2017年已经过咗第一季，大家有冇周围搵吓新餐厅试试先？睇吓个榜，今个月嘅上榜餐厅相当平均，咩类型菜式地区都有，但就以口碑餐厅、分店为主，暂时唔多见新开食店。唯有继续留意下个月会唔会有新力军杀入十大啦！
第10位 新泰东南亚餐厅 (*新上榜)
食泰国菜除咗去九龙城，湾仔都有好介绍。虽然呢间餐厅已经开咗一段时间，不过一直都保持到水准，几间分店食物质素都好稳定。主打泰国菜，亦有少量印尼、越南及马来西亚等菜式，选择够晒丰富。招牌菜有烧春鸡配香茅饭、日本焗南瓜海鲜饭等等，最紧要价钱唔算价，而且地方阔落，一大班人或者情侣都坐得舒服。
第9位 乌龙烧
呢度嘅串烧系自己亲手烧，相信好多人都想过吓BBQ瘾！每枱都有迷你烧烤炉同调味料，串烧有好多款拣，海鲜好似原只扇贝、生蚝、鲍鱼等都特别受欢迎，当然唔少得三种口味嘅烧鸡翼啦！最特色系竹筒饭，将原个竹筒放喺炉上面烧，亦有煲仔、铁板唔同煮法，有得食有得玩，仲开到凌晨三点，宵夜一流呀！
第8位 ZUC.CCH.ERO (*新上榜)
呢间甜品店一开业已经好瞩目，甜品卖相好靓，最啱来影相呃like。3月推出嘅富士山甜品，蓝白山系乳酪波子汽水蜜瓜芭菲，仲有喷烟效果，富士山下有用蛋糕整嘅青草地，成个造型神似又有诗意，所以难怪早排洗晒板罗！除此之外，另一款樱花树甜品都好吸睛，想试多几款点云石盘下午茶就啱晒。
图：第7位 铁牛台湾牛肉面 (*新上榜)
好想去台湾旅行但又冇时间，唯有食碗牛肉面当去咗！呢间铁牛早前喺旺角开咗分店就即刻上榜，因为舖头由台湾人开设，招牌红烧牛肉面汤底浓郁，牛筋腩焖得入味，几乎系每枱必点。卤肉便当有大碗卤肉饭同配菜，卤肉好丰富。仲有逢甲盐酥鸡、香肠等夜市小食，餐厅系半自助形式，价钱相宜又冇加一，晚市好多人排队。
第6位 Green Waffle Diner (*新上榜)
呢间都算系窝夫店嘅始祖之一，中环店已经开咗好几年，早前在铜锣湾开分店。呢度多咗沙律吧，仲有smoothies bowl等健康食品。除咗唔同口味嘅窝夫，班戟都好多人锺意食，有一款斑兰班戟好出名，青色嘅班戟充满斑兰香味，食落唔会过甜，而且有龙须糖拌碟，卖相好吸引。咸点就以全日早餐、镬仔薯粒最受欢迎。
第5位 薯仔屋
近来兴起party room，其实好多年前已经有楼上café啦！薯仔屋开业咁多年仍然有一大班支持者实有原因。食物唔似一般楼上café咁 参差，薯皮、鸡翼大家share就啱晒，主菜都有烧猪肋骨同意粉等等，唔怕食唔饱。最紧要坐得舒服，仲有游戏机、玩具、漫画同大量board game，同friend子玩足大半日都得呀。
图：第4位 The Americano (*新上榜)
天后Texas Burger的姊妹店，位於工厦入面所以环境阔落舒服得多，除咗汉堡包，亦有沙律、炸鱼薯条等其他款式，比天后店餐牌选择更多。汉堡包以巨型见称，招牌德州烧烤汉堡系必食推介有好烟燻牛肉、烟肉、脆洋葱圈等配料，汉堡牛肉肉嫩多汁好足料。仲有加咗蓝芝士嘅三重特浓芝士、烩猪丝、素食及烟燻鹅肝汉堡等六款口味。
第3位 8锅臭臭锅
长期都榜上有名嘅8锅臭臭锅，今个星期又入返三甲，排队人龙完全冇缩短过。汤底有9款选择，如果已经食过几次招牌臭臭或者台式麻辣锅，不如试吓其他汤底，好似限量供应的南瓜锅、药膳羊肉锅等等，评价都相当唔错架。
第2位 Bingo & Cook (*新上榜)
大热嘅韩国菜点可以冇份呢？今次呢间有大量oppa坐镇，即刻加晒分！食物多元化，部队锅、炒年糕、紫菜包饭等大路菜式之外，最主打都系炸鸡同烤鸡，亦有拼盘可以每款都试啲。无骨鸡件啖啖肉，新鲜炸起劲juicy，而且皮脆肉滑，甜辣酱调得啱啱好，每客亦跟沙律酱，蜜糖芥末酱，烧烤汁同辣酱汁，有多种食法。
第1位 Candies Foodies (*新上榜)
第一位系由上海生煎皇明星老板Oscar开设，今次唔卖上海点心卖多国菜，最霸气菜式系原板海胆意大利饭，选用韩国海胆，成板上枱俾你自己加入饭中，饭用龙虾汁烩过，够晒甘香鲜甜！另有荷兰薄饼、新鲜波士顿龙虾、澳洲草饲肉眼扒等选择。餐厅设有candy corner，如果赞好佢哋facebook每人可以免费夹糖一包！
文：Perrins