唔少人去大阪玩都會食當地名物串揚（又名串炸），即係將各種食材用竹籤串起，裹上麵衣炸至金黃香脆，再沾醬汁享用。香港其實都有串揚專門店，由日本過江龍到本地實力小店，三五知己想飲住生啤嘆串揚嘅話，總有一間啱心水！
 

目錄

串揚廚師發辦體驗 串亭

呢間今年年初新開嘅過江龍嚟自東京惠比壽，喺日本有10間分店。而海外首店坐落尖沙咀，由日籍料理團隊主理，標榜選用使用百分百新鮮葵花籽油，絕無回鍋油！心大心細咩都想試嘅話，首推10道或12道串揚廚師發辦料理菜單，當中更包括香港店獨有嘅炸特製冬菇免治肉串同炸生麩配帕爾瑪芝士串啊。

大阪新世界名店 Jan Jan 串揚專門店  

同樣係海外首間分店，呢個品牌就嚟自串揚發源地大阪新世界。香港店嚴選三種優質植物油調配成專用炸油，配合發酵半日嘅特調粉漿，可以保留食材原味，亦令炸衣薄脆香口而唔油膩。除咗串揚常見嘅肉類同海鮮之外，更不時推出廚師限定嘅時令料理。例如之前就曾經有海膽祭、鰤魚三食等。

銅鑼灣串燒串揚小店 岳川串揚 

銅鑼灣呢間小店位於休憩處旁邊，地點就腳得嚟又旺中帶靜。睇店名就知主打串揚，而選擇亦夠多元化。天使之海老、北海道帶子串、廣島蠔、帶子三文魚籽等海鮮特別受歡迎，炸衣香脆、而且裡面無論係肉定海鮮都鮮嫩有肉汁。串燒同樣有好多款，煙肉青提卷外鹹內甜幾過癮。更有小食畀大家送手工啤酒或者清酒。

訂座優惠：午市全單9折

大角咀高質炸物餐廳 吉勝吉列串揚專門店  

鍾意炸物嘅朋友仔，唔好錯過大角咀呢間主打吉列同串揚嘅日本菜餐廳啊。唔同串揚都有水準，麵包糠薄得嚟夠脆同乾身，唔怕食到成口油。而且配搭有心思，子持昆布係用昆布包鯡魚子，咬落脆卜卜；紫蘇雞肉加入新鮮紫蘇葉，增添香氣。吉列豬扒套餐同樣有唔少捧場客，芝麻可以自行磨碎，加埋落醬汁度更加香口。

圖: jes.y.s

紅磡人氣居酒屋 火夫 

雖然紅磡呢間居酒屋係憑虎蝦濃湯拉麵喺網上拉麵關注組打響名堂，但其實佢哋嘅串燒同串揚一樣出色。推介串揚包括蟹肉牡蠣、芝心茄子、櫻花蝦豆腐、雞肝啡菇等，特別係蟹肉牡蠣，喺外酥脆內Creamy嘅炸蠔上面放上大量蟹肉絲，雙重鮮味享受！而且呢間居酒屋有多款冰串燒酎、生啤、清酒等選擇，更設有120分鐘暢飲放題。

圖: Penguin Blog

文：Cathy.H