9月份好评餐厅十强
2019-10-09

9月份嘅十强名单,有8成都系第一次上榜嘅餐厅,当中有火锅、有酒吧、有小店……能够喺艰难时刻迎刃而上嘅,当然各自都有佢哋嘅秘技啦!

第10位  缘聚鲜锅(*新上榜) 


图:Miss K.fly

荃湾呢间餐厅,$200唔使就有得任食自助餐同火锅,兼且食物款式多多,11个区内有寿司有刺身、有熟食有甜品,汤底仲有9款拣添,包括寿喜烧、芫荽、味噌地狱辣等都有得拣。甜品区有得夹糖,但最吸引莫过於系晚晚都有驻场师傅即席切原条吞拿鱼啊!

第9位  美滋锅    

  图:KathyPun天天食好野

呢间新加坡嘅美颜火锅店,开张4个几月嚟已经系第三度上榜喇!长期受港人欢迎,无他嘅,全店粉红主题啱晒打卡呃like嘅女生,内设室内儿童游乐场又照顾到一众家庭客需要嘛。胶原蛋白美容锅近乎系必点,想试多啲款可以拣鸳鸯汤底,雪耳鲜椰子锅都系另一推介啊,清甜可口。

第8位  何兰正(*新上榜)

 图:yimloismyfoodmylife4

位於中上环酒吧林立之地,能够突围而出,除咗因为呢度环境气氛一流外,食物同手工啤酒质素之高亦系原因之一。麻辣控要试浓厚花生豆富配花生芽菜,麻香十足;饱肚少少嘅有香煎五头深海大虎虾配虾皇酱QQ面,味道香浓。虽然酒未必可以解愁,但试返杯城酿新出嘅 “The City is ...Shining”,earl grey porter嚟,心情或者会好啲嘅。

第7位  香香宫煮(*新上榜)

 图:starrychow随心随生

睇个名就知呢度玩味十足,装修好似回到古代咁,门口仲有张龙椅打卡位!主打各式火锅,打边炉都要滋润嘅就拣花胶鸡汤锅啦,有半只鸡同花胶呀,另外特色卜卜蚬锅、消暑冬瓜瑶柱锅都好受欢迎。火锅配料亦见心思,黑松露蟹肉饺几鲜香,手打鹅肝墨鱼丸里面仲系鹅肝馅添,出面好少试到啊。

第6位  胜面(*新上榜)

 图:loklok12378Pocaguri

台湾过江龙,主打糅合四川风味嘅麻辣牛肉面。麻辣控一场嚟到梗系要试招牌麻辣·牛三宝汤面,成碗橙橙红红咁,好有色水,麻香持久!牛三宝包括有牛腱心、牛颊肉,同牛颈脊,口感各有不同。面款建议拣关庙面,滑溜弹牙呢。

第5位  龙门冰室(*新上榜)

 图:rubbishtrashSa820

呢间冰室唔净止得一般茶嘅茶餐或者公仔面,就连all day breakfast、铁板扒餐同玉子烧等都有,其中个星级杂扒铁板餐超丰富,又有西冷扒又有鸡扒,仲有炸带子同香肠,叠到高一高满一满,行完街食包饱肚!加上佢哋早前推出免费加油餐畀全港学生,结果日日都要接受「惩罚」,仲「罚」到打入十强都可以话系一个历史。

第4位 Mamaday

 图:CheesecakemuimuiDOMO肥

铜锣湾呢间小店相隔一个月後再上榜,加上曾经系最多收藏餐厅第3位,足见大家对佢嘅喜爱有增无减!好多人去都会试招牌菜蒲烧鳗鱼蛋包饭,不过姜葱慢煮鸡扒滑滑滑蛋包饭亦好值得一试,香口、嫩滑、惹味。另外推介豆腐豆腐豆腐咖啡。咖啡内放入豆腐雪糕,豆香味浓,仲要慢慢溶化时,豆味融入咖啡中,啖啖香口绵滑啊。

第3位  丸十あぶり牧场(*新上榜)

 图:tracyman觅食小姐

主打烧和肉嘅嘅餐厅,最近以XO同蛋黄哥做主题,无论布置定食物上都见到佢哋嘅踪影,吸引咗唔少fans朝圣捧场,特别系个迷你汉堡,好cute cute!牛魔王就要烦恼食边款牛喇,多国唔同品种嘅和牛都有得食,但讲到罕有嘅,就梗系M9+100%全血纯种澳洲和牛啦,肉味都几香浓。

第2位  Van Gogh SENSES(*新上榜)   

 图:觅食宝宝蝴蝶结姐姐

艺术嘅嘢……入到去呢间餐厅就自自然会有啦~ 呢度获得阿姆斯特丹梵高美术馆独家授权,装修格局都好鬼靓,墙上有LED loop播梵高名作,餐具精品全部都好有艺术感,约埋闺蜜嚟享受个靓靓下午茶固然好,但lunch或晚饭嘅菜式亦唔输蚀,香嫩软腍嘅西班牙猪梅头配芹菜蓉及青葱萄葡酒汁都几推介。

第1位  椰子日记(*新上榜)

 图:cyps出奇蛋

榜首系一间新开嘅小店,主打椰子冻同椰子碗,富有创意,将平时大家最锺意食嘅芋圆呀、super bowl呀等等放晒入个椰壳度,卖相一流之余估唔到都几夹。招牌双层椰冻椰味十足仲带奶香;巴西莓碗则以新鲜蓝莓、士多啤梨等打成嘅水果smoothie,清甜juicy。


关键字
尖沙咀
铜锣湾
十强名单
报榜
甜品
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】便利店寻宝 每周新品速报
1天前
给自己一个休息时间 10-11月下午茶推介
2019-10-25
鼎王来了!味道服务媲美台湾 必食麻辣鸭血锅及员工教路秘制鼎王饭(有片)
2019-11-01
粮尾打气!5间湾仔平价饭堂推介
2019-10-24
10月份好评餐厅十强
2019-11-05