2012年创立嘅本地咖啡品牌牧羊少年全新概念店「牧羊少年与他的浮萍」最近进驻尖沙咀文化中心,为进一步推广本地文化,新店结合餐饮、酒吧、文艺三大概念於一身,不时举办展览、工作坊等活动,同时提供更宽敞更舒适嘅用餐环境。
新店位於文化中心地下,大玻璃窗采光度高兼望到部分维港海景
文化艺术x漂书区推动交流
文化艺术区域用作举办展览及工作坊,令本地文艺同大众有萍水相逢嘅机遇
牧羊少年与他的浮萍占地约6,000平方尺,主要分为三大区域:咖啡室及餐厅、酒吧(预计9月初开业)、文化艺术场地。文艺区会同本地艺术家及工艺师合作,以推广文化为目标,可以用作举办唔同嘅展览、工作坊、研讨会、播映会、音乐会、文艺市集等。各位艺术家或文化工作者如果有兴趣,之後亦可以到餐厅网站预约场地,或提议合作活动。
新店依然会有漂书及「未来的信」代寄服务
大家一开始对牧羊少年咖啡馆嘅印象可能系香港首间旅游主题Cafe,又或者系有得漂书。新店文艺区亦继续设置漂书架,畀大家交换书籍、鼓励阅读。漂书所得收益会定期拨作慈善及文化项目。旁边嘅明信片唔单止可以买走,更可以写完之後用「未来的信」代寄服务,由餐厅喺五年内指定时间代为寄出。
Cafe全新Menu登场
慢烧保湿三黄半鸡伴烧新薯及粟米笋($228)
新概念店Menu亦偏向精致西餐,开饭仔私心大推嘅系呢道慢烧三黄鸡,将脂肪丰盈嘅三黄鸡先浸盐水,令鸡肉更软嫩多汁,然後风乾再生焗,得出鸡皮香脆透薄、鸡肉滑溜Juicy嘅丰富口感。鸡肉本身已经有肉香同咸味,亦可以加烧汁或者配菜增加变化。
龙蒿明太子忌廉大虾扁意粉($138)
龙蒿系一款香港较为少见嘅香草,味道甘甜,喺西餐当中经常配搭白肉同海鲜。大厨就选择加喺明太子忌廉汁当中,唔会盖过明太子嘅咸香同忌廉嘅Creamy,同时令酱汁变得更清爽唔腻口。加上肉质爽口嘅大虾,味道讨好。
丰富早午餐·甜品推介
素食早午餐($128连自选饮品)
中午嚟可以选择英式早午餐,同二/三道菜午餐。跑「素」朋友绝对要点呢份素食早午餐,有齐蜜饯日本南瓜、牛油果、蓝莓Granola希腊乳酪、意大利黄瓜、澳洲西兰花苗、焦糖扒茄、烧杂菌、无花果核桃酸种多士。当中蜜饯日本南瓜系加咗蜜糖再烤,味道加倍香甜。
伯爵茶焦糖炖蛋($68)
食Lunch可以加点小食同甜品,包括伯爵茶焦糖炖蛋。制作蛋浆嘅时候加入伯爵茶叶,食落茶香馥郁嘅秘诀系要花时间以低温充分闷焗出茶香。加上炖蛋焦糖脆面香甜带焦香,甜而不腻。大厨建议加埋金宝落去一齐食,口感更丰富。
酒吧必点冷·热Tapas
酒吧预计9月初开业,设有舞台,可以举办音乐会或栋笃笑等活动
伊比利猪背油薯条($68,午市套餐+$48)
Happy Hour除咗必需酒,当然唔少得送酒小食啦,餐厅亦推出一系列Tapas。比较特别嘅有呢份伊比利猪背油薯条,顾名思义炸薯条嘅时候加咗伊比利猪背油,难怪一送上枱就闻到浓郁猪油香气!薯条偏幼身,外脆内棉,加埋蒜蓉同少少盐,趁热食好快就清晒。
盆盐橙肉薄切日本北海道带子($118)
盆盐系酿晒豉油时喺缸底结晶而成嘅盐,比一般嘅海盐多一分豉油嘅发酵风味。厨师就以盆盐为北海道带子提鲜,再配搭三文鱼子、橙肉,同柠檬皮。开饭仔就觉得盆盐可以少啲啲,而家略嫌盖过带子甜味。
新出创意咖啡·冷压果汁
菠萝迷迭香清茶咖啡($58,午市套餐+$36)
饮品方面亦有新嘢,例如呢杯好啱香港夏天饮嘅菠萝迷迭香清茶咖啡,先以菠萝、迷迭香打成基底,再倒入四季青茶、Espresso,最後以柠檬乾及迷迭香点缀。影完相记得搅匀再饮,闻落系迷迭香嘅芬芳,入口就系咖啡嘅醇香同菠萝嘅酸甜交织,茶香唔太突出,整体清爽醒神。
(上)玛琪雅朵($34,午市跟餐免费),(下)牛奶咖啡,($44,午市套餐+$18)
咖啡试业期间选用印尼单品豆,预计之後将会转为本地炒豆嘅埃塞俄比亚同巴西拼配豆,取其前者嘅花果香同後者嘅甜味同Body。另一特色系呢度系坊间少见玛琪雅朵都会有拉花!
(左)冷压苹果甘笋香橙($62,午市套餐+$36),(右)抹茶牛奶($46,午市套餐+$18)
想健康啲呢度亦有冷压果汁,图中呢杯橙色嘅就落咗苹果、甘笋同橙,甜甜哋唔会有有草青味。另有葡萄西柚蜂蜜、青苹果西芹蜂蜜、奇异果青瓜羽衣甘蓝蜂蜜选择。抹茶牛奶分层亦好啱打卡,口感柔滑,茶香有回甘。
餐厅外系文化中心嘅水池,加上水泥中岛座位同植物摆设,呼应店名「浮萍」
餐厅将於9月24日正式开张,届时将会举办特别活动
牧羊少年与他的浮萍
地址:尖沙咀梳士巴利道10号香港文化中心地下
文:Cathy.H
相:Sunny