PMQ咖啡市集回归!必试饮品、甜品推介(有片)
2019-04-19

难得有复活节四日长假但未有地方去?如果你系咖啡迷嘅话,唔好错过喺PMQ举办嘅Coffee Agenda咖啡生活市集!特别邀请台湾同日本咖啡师到场交流,亦云集香港多间精品咖啡店。仲有咖啡体验区、咖啡工作坊等节目。去之前不如睇定开饭仔有咩推介先啦!
 

日本咖啡品牌  Trunk Coffee



手滴咖啡($50起)


Origami Dripper 咖啡滤杯($270)

今次市集特别请嚟日本Trunk Coffee,创办人铃木康夫先生系第一位远赴丹麦学咖啡嘅日本人,品牌揉合北欧咖啡技术同日本职人精神。现场供应嘅三款手滴咖啡有三款咖啡豆选择,开饭仔就试咗肯尼亚豆,味道微酸柔和,有啲似奇异果,相当易入口。而品牌嘅Origami Dripper 咖啡滤杯以日本摺纸为灵感,色彩缤纷之余亦系近年国际冲煮赛事新宠呀。
 

惊喜咖啡泡泡雪糕  sensory ZERO


咖啡泡泡雪糕(市集限定 $45)

咖啡除咗就咁饮,当然亦可以整甜品!呢个品牌今次市集就推出咖啡泡泡雪糕,上层系House Blend Expresso 泡泡,轻盈口感令咖啡果香更突出。而下面系云呢拿雪糕,特别在会喷上无酒精成分嘅啤酒,所以成杯甜品唔单止似泡泡版嘅Affogato,仲带少少酒香!
 

柠檬王联乘  Urban Coffee Roaster


UCR Cold brew x Lemon King(市集限定 $50)

呢个新鲜烘焙咖啡品牌就同香港老字号凉果品牌柠檬王合作,用柠檬王嘅话梅整成话梅汁,再加品牌冷泡咖啡、梳打水同乾柠檬制作呢杯市集限定嘅咖啡特饮。气泡口感令特饮更Refreshing,而且估唔到咖啡同话梅味道又几夹!
 

竹蔗咖啡配鸳鸯窝夫  Summer Ice


(左)竹蔗茅啡($70),(右)洪都拉斯($60)


窝夫(鸳鸯/咖啡/伯爵茶 $40)

另一个创意配搭:竹蔗茅根配冷泡咖啡!呢间甜品店用自家熬足六小时嘅竹蔗茅根马蹄水加冷泡水洗洪都拉斯咖啡,本身洪都拉斯咖啡都带少少类似蔗糖甜香,所以唔使加糖,饮落味道已经够清甜,平时怕咖啡苦嘅朋友都可以一试。而甜品店嘅招牌窝夫呢度亦有供应,仲系即叫即制,有鸳鸯、咖啡,同伯爵茶三款口味。
 

大热手工雪糕  hushush ice cream.coffee


手工雪糕、全素雪葩($50-$60)


手冲咖啡($70起)

天气闷热想食返杯雪糕,呢度就有多款口味任君选择!最受熟客欢迎嘅系日本双岳混合威士忌口味,食落酒味比想像中柔和,反而有种类似水果嘅甜味。另一推介系椴树雪蜜鼠尾草口味,甜味清雅,一个人食完成杯都唔会觉得Heavy。当然想试咖啡嘅话,亦有唔同手冲咖啡同冰酿咖啡选择。
 

渐层Espresso Tonic  Studio Caffeine


Espresso Tonic($25)

同样系消暑之选,呢间精品咖啡店今次特别搵嚟三款英国嘅Tonic Water畀大家选择,好似接骨木Tonic Water可以增加草本花香,饮落亦会甜啲。拣好Tonic Water底後就会倒入House Blend Expresso,形成抢眼渐层卖相。
 

柴犬加持冠军咖啡  Black Sugar Coffee


手冲咖啡($50)


George Howell Coffee咖啡豆($300)

呢间咖啡店好易认,搵到佢哋店长:柴犬黑糖嘅大头就得!佢地主打嘅Gardelli Specialty Coffees咖啡豆得过世界烘焙咖啡豆冠军,开饭仔试嘅系卢旺达慕呼拉豆,闻起嚟有柑橘香味,酸味平衡。而咖啡师William啱啱去咗一转美国,完成世界咖啡师大赛评审工作之余,亦将波士顿嘅George Howell Coffee带到香港!呢个品牌喺香港比较少见,系美国东岸早期推广精品咖啡嘅品牌之一。
 

咖啡变Craft Beer  Cotton Mutton x The Ale Project


(左)Fake Juice($62),(右)HK Black Porter($52)

本地精品咖啡品牌同精酿啤酒生啤馆嘅组合,就诞生出咖啡黑啤!HK Black Porter混合七种唔同种类嘅麦芽,所以饮落唔单止有咖啡香,亦带焦糖同朱古力甜味,最後有一丝辛香味,好过瘾。而Fake Juice虽然睇落真系有几分似果汁,但其实系无任何水果成分嘅NE IPA啤酒,味道带类似西柚咁嘅微涩。
 

少见刚果咖啡豆  Ideaology


手冲咖啡($60)

品牌为今次市集搵嚟非洲唔同地方嘅咖啡豆,除咗大家饮开嘅埃塞俄比亚豆,仲有蒲隆地、卢旺达,甚至刚果嘅咖啡豆!水洗刚果咖啡味道甘甜,甚至带Earl Grey茶香,相当特别。
 

全素燕麦奶冬甩  raw bean



全素冬甩($10-30)

市集有咖啡亦有甜品,呢档就主打全素冬甩,用有机食材制作、无精制糖、无动物成分。例如用瑞典Oatly燕麦奶代替牛奶,跑「素」朋友都可以放心享用。
 



现场特设GO CUP借杯服务,去摊档畀$20按金就可以借杯,亦有特定冲洗区方便大家洗杯。而且自己带杯去摊档买咖啡可以减$2,悭钱兼支持环保呀。
 


The Coffee Agenda咖啡生活市集
活动日起:即日起至2019年4月22日(12:00-20:00)
地址:中环鸭巴甸街35号PMQ 元创方地面广场




文、相:Cathy

关键字
中环
PMQ
咖啡
市集
手冲咖啡
手工雪糕
精品咖啡
饮食潮流
开饭仔为大家发掘香港这个美食之都的最新美食资讯,分享饮食潮流文化。
本月热门
【随时更新】便利店寻宝 每周新品速报
2019-11-29
【2019圣诞】早鸟优惠! 圣诞自助餐推介
2019-11-27
秋风起!5间大闸蟹放题食店集合
2019-11-19
【2019圣诞】年尾叉电 圣诞下午茶集合推介
2019-11-19
【2019圣诞】约会之选 圣诞市集推介
2天前