9月份好评餐厅十强
2021-10-08

嚟到9月份,十强榜继续反映港人爱打卡嘅习惯,有多间打卡店入围。另外亦有两间健康poke bowl餐厅上榜,睇嚟都巿人愈嚟愈注重健康呢。

第10位  The Pizza Pig(*新上榜)

 图:laalaafoodpriscilla.ho.397

位於将军澳嘅呢间餐厅,人气唔错。餐厅以蓝白色为主调,采半开放式设计,日头够晒光猛。叫得The Pizza Pig当然以pizza做主打,嚟到记得试,但建议多啲人一齐去会开心啲,因为佢哋有个30寸,成张枱咁长嘅巨型pizza,好鬼震撼。pizza以石炉烤焗而成,饼底松脆。

第9位  Hunky Dory(*新上榜)

 图:kimmicheukRubyWong1122

有唔少朋友放假都锺意去下科学园,呢度有间都靓靓餐厅,有埋空中花园,都几受欢迎。好多人去到都锺意食返个牛油果鸡肉汉堡,健康又好食嘛。另外推介亦可试试韩式烤牛肉泡菜班尼迪克蛋,呢个配搭系几有趣,有新鲜感,估唔到又几夹喎。

第8位  Deer Kitchen(*新上榜)   

 图:vincitoswSusansyleung

好多受欢迎嘅餐厅,都一定会有啲打卡位。呢间都唔例外,有两个以雀笼为主题嘅卡位,系好多客人都想坐嘅位置,有幸坐到记得要影多几张相。嚟到除咗可以锯下扒、食下意粉外,推介可试特色焗威灵顿三文鱼。外皮酥脆,三文鱼扒厚墩墩,肉质嫩滑。

订座优惠:$10一只新鲜生蚝

第7位  PokéToké 

 图:foodxgoodwest_hkfoodmapdidi

个个都注重健康,poke bowl成为咗近年深受欢迎嘅食品。呢间主打poke bowl嘅餐厅已经第二次上榜啦。有6款官配选择,亦可以自选食材配搭,三文鱼同牛油都系热门之选呢。不过呢度都系有邪恶食品供应嘅,包咗薯条、炸虾、炸鱼柳等嘅炸物拼盘真心唔错,好易令人抵唔住诱惑咯科科。

第6位  Pier 1929(*新上榜) 

 图:JannisTstarrychow

花花走廊加埋维港海景,呢度可以堪称为打卡圣地,有唔少女生都慕名过嚟食tea打卡呢。当然,佢哋嘅tea set亦做得好有心思,加咗好多花花做配衬呢。另外推介白酒蟹味噌忌廉蟹肉意粉同西班牙慢煮乳猪,前者淡淡酒香,後者以75度慢煮而成,皮脆肉嫩重有肉汁𠻹。

第5位  Poke Go(*新上榜) 

 图:karyanlaichingtzz

十强榜内另一间poke bowl店。呢间就有5款官方配搭组合,另外亦可任由客人自行配搭。客人可以喺三文鱼、吞拿鱼、八爪鱼或杂菌香菇中拣一款做main,再配搭沙律菜、寿司饭或珍珠糙米,重有多款配料同酱料拣,当中最特别嘅可以话系山葵乳酪酱,呛呛地咁几过瘾。

第4位  牡蛎小屋 

 图:hasafoodiehubbyvanessafoodiary

咁多人锺意食生蚝,呢间由日本人开设同主理嘅蚝屋又咁多牡蛎菜式选择,要再次上榜完全冇难度。蚝迷基本上都系冲住铁盒烧生蚝而去朝圣,枱枱都点。将清酒加入烧盒後再烧,烧过嘅生蚝特别香口,鲜甜中更带有海水咸香。另外亦有供应牡蚝猪肉、烧牡蛎饭团、牡蛎茶渍饭等,啖啖蚝香。

第3位  Wingman(*新上榜)     

 图:ivyrabbitholicfoodieleaf_hk

呢间鸡翼专门店一向好受欢迎,中环店已经上过2次榜,今次终於轮到旺角店。慢煮後再炸香嘅鸡翼,鸡皮特别脆口,肉质就仍然可以保留喺嫩滑状态,重好多汁𠻹。嚟到最开心系有鸡翼放题,口味有成18款选择咁多,系开心仔嘅。推介花雕醉鸡翼、巴马臣芝士蒜蓉味、泰式甜辣酱同水牛城酱口味。

第2位 J.Moon(*新上榜)   

 图:yantung117happyjoejoe123

一上榜就进占第2位嘅呢间餐厅,环境气氛系最杀食嘅。以月球为主题,悬挂住160盏月球波波灯,又靓又浪漫。而呢度最特别嘅一定系佢哋以十二星座为主题嘅鸡尾酒,例如「摩羯座」会加入朱古力同奶油调制。食物方面则有多款fusion菜式供应,当中又以拉得丝嘅J.moon pizza为特别推介。

第1位 为食火锅公司(*新上榜) 

 图:leetszhinShinchan1993

9月榜首位置系属於以哥基为主题嘅鸡煲火锅店,集港人两大飞佛元素,兼夹任食放题,只要食材新鲜、款式选择多,当然就容易取得大众欢心。鸡煲加入秘制酱处理,更推介加入猪皮、牛柏叶同鱿鱼呢三宝,系几惹味。食完鸡煲打边炉,重有海鲜拼盘,包括扇贝、鲍鱼、桶蚝等,绝对系满足嘅一餐。

订座优惠:无限时刺身鸡煲火锅放题套餐6人同行1人免费



文:Kar


关键字
十强
十强名单
报榜
旺角
湾仔
荃湾
尖沙咀
观塘
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【2021生日优惠】持续更新! 12月寿星免费钓虾 韩烧放题/浪漫西餐低至半价
2021-11-29
【随时更新】零食速报 每周新款零食、酒品点评
1天前
【2021圣诞】即开生蚝任食!9 间圣诞自助餐精选
7天前
乌冬控集合!严选4大高质乌冬店
2021-11-26
【2021圣诞】甜蜜蜜冬日!6大圣诞节下午茶精选
2021-11-22