8月份好评餐厅十强
2017-09-08

嚟到暑假嘅尾声,大家有冇尽情食玩瞓呢?今个月睇嚟日本菜占一半,有香港人长期都支持嘅拉面,亦有新开超人气餐厅,十强之中有唔少新面孔出现,有啲更加系开张无耐已经打入榜,气势认真强劲!闲话唔讲喇,立即同你睇睇8月十强名单!


第10位 吉列牛忌廉乌冬专门店

又系你呀吉生?虽然吉列牛热潮慢慢减退,但呢间来自韩国嘅专门店已成为十强常客,6月曾经入榜,今次再卷土重来。吉列牛以外,忌廉乌冬都系餐厅招牌,白色嘅忌廉令到底下嘅咖喱汁更加creamy,系每枱必点菜式。

图:babyzbbiampandaaaa


第9位 北海道炉端烧 (*新上榜)

呢间居酒屋系来自大阪嘅过江龙,唔好以为一定好贵,走大众化路线,食物就系日本常见居酒屋菜式,好似送酒小菜、寿司、拉面、串烧等等咩都有!招牌菜之一系原个芝士捞意粉,喺客人面前即席制作,芝士味浓,卖相又一流。

图:mk chan chancarykof


第8位 倪姐泰国美食 (*新上榜)

夏天特别想食泰国菜,今次呢间九龙城开业冇耐嘅泰菜馆,食物同格局同上一手都有啲相似,早前$1 promotion吸引唔少人去食。食泰菜梗系要食生虾、冬荫公、咖喱炒蟹,呢度仲有坊间较少有嘅船河,汤底够浓,好有泰式地道风味。

图:PintzFoodcaptain.hk


第7位 办馆 (*新上榜)

呢间咖啡店最近将版图扩张,去埋旺角插旗!咖啡固然唔错,食物同样系港式轻食为主,好似番茄汤通粉、沙嗲安格斯牛肉捞丁,最出名嘅温泉蛋芝士多士当然继续供应。不过呢度大部分都系吧枱位,未必坐得咁舒服。

图:Wen~~~noknokyuen


第6位 芝乐坊餐厅

已经系第4个月打入十强,人潮开始有减退迹象,反而唔使排咁耐就食到,午餐更加容易入座!芝士蛋糕系必叫是常识,餐牌有咁多选择点拣好呢?比较多人柯打嘅包括牛油果鸡肉沙律、四重奏芝士长通粉、炸芝士通心粉球等等,唔知要帮衬几多次先食得晒呢?

图:babyanki惜食识食


第5位 十和田总本店 (*新上榜)

香港寿司店好极端,一系就系连锁店,一系就系omakase级数,选择实在唔多。呢间新店就填补中价路线嘅空隙,有日本师傅驻场,寿司系手握唔系机制,质素相当唔错。蟹膏沙律、松叶蟹三味同拖罗三味更有日本名店美登利影子。

图:eat_eat_everydayCeliaHing


第4位 Tartes & Pop (*新上榜)

甜品一向受欢迎,呢间法式挞专门店由法国人开设,开业接近两件,储落好多fans,更被誉为系全港最好食嘅挞!每日大约有十款,更不时推出特色口味,好似mojito、香橙伯爵茶、芒果椰子等,件头细细唔腻,买返屋企做饭後甜品就perfect。

图:ChungYanyan4313anssicaaa


第3位 蜀大侠 (*新上榜)

麻辣火锅上位喇!海底捞未开业,已经有一大堆国内名店抢先插旗!呢一间喺大陆有成200间分店,好多名人帮衬,香港店装修及菜式都充满中国色彩。麻辣锅汤底用多种辣椒香料熬成,一片红油就知辣度劲,配料卖相靓,必吃鹅肠、鸭血等内脏。

图:技巧树熊Kikivicki


第2位 金田家 (*新上榜)

拉面不死系真嘅,呢间曾经被选为福冈最佳拉面,喺铜锣湾拉面战区登龙街站稳住脚,更杀入元朗开分店!供应传统猪骨拉面、鸡汤拉面,亦有创新嘅黑松露、松茸豆乳同柚子辛口拉面。汤底浓郁,而主角之一系煮得火侯刚好嘅溏心蛋!

图:mantung88为食MoJil


第1位 FLIPPER’S (*新上榜)

毫无悬念,未开业已经哄动坐城震惊13亿人,呢间来自日本嘅奇蹟之班戟,一开业即勇夺第一位并唔系奇蹟!梳乎里班戟卖相靓,软绵又有空气感,而且位於人流旺盛嘅铜锣湾,完全俘虏一众甜品fans,即使要排队都在所不惜!

图:BoBo_Chow926Luminol



文:Perrins

关键字
十强
排行榜
吉列牛
居酒屋
泰国菜
西菜
寿司
甜品
麻辣
火锅
拉面
班戟
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】最後倒数!即将结业的老字号及人气小店
2020-07-21
【随时更新】零食速报 每周新款零食、酒品点评
2020-07-31
全城抗炎!屋企都叹到三层架下午茶 Tea Set外送/外卖自取推介
5天前
全城抗炎!北角酒店最新应变 自助餐都有得外卖?
2020-07-17
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-07-30