3月份好评餐厅十强
2019-04-09

嚟到三月份嘅报榜,可以话系日本嘢嘅天下,十间入面有一半都系日式美食,包括浜烧、拉面、pancake等等,气势好强!

第10位  缘屋 札幌元袓虾汤拉面(*新上榜)

 图:koralaKikivicki

拉面几时都系香港人嘅飞佛。呢间嚟自北海道札幌嘅拉面店,主打香浓虾汤底。使用嘅虾头同虾汤都系日本直送过嚟,甜虾头就会再喺店内烤焗,所以更觉鲜香。香港其他拉面店多数都系猪骨汤底为主,咁有风味嘅虾汤拉面自然容易上位啦。

第9位  釜之魂釜饭专门店

 图:SAlytskyred0414

九龙湾呢间釜饭店再度上榜,招牌鳗鱼饭几时都系佢哋嘅招徕,又大份又香口嘛。煮饭嘅高汤用上北海道罗臼昆布、鹿儿岛鲣节等熬成,有鲜味。餐厅设有半开放式厨房,客人可以睇到特制蒸锅煮饭嘅过程,吸引度系又再高咗嘅。

第8位  渔获浜烧(*新上榜)

 图:mint_smoii相机食先

铜锣湾间人气浜烧店,去到尖咀开分店之人气依然旺盛,仲马上就打入十强榜。餐厅继续提供由日本新鲜运到嘅海鲜畀客人可以慢慢烧嚟食,好似活帆立贝、鲍鱼、生蚝、松叶蟹脚等。生蚝饱满多肉,鲜甜,帆立贝同鲍鱼入口弹牙鲜爽,海鲜控大爱。

第7位 刕舙馫面馆(*新上榜)

 图:WongDaniel1471chebiko

位於红磡嘅面馆小店,主力提供刀削面同麻辣小菜。推介麻辣牛筋腩刀削面,自家制麻辣酱香口惹味,面条有咬口,而牛筋腩就整得好腍好入味。btw,想个舖名点读可以查下字典啊。

第6位 浜烧太郎(*新上榜)

 图:carykoflamyeeeee

第6位都系浜烧餐厅,呢间系喺将军澳嘅,除咗烧海鲜之外,另外仲有多款刺身、寿司、串烧等,餐牌种类丰富。不过讲到最吸引,应该点都系甲罗烧。蟹膏蟹肉再加鹌鹑蛋,一路烧一路已经闻到啲香味,食落就更加浓香。

第5位  冬荫NOODLE(*新上榜)

 图:Food Adventurerzackhung

香港有唔少泰国菜餐厅,但呢间特别在於以泰北农村口味做主打,佢哋都有传统泰国菜食嘅,不过都系用咗新潮手法去处理啦。好似泰北牛船河咁,就以泰国新鲜香草加大量牛骨熬制而成,汤底浓郁鲜甜,鲜牛肉生熟度刚好,口感软滑。

第4位  小黑糖(*新上榜)

 图:eunice2046Wincyholic

估你唔到原来开到成行成巿嘅珍珠奶茶,依然继续有大批拥趸。嚟自台湾嘅小黑糖,当然系主打黑糖珍珠,佢哋嘅珍珠口感烟韧,黑糖味香浓,兼且系每日手炒黑糖砖嘅添。配搭选择多元化,珍珠唔一定要配奶茶嘅,配泰式奶茶、紫薯牛奶都一样咁夹呀。

第3位  鸡翼山

 图:mandylau55ShanLi5129

人气鸡翼专门店今个月微微下跌2位,但仍然保持到三甲位置。佢哋几款招牌鸡翼,玫瑰味、咸柠七、浓味三重芝士等你哋试过晒未先?嚟紧听讲会喺铜锣湾开分店,港岛嘅朋友以後想食就方便好多啦。

第2位  沐白小农(*新上榜)

 图:emmimisswinzie

同样系台湾过江龙嘅茶饮店,不过呢间嘅招牌就系SELL珍珠,而系大甲芋头鲜奶,芋头绵密香甜,好受芋控欢迎。而舖头本身亦主打百分百纯天然无添加嘅饮品,就算用糖,都系用全天然蔗糖或者黑糖,甜度唔会太高。

第1位  J.S. FOODIES

 图:hkfoodeliciousPOTATO_C

今个月重新上榜嘅日式班戟店,仲要进占榜首,状态大勇。粉丝有跟开嘅应该都知佢同Flipper’s同属一个集团,有传统班戟亦有疏乎厘班戟食,仲好多款味道例如印度烤鸡、原只龙虾等都系坊间少见,可以一试。班戟以外,餐厅亦有面食等供应,咁多花款,唔怪得门口成日都要排长龙啦。


文:Kar

关键字
十强
排行榜
九龙塘
班戟
拉面
珍珠奶茶
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】零食速报 每周新款零食、酒品点评
2天前
日本吉列牛排店京都胜牛进驻铜锣湾 黄金六十秒炸法 推介京都胜牛三味套餐
2021-02-18
楚捻记新line!荃湾新开饺子店 必试黑松露什菌饺+香煎潮汕韭菜粿
2021-02-10
食肉兽必收藏!牛年到 五间品牛餐厅介绍返
2021-02-11
1月份好评餐厅十强
2021-02-09