唔少香港人去日本密过返乡下，普通和牛烧肉可能已经满足唔到大家？呢间新开嘅日本和牛烧肉食堂就以日本同香港新兴嘅飞驒牛，同有「日本第一牛」之称嘅鹿儿岛黑牛做卖点。最紧要嘅系定价唔离地，味蕾满足之余又唔怕肉赤吖嘛。
 

多汁霜降飞驒牛

飞驒牛牛肋骨肉

首先长气都要介绍一下飞驒牛，只有喺指日本岐阜县养殖14个月或以上嘅黑毛和牛，兼得到日本食肉格付协会指定评级，先可以叫做飞驒牛。特色系脂肪分布平均，特别系肋脊部嘅牛肋骨肉，霜降纹理令牛肉口感柔软，属於可当刺身食用嘅级别。
 

极上特选和牛定食（6切）（$238）（9切 $298）

而味之亭网烧食堂嘅极上特选和牛定食，主菜就系烧飞驒牛牛肋骨肉，油亮而且带粉嫩嘅烧肉卖相已经令人食指大动，入口即溶而且充满肉汁。
 

因为油花香味十足，所以开饭仔建议点少少岩盐就得，觉得有啲腻先再挤啲青柠汁。
 

 
鹿儿岛黑牛三重享受

（左至右）鹿儿岛黑牛肉眼、西冷、牛肋肉

另一主打系鹿儿岛黑牛，旧年先得到日本和牛能力共进会颁发嘅团体综合优胜赏，因而有「日本第一牛」嘅称号。餐厅选用A4等级嘅鹿儿岛黑牛，油花网纹分布细致。
 

极上和牛三色盛合定食（6切）（$218）（9切 $278）

而呢份牛三色盛合就可以一次过试哂牛肉眼、西冷、牛肋肉三个部位，西冷富油脂甘香，肉眼筋比较多，而牛肋肉略嫌有啲渣，但亦系牛香最浓郁个部位。
 

定食套餐除咗烧肉主食出色之外，其实饭同乌冬同样精挑细选过。餐厅选用青森县嘅まっしぐら米，特色系比一般日本米大粒饱满，煮熟後口感软熟而粘度适中。大胃王可以加$30将改为赞岐手打鸟冬，乌冬滑溜烟韧，配埋溏心蛋十分满足。除咗牛肉之外，仲有日本黑豚、鸡肉、鳗鱼等丼饭同乌冬选择，青衣嘅街坊今次有食神啦。
 

味之亭网烧食堂
青衣青敬路33号青衣城2期2楼224号舖

文、相、片：Cathy