唔少人都觉得将军澳系美食沙漠，想搵啲好嘢食都难，不过最近就有间台湾菜进驻啊！餐厅食物主打台南口味，材料八成由台南进口，所有师傅都有亲自去台南考察，味道够晒正宗。装修方面都好有心思，文青风格，以木色为主调，墙壁上有满满嘅书本同打气字句做装饰～

三盛红烧牛肉面

牛肉面可以话系台湾菜嘅代表之一！首先讲吓最重要嘅汤底先，汤底用上50斤牛骨、红罗白及洋葱熬制而成，味道有浓浓牛香之余仲好清甜。而面底就选用台湾手打面，弹牙有口感！配料腱心牛肉、牛腩、牛丸一样在水准之上～

盐酥鸡扒卤肉饭

食肉兽食呢个就啱晒！卤肉用上台南进口卤肉，盐酥鸡扒亦选用美国鸡髀肉，肉厚之余外炸得好香脆～

台式鸡肉饭定食配凉菜、葱油时菜及紫菜鱼丸汤

唔想食得咁肥，都可以试试呢个鸡肉饭。同样沿用台南配方，香气十足。不过因为台南口味有少少偏甜嘅关系，师傅故意将甜度减低，迁就返港人口味～而上层嘅自制炸油葱都有锦上添花嘅效果！

卤水猪手饭、煲仔塔香三杯鸡饭

猪手慢煮四小时，外皮够腍仲有咬口，肉都好入味～另外三杯鸡饭都系用三黄鸡，鸡件先用麻油炒香，最後加埋九层塔就香上加香啦！两味都系送饭之选啊～

餐厅供应多款小食，呢个桂花蜜糖鸡翼皮脆多肉汁，点埋桂花蜜糖食可以清除油腻感。另外仲有古早味卤水拼盘、椒盐花枝丸、煎手工馅饼 配原味豆乳等，选择真系好多！

饮品方面有一系列健康主题饮品，如桂圆杞子菊花冰茶、夏日水漾鲜果茶、蜂蜜柠檬芦荟 同梅子金萱冰茶，另外都有紧贴潮流之选嘅芝士奶盖饮㗎～

最後一提餐厅而家举行咗一个漂书活动，只要拎两本书藉(不太於20cm)就可以换取店内书籍一本或$10现金券，不过就唔接受杂志、漫画、写真同埋内含色情、暴力、意识不良嘅书籍。

四季良晨

地址: 将军澳贸业路8号新都城中心2期UG楼UG051F号舖

文、相、片: Yanica