2019台北米芝莲车胎人推介出炉!12间新上榜餐厅全介绍
2019-03-27

《米芝莲指南台北 2019》完整名单4月10号公布,今日率先公开车胎人(Bib Gourmand)推介,即系1300台币食到三道水准菜式嘅平靓正美食店。今年有12间首度上榜,包括传统台湾料理、港人最爱嘅牛肉面、印度菜、四川菜等等,非常多元化。
 

台湾地道面食

红酒配精品牛肉面 天下三绝

餐厅名嘅三绝系指新鲜食材、烹饪技巧同厨师嘅三心:用心、爱心、专心。牛肉面嘅汤底采用大量蔬果、四种蕃茄、两种洋葱同大量牛扒熬成,牛肉选用澳洲同美国牛,连面都用澳洲黄金小麦制作,而且有配红酒嘅套餐,好有新鲜感!


图:Angelababy 享乐日记

 
细细碗惹味切仔面 阿国切仔面

切仔面又叫黄汤面,呢间嘅切仔面系用Q弹油面,配纯大骨熬制嘅高汤、豆芽、油葱同红酱,细细碗都够晒惹味。其他小菜包括生肠、咸水鹅、红烧肉等都值得一试。


图:老K爱美食


红烧肉配切仔面 卖面炎仔

隐身喺大稻埕巷弄中嘅呢个档口同样主打切仔面,开店超过80年,而家已经传到第三代。汤底用下水汤同边仔骨熬成,啖啖滋味。而红烧肉更加系每枱必点,炸至外脆内软,而且仲Keep到肉汁!


图:周花花 甲饱没


传统、新派台湾料理

80年历史古法台湾菜 义兴楼

1938年创业,由街边嘅小面摊逐渐变成而家由第四代主理嘅传统台湾菜馆。招牌金钱虾饼依然沿用古法选择猪後腿油肉制作,其他菜式例如五香鸡卷、猪脑煎蛋、炸卜肉、芋头酥都系心机之作。


图:Superp


排队食高CP值鹅肉料理 阿城鹅肉

店如其名主打鹅肉料理,邻近捷运行天宫站加上价钱相宜,所以经常坐满锺意食鹅肉嘅台湾人。招牌烟燻鹅肉可以按自己口味拣较瘦嘅前半段,或者较嫩嘅後半段。其他小菜亦有水准。


图:鲁智深与二锅头


复古50年代农家风情 女娘的店

以50年代台湾农村生活为主题嘅台湾菜馆,装修甚有古早味道,而且因为艺人徐若瑄同金城武都嚟过,更加成为唔少日本游客必到餐厅。菜脯蛋、豆豉肉、焢肉,同猪油饭都系热卖菜式。


图:餐厅提供


老店Young Line创意菜 欣叶小聚今品

台菜老店欣叶开设嘅Young Line,今品嘅意思正系「古味今品」。保留道地台菜功夫,再加入生活灵感,变出XO酱猪肝萝卜糕、三杯弹Q猪脚、青龙皮皮挫等创意菜式,成功打入年轻人市场。


图:milkfans


各地菜式大集合

香气诱人印度菜 番红花印度美馔

以香料番红花为名,呢间印度菜馆由印度主厨主理,供应正统北印料理,而且门口就可以透过玻璃窗见到印度厨师炮制烤饼。各式咖喱都加入多款印度香料,无论配烤饼定番红花饭都咁啱。难怪成功由之前嘅米芝莲餐盘推荐变成车胎人推介。


图:米儿情事


老布殊食过京菜老店 都一处

美国前总统老布殊都系座上客,呢间北京菜馆创办人徐继声嘅表叔正系慈禧御厨博继昆,开店至今70年依然主打正宗北方菜。葱油饼、褡裢火烧、酱肉芝麻烧饼都系必试推介。


图:Cindy - Food Makes Me Happy


韩综都去嘅川菜馆 四川吴抄手

开业超过67年,而家由第三代主理嘅四川吴抄手出现过喺韩国综艺节目《花样爷爷》当中,去年已经得到米芝莲餐盘推荐,今年「升呢」成为车胎人推介!虽然以抄手为店名,但其实佢地嘅麻辣锅、成都水煮牛等麻辣菜式更受台湾人欢迎。


图:蔡甜甜Evonne


老字号怀旧江浙菜 荣荣园

1965由师承上海老师傅嘅黄呈郎先生创立,集合上海、杨州、温州、杭州、宁波、绍兴等地菜式,坚持用正宗手法炮制。招牌烤排骨、外婆肉、砂锅蟹粉狮子头、红烧托肺等都系相当耗时嘅手工菜。


图:梦与幻的地图


心机正宗云南菜 人和园

1954年创业,系唔少老饕同日本游客嘅心头好之一,主打正宗云南菜。现由第二代接手,每年都会带厨造访云南。菜式选择丰富,招牌菜之一干煸香菇用撕成一条条嘅菇先炸後炒,香脆惹味。


图:Joyce美食地图ubiquitously




文:Cathy

关键字
米芝莲
台北
车胎人推介
牛肉面
台湾菜
开饭专题
开饭仔为你提供各类型最新饮食情报及优惠,全面照顾你的饮食喜好。
本月热门
【随时更新】最後倒数!即将结业的老字号及人气小店
1天前
【随时更新】零食速报 每周新款零食、酒品点评
1天前
全城抗炎! 5间酒店自助餐转型 任点任食海鲜/主食/甜品 变阵保卫生
2020-03-17
【随时更新】全城抗炎!多间集团餐厅及老字号宣布 暂停晚巿或休业 (内附名单)
1天前
尖咀Omakase 独创三文鱼子海胆日式糯米饭 新开业优惠 第2位半价
2020-03-19