2月份好评餐厅十强
2018-03-09

2月份又农历新年又情人节,有冇影响到今个月嘅好评十强呢?今个月的确系多咗甜品店同火锅上榜,讲个小秘密俾大家知,情人节前後火锅店系特别多人帮衬架,贴地都可以好浪漫!即刻同大家睇睇2月又有咩餐厅打入十大先!


第10位 宇治园 (*新上榜)

抹茶不死似乎系不争嘅事实,虽然专门店越开越多,但仍然无损港人对抹茶嘅热爱!呢间同样来自京都宇治,而且都系百年老店,主打深蒸煎茶同浅火焙茶。必吃香港分店限定嘅抹茶及焙茶芭菲,亦有啫喱、Tiramisu、甜汤、生茶面食等,饮品亦有多款选择。

图:YanSimineddie_ilovefood777


第9位 桃园眷村

上月嘅第1位跌到第9,不过仍然不乏捧场客。今次介绍吓其他特色食品,好似用糙米同花生煮成嘅米浆,杰身如花生糊,味道带果仁香。咸豆花有菜甫、虾米、脆油条等配料,加埋嫩滑豆腐一齐食,微微辣都几咸香。舖头小小但有唔少选择,食多几次都唔厌呀。

图:hihi1234567890霖迪


第8位 炊豕店

猪扒小店继续留守十强,期间限定嘅避风塘猪扒果然好受欢迎,不过卖到10/3咋!俾少少贴士大家,最好加只煎蛋,蛋浆捞埋猪扒更加香滑,冇得输,想有唔同食法,加多几蚊可以配咖喱汁或者肉燥汁,用嚟捞饭系一绝嘅。

图:VoraciousHappy_meal123


第7位 饺子县饺子专门店 (*新上榜)

其实呢间饺子专门店并非首次入榜,今次系新开嘅西湾河分店。饺子款式多而且难得地每一款味道都唔错,芝士饺系列有番茄、黑松露、辛辣同三重芝士,而且仲可以每款一只试唔同味。食得辣嘅记得要落麻辣菜甫或者配酸辣汤底,更加惹味!

图:3狗窝阿包keithkkku


第6位 爱甜心甜品 (*新上榜)

新开甜品唔系西式就系抹茶,终於都有港式甜品入围喇!呢间小店凭住一道自家制西米圆打响名堂,以西米皮包住绿豆蓉或芋头蓉,冻食包住麦提莎朱古力,好有创意!西米皮烟韧软糯,加埋椰汁好香甜。芒果甜品、布甸类及中式糖水都有质素,值得支持呀。

图:Princess637Yourlike


第5位 骏景轩

连续3年夺米芝莲嘅川粤菜馆,今年第二次入榜微跌两级,果然有实力!每枱必点杏汁炖白肺汤,奶白色嘅汤杏仁香气突出,但唔过抢,猪肺腍滑。川菜以外,小菜如照烧黑松露野菌安格斯牛柳粒、菠萝咕噜肉及黑醋珠蟹肉带子炒鲜奶等都系招牌作。

图:keithkkkufood.ooh.yeah


第4位 同仁四季音乐主题餐厅 (*新上榜)

上个月天气飘忽,冻起上嚟最好就系打边炉!呢间火锅店主打椰子鸡煲,用上4个椰青同1个椰皇做汤底,完全无添加,渌完鸡件好清甜,鸡肉亦嫩滑。海鲜够新鲜、自家制配料足料,必吃蟹黄甘香嘅生拆蟹皇丸,每日都有独立音乐人现场献唱,都几有feel。

图:CHI CHI YANSweetdiegrandpa


第3位 重庆刘一手火锅店 (*新上榜)

早排好多麻辣火锅开业,呢一间有蔡澜加持,更系重庆火锅十大品牌,全球有过千间分店,非常架势!九宫格汤底浓郁够麻香,一层鲜红色滚油浮面,辣度十足。唔食辣仲有香港独有嘅龙虾汤底、番茄汤底等,内脏如鹅肠、毛肚、鸭血都系必吃,少见嘅肠灌猪红系个人推介。

图:mj712orangetang813


第2位 i CREMERiA Café (*新上榜)

第2位又系甜品店!今次轮到以软雪糕起家嘅i CREMERiA,虽然开业咗一段时间,不过不时推出新出品,卖相抢眼又呃like!旺角分店餐牌选择更加丰富,tea set有六款甜品,有招牌雪糕、白玉、三文治、蛋糕及生果,味道刚好唔过甜。

图:ma garconewmy


第1位 日悦极尚日式放题 (*新上榜)

放题一向都好受欢迎,不过质素参差,难得呢间新开嘅放题,食物款式多,自助区似足buffet咁大堆头,有原只乳猪、海鲜、沙律等任拎。鱼生新鲜、烧物及炸物都出色,仲有Movenpick雪糕任食清酒任饮,价钱由$258起食足两个半钟,都算抵食!

图:iameatproduct小东



文:Perrins

关键字
十强
排行榜
放题
火锅
麻辣
川菜
甜品
饺子
抹茶
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】最後倒数!即将结业的老字号及人气小店
2020-07-21
【随时更新】零食速报 每周新款零食、酒品点评
2020-07-31
全城抗炎!屋企都叹到三层架下午茶 Tea Set外送/外卖自取推介
2天前
全城抗炎!北角酒店最新应变 自助餐都有得外卖?
2020-07-17
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-07-30