4月份好评餐厅十强
2021-05-06

又嚟到每月报榜嘅时间!4月份嘅十强名单,整体嚟讲都系以装修有格调嘅café为主,睇嚟食饭同打卡已经成为香港人密不可割嘅日常。

第10位  Lady Nara(*新上榜)

 图:ctang927holidaymood2020

以梦幻粉红色做餐厅主题,喺起跑线上已经先赢到一众女生欢心,再加多张打卡专用嘅藤造秋千,就更易得到人气。食物质素都有一定水准,龙虾冬荫意粉同香茅烧鸡系香港限定嘅菜式,前者啖啖龙虾鲜香;後者用咗18款香料腌制,一听就知够晒香浓。

第9位  九份饱(*新上榜)   

 图:sogoodwithfoodliuliu1234

挂住台湾美食嘅朋友,嚟到呢度应该可以满足到。香酥鸡扒鲁肉饭只系40几蚊,大大块鸡扒炸得香脆,同时仲好juicy。鲁肉饭酱汁香浓惹味。食完唔使走下场,呢度有埋甜品直落,仲系大家嘅飞佛烟韧芋圆,一碗有齐仙草、芋圆、珍珠、地瓜圆等,相当足料。

第8位  济洲烧肉食堂(*新上榜)   

 图:juilletkinkiagnesng

望住个海食韩烧会唔会太chill?有多款牛肉选择,豪快和牛烧油花较多,入口即化;特选黑毛和牛上贝身肉嘅肉味浓郁,啖啖肉汁,各有口感。炉边蛋同芝士仲可以任食添。Lunch时亦有提供熟食套餐。

第7位  福冈汉堡扒

 图:hkfoodphotoPenguin Blog

呢间嚟自韩国嘅石烧和牛汉堡扒餐厅再次上榜,足证佢嘅受欢迎程度。大部分客人当然系为咗佢哋嘅100%澳洲和牛汉堡啦,芝士蛋和牛汉堡、芝士蛋蒜和牛汉堡、墨西哥辣椒和牛汉堡、菠萝烟肉和牛汉堡等,几款口味全部自己烧自己食,脆脆地又有肉汁,过足瘾。

第6位  哈豆(*新上榜)  

 图:Miss叮kathy889

又一间台湾料理上榜,呢间系由台湾人开架,供应各式各样嘅台湾美食,无论系牛肉面、卤肉饭、咸酥鸡定系吐司等都有。好多人嚟到都会嗌份芋见柠奶冻吐司,爆焰架,芋泥绵密香滑,仲有清新柠檬碎中和返,唔使怕腻。另外推介台式麻油鸡汤,汤头清甜,鸡肉嫩滑。

第5位  No Money So Lonely(*新上榜)   

 图:kanaheipp侧民

以怀旧玩味风格装修作招徕嘅呢间餐厅,原来系人气café Mamaday嘅姊妹店,唔怪得个feel咁似。餐厅同样得到大众喜爱。推介啖啖蟹肉担担饭,冇改错名,真心啖啖蟹肉,仲有蟹籽添,带微微辣香。芫荽党员就必点牛油果芒果芫荽沙冰啦,浓浓嘅荽味过後就会有芒果甜架喇。

第4位  斋啡(*新上榜)  

 图:食神大妈 Foodie AuntieKeilwk

以白色为主调café,总系有种难以抗拒嘅吸引力,可能系容易畀人一种舒服relax又好打卡嘅感觉啦。呢间café都唔例外,佢哋供应多款自家制作嘅轻食,同埋无蛋奶嘅纯素食品。最受欢迎嘅甜品系纯素榴槤蛋糕,加入新鲜果肉制作架,真材实料!而latte则选用燕麦奶冲制,想要香甜口味嘅可试焦糖竹炭latte。

第3位  牧羊少年咖啡馆    

 图:DesireforFoodnyung0609

多得港岛区朋友嘅爱戴,将呢间café再次推入十强榜。推介日式大阪烧风味烟三文鱼薄饼,大阪烧酱汁酸酸甜甜,烟三文鱼又有淡淡烟燻香,连埋木鱼碎同紫菜丝,就好似食紧脆口嘅大阪烧咁。香煎黑椒蒜蓉日本帆立贝鲜味十足,仲渗有阵阵牛油同蒜蓉香。

第2位  十二锅(*新上榜)

 图:starthysasaCwongx

想打边炉又想安全卫生啲,一人一锅就啱晒。呢间火锅店仲有12款汤底选择,深得火锅之友欢心。食得辣嘅就唔使谂啦,一定拣台式麻辣锅,用豆瓣酱、花椒、辣椒、洋葱等炒香过嘅汤底麻香刺激,配埋鸭血、牛肉、台式蛋饺等真系冇得输。想要养颜嘅就有美肌牛乳锅,花胶、鲜淮山、虫草花等,够晒滋润。而多款食材、配料都系由台湾直送。

第1位  何兰正(*新上榜)

 图:ahhbeRaindybabe

一向深受beergeeks欢迎嘅呢间餐厅,最近搬咗新舖位,转咗做楼上舖,装修更怀旧,既有旧式通花铁闸又有霓虹灯,比起旧店更多打卡位置。酒水食物方面继续保持水准,招牌菜顺德风情双籽三文鱼他她配香脆云吞皮不能不试,口感丰富;24小时慢烤伊比亚叉烧配猪油饭亦系推介,系肥仔架喇,但慢煮猪肉肉质软腍而又有燶边效果,捞埋猪油梗系香口,食咗先算啦。


文:Kar


关键字
十强报榜
好评十强
十强名单
中环
铜锣湾
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【2021生日优惠】持续更新!9月寿星叹Omakase送寿司蛋糕+清酒
2021-08-31
【随时更新】零食速报 每周新款零食、酒品点评
7天前
【特约分享】Happy Hour饮番杯Schweppes®期间限定特饮!9间必去铜锣湾餐厅(下)
2021-08-31
Chill住叹Tea!9月份下午茶推介
2021-09-06
8月份好评餐厅十强
2021-09-08