2月份好评餐厅十强
2020-03-05

整个2月份,大家都少咗出街食饭。不过呢10间餐厅仍然人气高企,力抗「疫」巿!当中有唔少都系新开业冇耐嘅过江龙,又或者系默默努力嘅小店!

第10位  当文历饼店(*新上榜)

 图:guinevereeeKatrina_HK Foodie

大家期待咗好耐嘅纽约人气甜品店,今年1月抵港,短短1个月已经火速打入十强榜,足证大家对佢嘅爱戴程度。佢哋嘅甜品内外兼备,创意十足,嚟到香港仲有几款特定为香港设计嘅特色甜品,好似菠萝油、柠茶蛋糕等等。当然唔少得佢哋招牌DKA,外脆内酥,必试。

第9位  ChaTraMue

 图:yuk_tamhyEmilyLam100

连续两个月打入十大嘅70年历史泰国茶叶品牌,上个月冻冻地,去到最啱就系饮返杯热辣辣嘅正宗泰国热姜奶茶,姜味特重,奶茶甜身,饮完当堂暖晒。平时饮开珍珠奶茶嘅朋友,可试泰国班兰珍珠抹茶鲜奶,啲珍珠由泰国入口,以新鲜班兰叶制,仲有阵阵清香添。

第8位   天 · 悠蔬食 

 图:sleepbeauty大食有为

近排大家出街食嘢都健康咗,荃湾呢间童话风素食餐厅更连续两个月留守十强位置,除咗鳗鱼好吸引之外,大啡菇鲜豆包栗子紫薯焗千层阔面亦唔输蚀,咸咸地甜甜地,蕃薯软腍。而家帮衬,仲会送抗疫润肺苹果雪梨海底椰南北杏炖雪耳糖水添!

第7位  Lex Coffee  

 图:fatty piggyEmemmmmm

结合艺术同美食嘅餐厅,特别受爱打卡嘅朋友欢迎。咖啡又好朱古力又好,都可以做到艺术打印,想要咩图案都印到落去,好鬼靓,层cream仲好rich添。上个月个tea set又系靓到一个点,用滑板放上多款甜品,完全满足晒视觉。

第6位  大渣哥茶记(*新上榜)

 图:渣哥 一九九六lsyuk

最近好多餐厅嘅生意都大受影响,但偏偏呢间由笃鱼蛋起家,喺九龙湾新开业茶记,就日日都大排长龙。餐牌上嘅菜名都花过心思,好似有欢乐今宵早餐、襟捞任砌等等。几乎枱枱都会叫嘅黑牛黑面,即系沙嗲牛肉面,沙嗲几香。不过亦有唔少食客认为价钱略贵。

第5位 Wingman(*新上榜) 

 图:heisfoodiaryKathyPun

呢间鸡翼专门店摆明为鸡翼控而设,黑芝麻蜂蜜海鲜、泰式甜辣酱、咖啡香味、新加坡辣蟹味等多款口味嘅鸡翼,全部都皮脆多汁,最劲嗰只应该系死神酱味,辣到呢,自问食得辣嗰啲自己去挑个机。餐厅仲首创咗鸡翼鸡煲,又几有谂头喎。

第4位  Micasadeco & Cafe Hong Kong(*新上榜)

 图:KathyPunherbert

香港人对班戟嘅热爱一直冇减退过,呢间嚟自日本嘅班戟店,上年年底先开业,话咁快就上到第4位。主打嘅系招牌香软ricotta芝士梳乎厘班戟,记住要三层一齐咁食,口感好松软,蛋香十足,粒粒ricotta芝士亦正常发挥,微微咸香。

第3位  Mamaday

 图:118兔Amber1117

又一间疫巿突围而出嘅餐厅,晚晚都依然系爆满。餐厅装修同餐牌设计都充满玩味,碟碟菜式嘅名都好长,推介有蟹膏又有蟹肉的蟹蟹蟹意大利扁面,净系见到个名咁多个蟹字就知丰富,蟹味十足。Pizza嚟讲,亦系坊间少见嘅配搭,例如咸蛋牛油果蟹肉同蒜蓉虎虾等款式都相当受欢迎。

第2位 Amitie Kitchen(*新上榜)  

 图:issactrevordkylmth

呢间位於尖沙咀嘅意大利餐厅,款款菜式都好吸引,好似火炙海胆芝士焗松蟹膏大啡菇咁,普普通通一件大啡菇畀佢加咗咁多靓料上去,仲要夹喎,系出色嘅。鲜甜海胆经火枪微烧过,连埋半溶芝士、香浓蟹膏、多汁大啡菇一啖咁食,系享受呀。btw,上个月餐厅仲好落力咁帮大家网购消毒搓手液,难怪咁多人捧场呀!

优惠券:正价7折: 主菜餐牌
优惠券:正价8折: 主菜餐牌
优惠券:正价8折: 主菜餐牌

第1位  顽固寿司(*新上榜)

 图:Voraciousmandychoi23

首次上榜就荣登榜首嘅系嚟自日本嘅亲民回转寿司,但价钱亲民唔代表质素就要退让喎,佢哋嘅刺身每日新鲜由九州运返嚟,件件寿司都系师傅即场手握,送到上枱时仲可以感受到饭嘅微温。锺意嘅叫返个12件寿司拼盘,有鰤鱼、三文鱼子,帆立贝、甜虾海胆,大拖罗等等,件件诚意!


文:Kar


关键字
十强
十强名单
报榜
好评餐厅
荃湾
尖沙咀
旺角
九龙湾
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】最後倒数!即将结业的老字号及人气小店
2020-05-19
【随时更新】零食速报 每周新款零食、酒品点评
4天前
全城抗炎!人气酒店自助餐重开 每位送鲍鱼、带子
2020-05-11
全城抗炎!喺屋企做大厨 懒人煮食包/套餐集合文
2020-05-13
4月份好评餐厅十强
2020-05-07