之前就介绍咗红馆同九展附近有咩好食畀大家，今次就到旺角嘅麦花臣场馆，一样等大家食饱饱储足精力去睇show！嚟紧有舞蹈表演Dance To Infinity、Clockenflap Presents长达8小时嘅串烧现场音乐表演同本地乐队野佬都会喺麦花臣开show～讲到旺角嘅餐厅选择真系多到眼花撩乱，所以开饭仔精选咗几间畀大家，有特色cafe、乌冬专门店、人气车仔面店、平民泰国菜同千层蛋糕店！
穷人卖咖啡 GRIND SIZE 
以「穷人卖咖啡」作主题嘅玩味风咖啡店，装修就系典型嘅纯白色配以乾花装饰，环境阔落坐得几舒服～食物方面推介呢个被称为「品•三」嘅甜品，顾名思义即系一个有晒三款甜品，包括黄豆奶盖团子、咸蛋黄拿破仑同焙茶豆乳卷蛋，最推介咸蛋黄拿破仑，咸蛋嘅咸味有助中和返吉士嘅甜腻，配埋松脆嘅酥皮恰到好处！咸点方面明太子流心蛋饼都几受欢迎，一将蛋皮切开真系有满满流心效果，入面系软绵绵嘅薯仔同牛油，再带淡淡明太子咸香，有惊喜。餐厅仲有供应多款主食同甜品，好似自家制芝麻提拉米苏、沙嗲牛面珠登意粉同避风塘龙虾堡都几值得食。
同麦花臣距离：步行约5分钟
图: kkkkaykayleung、charlottemuimui
石锅乌冬专门店 石锅堂
家庭式经营嘅乌冬小店，乌冬会用特制石锅呈上，保证客人食到最後一啖都仲系热辣辣，石锅嘅热力仲会令汤底嘅味道入哂乌冬到。汤底选择有五款，而且每一款都足足熬咗12小时，好有诚意。黑松露香菇汤用咗牛肝菌、天使菌、上等菇乾等八种菇类同日本空运乾菌熬成。食落菇菌味香浓，味道鲜甜。山地狱辛辣汤即系泡菜辛辣汤，汤底用咗大厨自己调制嘅泡菜去熬，辣度适中，同时保留住泡菜嘅辛香味同酸味，好开胃！配料方面有厚切豚肉、安格斯牛肉同鲜活蚬等，乌冬控必去！
同麦花臣距离：步行约6分钟
图: 欀霜
人气千层蛋糕 Lamlam脷
睇show前想食下甜品，呢间超人气嘅千层蛋糕店就啱晒。本身系网店，後尾於太子开设实体地舖，最近更搬至旺角楼上舖开Cafe！千层蛋糕每日口味都可能有啲唔同，招牌抹茶流心千层蛋糕，班戟皮薄身同幼滑嘅cream层层相隔，入口有慢慢溶化嘅感觉，抹茶味浓厚带微甘，出色！伯爵茶千层蛋糕一样咁受欢迎，伯爵茶味好香浓，甜度恰到好处。新店仲有埋巴斯克蛋糕卖，芝士味浓郁入口幼滑，又多一个选择～
同麦花臣距离：步行约7分钟
图: foodiechans
港式地道车仔面 阿四车仔面
喺旺角区都几有口碑嘅车仔面店，除咗份量够晒大外，唔少配料都系自家制。首先卤水腩肉，卤到入晒味，肥瘦双间清晰可见，一入口唔会觉得成口油，邪恶都要食呀！炸墨鱼卷都系必试之选，香脆之余好弹牙，仲食到粒粒墨鱼，另外炸豆腐同卤大肠都做得唔错。如果有选择困难症，可以食$60嘅招牌面，有齐辣鱼蛋、辣鱿鱼、猪皮、猪大肠、鸡翼尖、萝卜、卤水蛋、瑞士鸡翼同猪红九款餸，啱晒大胃王。
同麦花臣距离：步行约4分钟
图: 山区面包王
平民泰国菜 阿来东南亚风味
一间性价比几高嘅泰国菜，虽然装修就较普通但食物质素几好又抵食！好似$258二人套餐，已经包一份泰式卤猪髀或泰式海南鸡、生虾刺身、泰式肉碎生菜包、白饭或油饭两碗同饮品两杯，生虾刺身新鲜弹牙，个汁都好开胃；泰式肉碎生菜包香辣惹味，仲炒得好有镬气添。另外泰式金边粉都几推荐，酸、咸、甜味恰到好处，味道几地道！
同麦花臣距离：步行约4分钟
图: 文: Yanica