1月份好评餐厅十强
2021-02-09

成个1月都冇晚巿堂食,变相令到大家嘅lunch食得丰富咗,舍得食咗。十强嘅餐厅入面,不乏omakase同烧肉店一啲本嚟多数晚巿先去食嘅餐厅,不过依然都系以亲民价嘅小店占多数。

第10位  台北巷弄(*新上榜) 

 图:AHM0021yoyo454

系台湾嘅味道啊!呢间餐厅有几款台式便当选择,即使而家冇得晚巿堂食,外卖都好方便,加上价钱贴地,难怪深受街坊欢迎。特别推介盐酥鸡扒便当,酥脆香口,配多半份酱油鸡翼仲开心。唔够嘅可以叫埋仙草冻芋圆做饭後甜品。

第9位  峇里堂(*新上榜) 

 图:pigfoodiexhkAgnesYeung1683

呢间印尼菜餐厅有40几年历史喇,上年喺佐敦山林道重开,装修走文青风,仲有几款创新嘅fusion菜,成功吸引新客源。食印尼嘢梗系要有串烧同巴东牛肉饭,呢度就创作埋巴东牛肉牛角包,加咗青瓜嘅关系,椰味香浓得嚟带清新。珍多冰沿用印尼传统,一碗碗咁上,反而对香港人嚟讲系种新意。

第8位  椰粉汤红   

 图:yuehw_fishstarfish38

主打炖汤嘅小店,喺需要滋润嘅冬天零舍吃香。不过佢哋除咗多款汤品外,亦有饭食。竹丝海南鸡椰香饭系佢哋首创嘅,啖啖椰香,鸡肉口感较为实净。另外有椰香蛋包饭亦值得一试,蛋好滑,倒埋椰汁上面,估唔到又几夹,咸甜中有致。

第7位  曼谷水门海南鸡饭(*新上榜)

 图:BB芝心批tasteology.hk

讲真,呢间餐厅餐厅选择好少,就得泰式海南鸡饭、泰式猪手饭、青木瓜沙律同芒果糯米饭4样嘢,不过胜在够平,30蚊就食到碟有水准嘅饭,打入十强一啲都唔意外。海南鸡以三黄鸡制作,入口滑嫩兼索晒香茅同斑兰叶香。

第6位 NUTTEA(*新上榜)

 图:mylittlegourmand852eater

个个都话要健康,但又锺意饮奶盖,点搞?所以呢间主打坚果奶盖嘅饮品店就可以跑出啦~坚果奶用咗5种坚果制作,冇奶都冇奶精,素食朋友都饮得。佢哋有多款坚果奶配搭唔同茶底同生果供应,如果够早去,记得试每日限定100杯嘅伯爵朱古力坚果奶盖茶,清幽嘅茶香可以中和朱古力嘅甜香。迟咗都唔紧要,火龙果坚果奶盖茶都系推介,仲有果肉食到添。

第5位 闺•家 (*新上榜)

 图:wingshuen1123kristinn

虽然话香煎莲藕饼猪扒饭系呢度嘅招牌,猪扒仲用咗鲜榨果汁去腌制,捞埋酱油好惹味。不过更多人去到都会想试下佢哋嘅「三色面」,即系紫薯面、菠菜面同甘笋面,几靓几有特色,不过其实唔太食到紫薯味。

第4位  云寿司  

 图:dr.foodfoodstalkers_hk

冇咗晚巿,大家都好似愿意畀多啲钱食个劲lunch,呢间Omakase隔咗一个月又再度上榜。无论刺身定寿司都相当新鲜,拖罗入口慢慢溶化,鮟鱇鱼肝嘅鱼油香味非常浓郁,加埋辣辣地嘅明太子酱令佢嘅层次更为丰富。

第3位  Lucky Smash (*新上榜)

 图:elliewongyeat.play

荃湾人最近好有口福啊,三甲有两个位置都系荃湾新开冇耐嘅餐厅。呢间burger舖系Burger Joys嘅副线,全部汉堡即叫即制,menu简而精,就3款:安格斯手打牛肉汉堡、芝士牛肉汉堡、双层芝士牛肉汉堡。安格斯嗰款肉汁满满,一定打动到牛魔王呢。

第2位  段纯贞 (*新上榜)

 图:天天食好野heimen

嚟自台湾新竹巿嘅牛肉面专门店,一直坚持使用新鲜肥牛提炼嘅天然牛油脂,香港店食到嘅牛骨汤底咁浓郁,亦系沿用返台湾嗰边嘅秘方,即使未飞到都可以食到当地风味!必食三宝面啦,牛腱心牛肚牛筋都有齐,食得辣嘅就拣麻辣蒜味腱心半筋半肉面,汤底加入咗花椒辣椒胡椒仲有八角同老姜等,够晒刺激呢。

第1位  YAKINIKU KAKURA (*新上榜)

 图:starrychowwaiyeegrace

嚟自日本九州嘅人气烧肉店,所有食材都系由日本直送,主力供应A5级别嘅黑毛和牛,成功吸引一班烧肉控同肉食兽。黑毛和牛大判烧盛盒包括有鹿儿岛A4和牛西冷、和牛里腹小排、同埋和牛背脊肉,各有唔同口感,西冷油脂最重,里腹小排肉味就最浓郁。



文:Kar

关键字
十强
报榜
十强名单
荃湾
红磡
日本菜
台湾菜
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
情人节爱意满泻 甜蜜蜜堂食/外卖下午茶推介
2021-02-01
【随时更新】零食速报 每周新款零食、酒品点评
1天前
日本吉列牛排店京都胜牛进驻铜锣湾 黄金六十秒炸法 推介京都胜牛三味套餐
2021-02-18
楚捻记新line!荃湾新开饺子店 必试黑松露什菌饺+香煎潮汕韭菜粿
2021-02-10
1月份好评餐厅十强
2021-02-09