3月份好评餐厅十强
2020-04-03

3月上榜嘅有唔少都系星马日台菜式嘅餐厅,可能大家呢排都冇得飞,惟有搵地道嘅餐厅去食住止一止瘾先。另外,亦有啲新开冇耐嘅小店,强势入围,值得鼓掌啊。

第10位  肉骨皇(*新上榜)

 图:mylittlegourmandiris2002208

想食马来西亚同新加坡嘅肉骨茶,可以去大坑会一会。呢间嘅肉骨茶色泽深,药材味香,浓中带甜,猪肉仲好腍身添,配埋米粉同油炸鬼就最夹。如果饮晒唔够喉仲可以免费添汤。

第9位  素年(*新上榜)

 图:SAlytSnappyinHK

素食文化愈嚟愈多元化,呢间餐厅主力提供日式同西式嘅素食,部分蛋奶素菜式仲可以转做全素或者走五辛,素食人士嘅选择都可以好丰富!大力推介素汉堡,块肉系以Impossible™ Meat植物牛肉制作,口感同真牛肉几似,一样juicy。

第8位  茶聊   

 图:tabosukileesinsin

松软到会弹弹下嘅梳乎厘就梗系治癒,但更多人应该会系为咗块百洁布嚟!讲紧嘅系呢份造型似到十足嘅百洁布蛋糕,原来系柠檬芝士蛋糕,酸酸地几清新,口感软滑,有外表又有内涵,唔怪得咁受欢迎。

订座优惠:获送梳乎厘乙个(价值$88) (只限消费满$300)

第7位  Bellevue Bar and Grill(*新上榜)  

 图:识食小姐jennyk1523

牛魔王要搵肉食,呢间设有熟成肉柜嘅餐厅当然系名单之内,由前星级酒店行政总厨主理,质素有保证。无论系美国特级安格斯肉眼扒定系碳烧西冷牛扒,叫五成熟就啱啱好,啖啖肉香仲有肉汁。甜品推介伯爵茶朱古力挞,甜中带茶香。

第6位  马祖台湾养生汤面馆(*新上榜)

 图:kwannicolelai猫猪猪

新开冇耐就可以上榜嘅呢间火锅店,一人一锅,晚巿仲做埋90分钟火锅放题,完全解决晒一班火锅控想打边炉但又怕同人同煲嘅烦恼。9款汤底选择包括有麻辣、蕃茄、椰子等等,特别推介系药膳虫草花桃胶鸡汤,滋润养生呀,牛肉仲要有高级嘅Prime Grade拣!

第5位  Check-In Taipei   

 图:lankiman6330Voracious

呢间台式餐厅几时都咁受欢迎,蛋馅馅料多多,又有新意,最受欢迎嗰款肯定系脏脏紫薯麻糬蛋饼,个样又靓,食落又啖啖紫薯蓉香,仲有烟韧麻糬,口感丰富。正餐叫多款溏心蛋卤肉饭,满满油香,只蛋更加系bonus。

第4位  Homeland(*新上榜)

 图:karccyoyo454

最近先新开嘅餐厅,仲可以短时间内冲上十强榜,靠嘅系店主嘅心机同诚意。小店主打每日新鲜制造嘅手打意粉、手工薄饼等,特别推介墨汁乌冬,鲜爽弹牙,样样都系手工嘢,深得大埔街坊支持呀。

第3位  十和田总本店

 图:LiLingWongWincyholic

冇得飞日本系会特别想食日本嘢,呢度由资深日籍寿司师傅主理,食材每日由日本空运到港,寿司选用赤醋饭,味道微酸亦更香醇。寿司以外最受欢迎嘅应该系三色丼,细细碗但三碗都劲吸引,海胆啦、蟹膏蟹肉啦,仲有吞拿鱼蓉。

第2位  花斑茶社(*新上榜)

 图:foodiettFoodjiwara_or

呢间茶饮店嘅茶底,采用嚟自台湾南投嘅茶叶,茶味更香浓突出,主力卖黑糖珍珠、鲜奶茶同果茶等。珍奶控拣黑糖珍珠厚鲜奶就实冇错,劲多珍珠呢,有成三分一杯咁多,甜甜地好有咬口。白桃乌龙亦系推介,仲有丝丝桃肉食到!

第1位  Wagyu Ya (*新上榜)

 图:vvny觅食小姐

榜首位置由今年年头先开嘅烧肉店夺得,主打JA鹿儿岛直送和牛,牛肉拼盘有齐牛舌、牛小排、牛三角、西冷等唔同国家同部位嘅肉,牛舌厚切薄切都有,咩口感都食到!牛魔王不能不试。呢度仲有大热吉列和牛三文治啊,外脆内嫩,加埋海胆嘅话真系满分。


文:Kar

关键字
十强名单
好评十强
报榜
牛肉
火锅
尖沙咀
大埔
大坑
旺角
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】零食速报 每周新款零食、酒品点评
2020-06-26
食豪啲啲 城中5间海鲜+肉扒父亲节自助餐
2020-06-10
至甜初夏 6月下午茶推介
2020-06-15
湾仔新扒房只卖$298黑安格斯牛扒套餐 任食薯条+超松软肉桂牛油餐包
2020-06-11
甜蜜蜜暑假 7月下午茶推介
6天前