1月份好评餐厅十强
2019-02-11

话咁快,2019年就已经过咗成个月有多,你哋做过啲乜?食过啲乜?即刻报个榜,同大家睇下2019年嘅最新饮食趋势先~ 望一望,打入十强嘅餐厅有超过一半都系第一次上榜,除咗两间系人气过江龙餐厅之外,有唔少都系特色小店嚟。

第10位   半糖主义 (*新上榜)

 图:Ppchu360karitang

要喺坚尼地城搵甜品食,识搵一定搵呢间,店如其名,所有甜品都系用60-70%比例嘅糖去制作,冇咁甜就唔使怕肥啦。而且唔少都系坊间比较少有嘅甜品,例如伯爵茶炖蛋、桃胶莲子炖奶、紫薯心太软等。紫薯窝夫打卡亦一流,中间都有夹住紫薯㗎,紫薯控,go!

第9位   慢理墙城

 图:snowbluehungCeeCJasmine

油麻地呢间森林系café,继上年9月上榜後终於再次打入十强。无他嘅,成间餐厅都系打卡位,已经率先赢得一众少女欢心。加上甜品啲名又鬼死咁浪漫,「陪您去看流星雨」呀、「樱花树下的忽发奇想」呀咁,虽然唔知系咩嚟,但见住正餐嘅牛油果忌廉蟹肉意大利饭咁鬼足料同鲜甜,摆碟又靓,就知道质素都会有保证。

第8位    团日式拉面

 图:nee.eat.playtiksan0610014

荃湾呢间拉面店,隔咗两个月又再度上榜。今次已经系佢哋第3次入围十强喇!受欢迎系有佢嘅理由嘅,限量供应嘅松叶蟹味噌拉面,几乎枱枱都会嗌返碗,呃到like之余最重要系有实际,原只蟹盖炙烧过,蟹膏同蟹肉都好香口。另外推介鱼介拉面,味道较浓厚。

第7位    满屋日本料理

 图:AntoniaWong7050

上个月第10位嘅日式放题,今个月跃升咗几位。作为放题餐厅,佢又真系做得几称职,刺身寿司烧物小食应有尽有,甜品有芦荟木瓜冻,沙律吧度就连蟹籽都有得任哔!有雪糕机都算,仲要有埋爆谷机,同埋冷热嘅清酒、梅酒都系任饮唔嬲,CP值咁高系抵佢继续有得留低嘅。

第6位  麦金.麦金马拉特式茶啡室 (*新上榜)

 图:pung.mobile2012karen_c1234

大角咀啲横街有唔少小店,呢间主打马来西亚特色菜嘅咖啡茶室就系其中一间,椰浆饭、喇沙、肉骨茶全部都喺度食到。呢度嘅喇沙都有好多款,娘惹喇沙就富椰奶香同海鲜甜,啱啱好嘅辣度令人欲罢不能。拉茶亦相当正宗,茶香中带甜,原来系因为落咗少少肉桂粉去冲调。

第5位   一起食堂 (*新上榜)

 图:Sa820foodetective852

喺中环区搵间平价饭堂一啲都唔容易啊,难怪呢间主打台日便当嘅餐厅,新开咗几个月就迅速成为该区打工仔嘅新宠儿。要饱肚当然系食原条蒲烧鳗鱼饭或者红烧牛肉面,另外仲有卤蛋、温泉蛋、炸花枝丸等台式小食,埋尾可以嚟多碗芋圆烧仙草,一站式由主菜到甜品都食得晒。

第4位   釜之魂釜饭专门店 (*新上榜)

 图:mjqueen7esune619

九龙湾呢间日式釜饭餐厅,有几款釜饭选择,好似汁烧牛肉釜、五花豚肉釜呀咁,但最推介嘅当然系招牌鳗鱼饭!餐厅使用自家养殖场供应近两斤重厚肉嘅鳗鱼,加上用特制蒸锅煮日本越光米,令到呢道菜既鲜甜又香口。

第3位  微酵烘焙 (*新上榜)

 图:KathyPuneat4forever

成日去台湾嘅朋友,对於呢间手工烘焙欧式软包店应该好熟悉,难怪佢哋嚟咗香港开分店後,就可以迅速打入十强仲要进占三甲嘅位置啦。必试爆浆珍奶软欧、三款分别系茶、士多啤梨同朱古力味嘅脏脏包,全部面包都系选用自家培植嘅贵腐酵母,兼用高甜度日晒有机白葡萄乾制作,所以啲面包食得出有份香甜味㗎。

第2位 J.S. FOODIES (*新上榜)

 图:kennistpmytelleng

第二位都系过江龙,不过系日本过江龙。估唔到上年嘅pancake热潮继续延续到依家。呢间pancake店同Flipper’s系同一个集团,有pancake食之余仲有汉堡同意粉。但要数比较特别嘅,就系期间限定嘅原只龙虾班戟喇,薄pancake加啖啖爽弹嫩滑嘅龙虾肉同自家制龙虾汁,系几有新鲜感,同埋系夹㗎喎。

第1位    阿里山台式美人锅 (*新上榜)

 图:phonebusYuenChihin

1 月都系打边炉嘅季节,所以呢间提供滋润汤底嘅火锅店新上榜就做到no.1都唔会令人太意外。餐厅主要有5款汤底,除咗一般嘅台式麻辣锅、酸菜白肉锅、胡椒猪肚鸡锅等,最特别最啱女生嗰款叫「桃胶美人锅」,美人或想变美人记得嗌,以原只乌鸡、桃胶、杞子等熬制,养颜啊。餐厅嘅配料食材亦充满特色,好似有樱桃滑鸭片、咸蛋黄虾丸同鹅肝墨鱼丸咁,是咪想试先?


文:Kar


关键字
十强
排行榜
甜品
日式
放题
火锅
拉面
过江龙
pancake
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【开饭热店入围名单巡礼】深水埗平民美食天堂 新派传统乜都有
2019-03-07
2月份好评餐厅十强
2019-03-11
Chill叹周末!黄宗泽蚝吧新推任食生蚝Brunch (有片)
2019-03-06
【开饭热店入围名单巡礼】港人最爱 人气东南亚菜大激斗
2019-02-21
【开饭热店入围名单巡礼】全城热捧甜品店 疏乎厘班戟芋圆刨冰争崩头
2019-02-25