4cm厚班戟+招牌刨冰抵港!京都人气甜品铜锣湾店直击(有片)
2018-09-12

有好消息畀各位甜魔们:呢间嚟自日本京都,喺东京同大阪都有分店嘅人气日式甜品专门店,首间海外分店现已登陆铜锣湾!必试招牌厚烧班戟 ,即叫就即制口感扎实。刨冰仲要系用原材料制冰,啖啖真材实料。

雪ノ下香港第一间分店位於铜锣湾希云街,而品牌本店就喺日本京都,主打日式厚烧班戟同刨冰,亦有供应咸点,同手冲咖啡等饮品。
 


橘子蜂蜜班戟($68)

班戟有五款口味,全部选用广岛鸡蛋同雾岛牛奶制作,即点即制所以要等15至20分钟。想试到最原始味道嘅话就可以选择橘子蜂蜜口味。即系原味班戟配爱媛县小池养蜂园嘅蜜柑蜂蜜,同宫崎县高千穗发酵牛油。
 


厚烧班戟约4cm厚,食落同之前大热嘅梳乎厘班戟口感完全唔同,里面相当湿润扎实,味道带淡淡蛋香,而且啡色嗰层食落有少少脆口,淋上蜂蜜味道甜而不腻,系实在嘅幸福感。
 


抹茶班戟($78)

而抹茶控唔好错过呢度嘅抹茶班戟,京都宇治抹茶口味嘅厚烧班戟洒上糖粉,以忌廉、北海道黑豆、京都黑豆同抹茶粉点缀,可以按自己喜好再倒上抹茶酱。
 


绵密嘅班戟食落甜度适中,唔会盖过抹茶茶香同独特嘅回甘。配埋煮至香甜软绵嘅红豆当然夹,值得一讃嘅系忌廉都系餐厅自家打发,食落有浓郁奶香,配抹茶班戟唔腻之余仲增加柔滑口感。
 

更多【新店直击】:
1. 「台风」袭港!人气精品火锅店登陆尖咀 必叫靓靓玫瑰松板
2. 九龙湾新开面食专门店 必试骨胶原牛美番茄汤面
3. 国内人气太二酸菜鱼 美国店班底铜锣湾开店

 

日本生姜刨冰($68)

刨冰系品牌另一主打,采用日本低钙同低镁离子含量嘅天然软水加原材料制作,好似呢个日本生姜刨冰就会先将高知县黄金の里生姜糖水雪成冰,再用同日本店一样嘅刨冰机将冰块刨成碎冰!中间再加牛奶雪糕同生姜酱。
 


平时食到嘅刨冰大部分都以甜味为主,而呢款日本生姜味道带少少辛辣,同刨冰嘅冰凉感对比起嚟相当有趣。加埋牛奶雪糕一齐食,好似食紧刨冰版嘅姜汁撞奶!冰粒系一贯日式刨冰嘅大细,碎而留有口感。
 


广岛鸡蛋三文治($58)

除咗甜品,香港店亦有提供几款咸食,好似呢份三文治中间就夹咗使用广岛鸡蛋嘅厚烧玉子同芥末籽,蛋控必食。
 


睇到呢度或者你会发觉品牌对食材好有要求,而香港店同样所有食材都由日本进口。无论班戟定刨冰香港店之後都希望可以推出新款,包括计划9月底登场,富本地特色嘅香港限定口味;同跟返日本当地,以唔同季节时令鲜果为主嘅期间限定口味!

而香港店嘅厨师都去过日本训练半个月,直至佢地整过Menu上所有出品畀客人,日本亦有代表嚟香港帮助监控品质同训练员工,保证大家食到嘅味道同日本一样。
 




雪ノ下
铜锣湾希云街1-5号礼信大厦地舖
*试业期间营业时间为18:00-22:00,预计17/9正式开张




文、相、片:Cathy

关键字
铜锣湾
班戟
刨冰
Pancake
甜品
雪ノ下
雪之下
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
2020-09-11
全城抗炎!屋企都叹到三层架下午茶 Tea Set外送/外卖自取推介
2020-09-18
悠闲时光 9月份下午茶推介
2020-09-02
【9月生日优惠】最低至半价!生日平食放题.韩式炸鸡
2020-09-02
油麻地新开小木屋Cafe 叹西日Fusion龙虾汤乌冬配咖啡
2020-09-08