PMQ咖啡市集回归!海外人气品牌+本地特色咖啡(有片)
2019-10-04

今次咖啡市集以「咖啡X旅游」为主题,邀请六间嚟自台湾、泰国等地嘅人气咖啡品牌,同本地特色咖啡店!同时亦有咖啡体验区、咖啡品牌导赏、手冲咖啡工作坊等唔同活动,加上多间生活小店,包括大热麻糬Bagel,同会场限定手工雪条呀。
 


PMQ同啡闻再次合作举办PMQ Coffee Agenda,共有6间海外人气咖啡品牌,同超过25个香港特色咖啡同生活小店,唔少都有推出市集限定,错过今次机会之後未必有得再试!
 

海外人气咖啡品牌

清迈 Graph Coffee co


MONOCHROME($50)


SOMPETCH($50)

嚟自泰国清迈,主打100%泰国本地咖啡豆,连制作特饮嘅House Blend当然亦系泰国咖啡豆啦。MONOCHROME以Espresso配搭活性炭、云呢拿同牛奶,形成抢眼黑白渐层。略嫌活性炭味道盖过咖啡香气。而SOMPETCH就喺Espresso同牛奶中加入朱古力同橙汁,上面再加奶泡、朱古力同橙片,咖啡、橙嘅酸味同朱古力甜味平衡返,饮落无想象中咁Heavy。
 

曼谷 Factory Coffee



咖啡豆($160/包)

喺2017同18年连续两届夺得「泰国咖啡师大赛」 冠军,唔少Coffee Lover去到曼谷都会特别去买佢哋嘅咖啡豆!今次佢哋带嚟唔款咖啡豆,可以先闻下Sample,或者试饮再拣心水。比较特别嘅系DARTH VADER,系佢哋嘅Signature Espresso,产自泰北,带牛轧糖同杏桃香。
 

高雄 Artigiano



咖啡豆($130-320/包)

品牌嚟自台湾高雄,主打直火烘焙嘅咖啡豆,咖啡师形容如果平时饮嘅咖啡豆炒豆方式类似铁板烧,咁直火烘焙就似系烤肉,炉火会直接传到炉仓,非常考验烘焙师嘅功架。今次带咗五款直火浅度烘焙嘅咖啡豆,当中冠军沃卡带蜜糖香气,酸度适中口感顺喉,非常易入口。咖啡师仲教大家,热饮主要系咖啡香味,冻咗就可以品尝到咖啡豆嘅原味。
 

本土特色咖啡品牌

Cupping Room Coffee Roasters


Champion Cocktail(市集限定,$60/杯)

呢间咖啡店今年代表香港,喺德国柏林举行嘅世界咖啡调酒大赛中得到第二名!今次就将喺香港攞奖嘅咖啡调酒带到嚟市集,门市反而无㗎。用自家House Blend ATTABOY咖啡豆配Gin酒、西柚汁、荔枝糖浆,最後喷上蜜桃酒,令呢杯Cocktail饮落更Fruity亦更香!
 

厚啉。咖勹一


宜兰粉圆拿铁($48)

店名喺台语系「好饮咖啡」嘅意思,呢支宜兰粉圆拿铁用嘅系高雄程式咖啡工作室嘅伊萨瓦多咖啡豆制作Espresso,配搭牛奶同宜兰老店嘅粉圆,特别在於粉圆系香港老板自己用黑糖同高雄天池冬瓜茶熬煮,味道唔会太甜盖过咖啡香,而且口感更软Q喔!另外仲有黑糖冬瓜茶拿铁($48),同样选用天池冬瓜茶,系无加任何水,剩系用冬瓜同黑糖慢熬12个钟,香气醇厚。
 

Rest Coffee Gin


Lotus Fizz($100)

位於西九文化区海滨嘅呢间咖啡店以蓝染为主题,今次就主打糅合茶嘅Gin同Cocktail。呢杯Lotus Fizz以经典Gin Fizz为蓝本,用武夷嘅奇兰岩茶浸喺Gin酒当中,再加入柠檬汁同梳打水。所以调配出嚟嘅饮品橙黄明亮,带蜜糖香。
 

生活小店精选美食

Bagelroom


黑糖紫薯贝果($27)


抹茶黑芝麻白玉贝果($35)

Instagram人气手作Bagel亦嚟到市集!坚持无油低糖纯素、无防腐剂、每日新鲜制作三大原则。有唔少创意口味,当中以有白玉,即系麻糬馅嘅口味最受欢迎。Bagel烟韧有弹性,麻糬软糯,口感丰富。
 

Twenty One from Eight


(左)波尔可丽露($35),(右)提拉米苏麻糬($38)


(左)羽衣甘蓝菠菜蛋饼(市集限定,$58),(右)牛油果鲜虾牛角包(市集限定,$68)

观塘工厦Cafe将佢哋嘅甜品同咸点带到嚟中环,包括本身系餐厅周末限定嘅提拉米苏麻糬!里面有一粒粒麻糬,最好即买即食呀。另外有两款咸点系市集限定,羽衣甘蓝菠菜蛋饼系蛋奶素,牛油果鲜虾牛角包分量十足。
 

I See I See


手工雪条(三款市集限定口味,$42)

而呢间手工雪条品牌今次推出三款市集限定口味,分别系用咗瑞典Oatly燕麦奶嘅Earl Grey口味, Oatly朱古力燕麦奶香蕉口味,同Hoegaarden啤酒青苹果口味。品牌全部雪条都无添加色素或防腐剂,亦无麸质。
 


今次市集仲有「啡我莫属」自定咖啡体验专区、市集咖啡品牌导赏、手冲咖啡工作坊、咖啡烘焙体验课程、用咖啡渣DIY身体磨沙膏及手工肥皂工作坊、植物奶咖啡拉花班等活动等紧大家参与㗎!
 


PMQ Coffee Agenda
活动日期: 即日起至2019年10月7日(11:00-19:00)
地址: 中环鸭巴甸街35号PMQ 元创方地面广场




文、相、片:Cathy

关键字
中环
PMQ
咖啡
市集
手冲咖啡
精品咖啡
贝果
手工雪条
饮食潮流
开饭仔为大家发掘香港这个美食之都的最新美食资讯,分享饮食潮流文化。
本月热门
情人节去K11 MUSEA 一文睇晒浪漫餐厅
2020-02-06
【随时更新】零食速报 每周新款零食、酒品点评
4天前
美国人气肉桂卷抵港!烟韧原味/朱古力/焦糖胡桃卷(有片)
2020-02-06
全城抗炎 与医护同行!提供医护餐饮免费优惠餐厅一览
2020-01-31
有平有贵 情人节餐各级价格攻略
2020-02-04