又到大家最期待嘅自助餐啦！嚟到8月份嘅自助餐好多元化呀，如港式海鲜主题、榴槤甜品主题、主打即叫即煮嘅、同本地老字号食店合作嘅同埋和牛海鲜自助餐，大胃王准备好未呀！

目录

榴槤甜品祭自助餐 PLAYT

夏日就系榴槤嘅季节！呢间餐厅推出榴槤甜品祭自助餐，将顶级榴槤果肉如D197猫山王、D101柔佛黄金及D24苏丹王制成各种甜品，榴槤控流晒口水未呀～推介柔佛黄金榴槤日式卷蛋，选用口感幼滑且香甜软糯嘅柔佛黄金榴槤，同香滑嘅奶油合二为一，卷蛋质感都好绵密。另外仲有柔佛黄金榴槤拿破仑、猫山王榴槤甘露布甸、苏丹王榴槤香酥葡挞同苏丹王榴槤意式雪糕。除咗榴槤甜品，亦提供生蚝、波士顿龙虾、顶级安格斯牛肋排、寿司、刺身及精致中式点心，好丰富呀。

供应时间：2023年8月1- 8月31日

西贡海鲜盛宴自助晚餐 JW咖啡室  

讲到自助餐又点少得海鲜呢，不过今次唔系海鲜冻盘，而系以港式海鲜为主题嘅「西贡海鲜盛宴」！包括上汤龙虾伊面、酒香四溢嘅花雕鸡油蒸花蟹、金银蒜粉丝蒸扇贝及蟹皇扒龙趸；仲有镬气十足嘅香脆酥炸生蚝配柚子蛋黄酱、椒盐鳝球及香辣惹味嘅避风塘炒肉蟹，好似去咗中菜馆咁～同时都有冰冻海产、日式手握寿司、刺身、香烤牛肉、香草煎羊架、北京烤鸭同埋星期五至日限定嘅火炙日本A5和牛寿司等。

供应时间：2023 年 8 月 1 日至 31 日，晚上 6 时至 10 时(星期一至日) 

全新即点即煮风味自助晚餐 马哥孛罗咖啡厅 

食物要好食其中一个重点就系要热辣辣呀～呢个自助晚餐亮点推介即席烹煮专柜每日供应嘅60款食材，由食客自选喜爱食材及烹调方式，交畀大厨即席炮制。包括每日各12款海鲜及肉类、20款时令蔬菜、8款酱汁及8款配菜，当中包括和牛、猪柳、羊扒、鲍鱼、蚝、蟹、蛏子及扇贝等，推介姜葱炒蟹、炸软壳蟹、酱油蒸鱼、泰式烤猪颈肉、蜜汁芥末香烤猪肋骨及炖羊肉等～

供应时间：由8月1日起至9月份

国际海鲜及「港式 ‧ 港食」自助餐 Café Kool 

呢间推出国际海鲜及「港式•港食」 自助餐，同三间本地老字号食店镛记酒家、麦奀记及树记腐竹合作，食客可以喺指定日子之早午餐、午市及晚市自助餐时段食到呢三间嘅招牌菜。如镛记酒家嘅至尊炭烧肥燶叉烧饭同生煎鹅肝肠多士；麦奀记嘅云吞面、水饺面、柱侯牛腩面及京都炸酱捞面同埋树记腐竹嘅腐竹雪糕！当然仲有无限量供应嘅原只龙虾(晚市)、即开生蚝、刺身同惹味烤肉呀。 

供应时间：2023 年 7 月 15 日起

「和牛盛宴」海鲜自助晚餐 尖沙咀凯悦酒店咖啡厅   

牛魔王至爱嘅「和牛盛宴」海鲜自助晚餐～以满布雪花纹的澳洲及美国和牛入馔，包括泰式和牛沙律，酸酸辣辣够晒开胃，正式开餐前食就最啱。灸烧和牛寿司油花丰富，略烧後逼出油份，入口油润细嫩，配埋自家制烧汁更惹味；吉列和牛粒外脆内嫩，牛味浓郁。另有韩式和牛饭卷、和牛印度脆包及巴东和牛咖喱等。亦供应多款可持续发展海鲜，包括可持续发展波士顿龙虾三味、越南海虾、加拿大海螺、新西兰青口、阿拉斯加鳕场蟹脚等。

供应时间：由8月1日起至11月30日

「味游澳洲」 自助晚餐 荟景

虽然而家又去得返旅行啦，但有时远嘅国家都唔系咁易就时间去到㗎～如果想喺香港感受澳洲风情，可以试下呢个「味游澳洲」自助晚餐，选用由澳洲空运到港嘅食材，重点系唔同嘅海鲜。如澳洲生蚝肉质鲜甜饱满零杂质，配以柑橘姜配蟹子汁或柚子红醋令层次更丰富；南澳嘅Kinkawooka青口鲜嫩多汁而且肉质都弹牙。另外当然唔少得肉类啦，即切嘅烧特级澳洲草饲 Mb2+牛肋肉及烧澳洲羊架配杏仁芥末会每晚轮住供应。仲有多款热食如慢煮澳洲和牛面颊及红酒烩澳洲油鸭腿，选择真系劲多元化。

供应时间：2023年7月12日至9月30日

文: Yanica