怀旧风兴起，唔少餐厅都锺意用旧香港为主题。湾仔呢间楼上大排档，装潢呈现出80年代嘅旧湾仔，旧式酒楼装修、游戏机中心、麻雀娱乐公司，一定可以牵起大家嘅回忆！食物方面除咗传统镬气小炒，亦加入唔少创新元素㗎～

餐厅将VIP房打造成一个旧式游戏机中心，好有香港味道。

所有海鲜都於水缸内养殖，保证新鲜。

豉椒肉松炒蛏子皇($80/只)

豉椒炒蛏子平时就食得多，但包生菜食又食过未？呢味小菜系老板嘅一个创意，将炒蛏子同肉碎生菜包结合，苏格兰蛏子肥美，加入肉松大火翻炒後，够镬气之余仲好惹味，包生菜同送饭食都好夹。

花蛤蒸水蛋($138)

就咁见到啲花蛤，视觉效果已经够澎湃！选用菲律宾花蛤，花蛤鲜味会渗晒入蛋浆中，所以落少少调味料已经足够。而且用咗两种唔同嘅鸡蛋，滑身之余蛋味香浓。

金巢咕噜黑豚肉($118)

咕噜肉系唔少香港人食小炒必叫嘅餸。呢度就用黑豚肉代替普通猪肉，肉质软腍而且肉味更浓。拔丝酱汁啱啱好包裹住咕噜肉，甜酸味平衡。

香脆一口虾丸($168)

所有虾丸都由师傅亲自手打，香脆弹牙，热辣辣嗰阵食就最好味。

菠萝皮焗西米布甸($138/大)

西米布甸系港式传统甜品。师傅就将西米布甸加上菠萝包皮去焗，菠萝包皮焗到脆卜卜，口感丰富！

炸鲜奶($98)

炸鲜奶外皮同样做得香脆松化，炸浆系餐厅自己调较，奶味重而且好香滑。

杜老志大饭店

地址: 湾仔杜老志道6号群策大厦7楼

文: Yanica

相、片: Tom Li