅头部分,肉质较为软腍,与外层嘅脆皮形成对比。

大排档嘅特色,就系既有镬气小炒,又有绵滑粥品。餐厅提供几款以砂锅盛载嘅锅仔粥,开饭仔推介惹味鲜泥鯭粥($88/细、$12/大),一窝入面起码有2-3条泥鯭、皮蛋、腐竹等材料,而且白粥煮得好绵密,仲有微微嘅鱼鲜。旁边有油炸鬼、炸榄菜、芫荽及葱花作调味。另有田鸡粥、滑鸡粥等。


更多【新店直击】:
1. 佐敦酒店新buffet出场!生蚝龙虾等海鲜6大必食回本位
2. 泰国Nara攻港!必吃船面及菜式推介
3. 黄埔新开鸡翼专门店 必试招牌玫瑰+创新鲜柠七口味(有片)


(左)豉汁猪膶蒸排骨相当classic,虽然只用豉汁、豉油调味,但上碟後,厨师最後会用滚油灒一下,令菜式更多一层油香,口感更丰富。开饭仔强烈建议,一定要加陈村粉底,口感滑溜嘅陈村粉沾上惹味豉汁,味道一流,价钱为$83。而(右)楚捻记原只脆皮炸猪手,外皮炸至脆卜卜,内里猪手依然嫩滑,而且炸得不致太乾身,价钱为$94。

咸蛋黄呢排咁受欢迎,餐厅亦有供应呢款带点新加坡风味嘅(左)燕麦金沙虾球($82),将缅甸虎虾炒成虾球,并加入咸蛋黄碎炒成金沙虾球,最後面层洒上混合咗嘅粗、幼燕麦片。燕麦有粗幼,口感香脆又烟韧,而且不太油腻。而另一款(右)家乡五柳炸蛋($58),五柳即指红萝卜、青瓜、酸荞头、青木瓜及姜,将五柳切丝再用醋等腌渍5日,而酱汁系用茄汁、白醋、片糖、山楂、梅子煮成酸甜汁,系一道清新开胃嘅菜式。

饮品方面亦见特色,餐厅特别与本地麦氏酿酒厂合作,推出自家品牌手工啤,以龙眼、桂圆酿制,口味比较清新,麦味偏淡,好啱女生。当然仲要配埋啤酒专用嘅战斗碗,饮起嚟更开心,价钱为$42/支。


楚捻记大排档
地址:土瓜湾马头围道187号地下2,4号舖


文:Joy

关键字
土瓜湾
大排档
港式
镬气
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
6天前
全城抗炎! 5间酒店自助餐转型 任点任食海鲜/主食/甜品 变阵保卫生
2020-03-17
【特约分享】超抵外卖陪你抗疫 即睇将军澳饮食地图!
2020-03-10
【随时更新】最後倒数!即将结业的老字号及人气小店
1天前
2月份好评餐厅十强
2020-03-05