1月份好评餐厅十强
2020-02-05

2020年1月,冬,亦系饮食业嘅寒冬。喺种种因素下,多间餐厅生意受影响。不过只要坚持,凭住良心提供高质素嘅食物同服务,相信大家都可携手,同步过冬!呢10间餐厅能够喺艰难日子仍然得到大众支持,总有佢哋嘅秘诀。

第10位  Deer Kitchen 

图:little_tummymmyfoodland

位於观塘工厦嘅呢间西餐厅,上个月都有上榜。推介佢哋嘅安格斯牛肉汉堡,份量十足,汉堡肉又juicy。而呢排如果想食得健康啲,水果藜麦沙律就啱晒,仲好清新添。

餐饮券:$10一只新鲜生蚝

第9位 ChaTraMue(*新上榜)

图:chingchingjaiikarcc

进驻香港接近一年嘅呢间泰国茶叶品牌,初开业时红极一时,今个月终於打入十强榜。茶饮店内嘅茶饮,都选用泰国材料,来回撞茶九次制作,茶味香浓。特别推介泰国玫瑰花奶茶,粉红色㗎充满少女心,而且仲有放松同Detox嘅功效。

第8位  咖喱叶(*新上榜)  

 图:ckbear0little_tummy

佐敦呢间传统印度餐厅,主打北印度菜,好羊嘅朋友不妨试下佢哋嘅羊肉咖喱角,脆卜卜,入面包住好多羊肉,香而不羶。印度烤鸡亦系招牌菜之一,满满香料味。

餐饮券:凡惠顾即送免费口罩

第7位  牛県(*新上榜)

图:天天食好野manmuiii

石烧牛嘅热潮仍然未退,荃湾呢间舖主要有6款牛选择,包括最平嘅$88平铁牛扒、上腰西冷、牛侧腹扒等等。要特别介绍下嘅系佢哋有两款自家制酱汁,分别系以意大利黑醋、牛肉汁同红酒煮成嘅红酒牛肉汁,同埋以多种西式香料混制嘅阿根廷青酱,两款都各有风味。

第6位  虫二(*新上榜)

 图:nee.eat.playkk_genki

旺角新开一排嘅餐厅,装修走怀旧风,食物则相当新潮。最受欢迎嘅莫过於伯爵茶传统班戟,配烧海盐芝士忌廉酱,中间仲有麻糬添,多重口感好有惊喜。另外「一汁三菜」更系王牌,就咁食又得,加入柴鱼汤变茶渍饭又得,最後加埋慢煮太白蛋,捞匀食都得!

第5位  鬼金棒

 图:alice''CarmenTsui

上月第4位嘅呢间东京人气辣麻味噌拉面店,今个月微微回落1位。嚟得尖咀店,梗系要试港岛店冇嘅辣麻肉碎拌面,啲辣辣酱料集中晒喺啲面度,啖啖刺激。叫汤面嘅话,建议叫少麻多辣咁先可以食啲辣味食得真啲呀!死神级辣味拉面真系唔系人人食得到。

第4位  CURATOR BY LEX ART CAFÉ(*新上榜)

图:chungkkkcheungmandy001

呢间充满住艺术气息嘅餐厅,由装修到食物都系打卡之选,餐厅内仲有多幅世界名画同艺术收藏品。饮杯咖啡都靓过人,采用艺术打印咖啡机制作,任何图案都可以print到落面呢~ 想要名画如梵高星夜又得,要只卡通如pepe都得。

第3位  天 · 悠蔬食(*新上榜) 

图:gomeihoFoodie Baby

事实证明素食有巿场呀,荃湾呢间新开嘅素食馆,迅速已打入三甲。好多人平时都锺意食鳗鱼丼,素食版一样掂,以淮山蓉做嘅素鳗鱼埋加埋日本珍珠米,像真度高得嚟又有营养,淋上照烧汁亦好惹味。晏昼去饮茶嘅话可以叫返个点心拼盘,斋春卷斋叉烧包等都有。

第2位  Zeng  

 图:twtracy1017tracytaitai

上月第3位嘅呢间高空酒吧餐厅,今个月就上升多格。望到270度维港海景当然加分唔少,除咗多款特色cocktails外,嘢食方面都花咗唔少心思。好似普通茶记嘅乾炒牛河,嚟到就变咗高级版,牛肉用澳洲牛,厚身带肉香,仲要加埋松露落去炒,好香口。

餐饮券:$250现金劵

第1位  Espresso Alchemy (*新上榜)

图:imbloggerjoyamichelintummy

或者好多香港人都需要放松一下,呢间位於闹巿嘅café,正好畀人一种chill chill嘅感觉。嚟到梗要叹返杯,Earl Grey Chocolate嘅配搭几有新意,甜中带茶香。仲有all breakfast同样推介,除咗一般都会有嘅炒蛋呀肠仔呀之类,呢度有牛!油!果!吸引呢~ 


文:Kar


关键字
十强
报榜
十强名单
荃湾
铜锣湾
尖沙咀
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
情人节去K11 MUSEA 一文睇晒浪漫餐厅
2020-02-06
【随时更新】零食速报 每周新款零食、酒品点评
4天前
全城抗炎 与医护同行!提供医护餐饮免费优惠餐厅一览
2020-01-31
美国人气肉桂卷抵港!烟韧原味/朱古力/焦糖胡桃卷(有片)
2020-02-06
全城抗炎!60间餐厅推$0-$25酒精搓手液换购计划
2020-02-12