嚟到2017年头,继续同大家报榜!睇一睇个榜,1月似乎比较多人锺意食西餐同甜品,而10间餐厅入面,有4间都系位於荃湾嘅,睇嚟,荃湾已经慢慢成为其中一个食好西嘅集中地喇!
第10位 Vision 8(*新上榜)
呢间西餐厅舖位细细der但颇有格调,食物水准亦都保持得几好,但原来佢系位於荃湾一条街仔,左右隔篱分别系旧式大厦入口同米线舖。黑松露菌薄饼几乎系每枱嘅必食之物,饼底厚身而香脆,黑松露味几香口,唔使太多其他调味都好够味。
第9位 京林屋
开业一年多啲嘅铜锣湾嘅日本抹茶老店,第二次入榜。选择几多,想要主食嘅可以点抹茶荞麦面,面质冰凉弹牙,细心食会食到微微嘅抹茶味。想食甜品嘅,梗系有抹茶啦,雪糕、芭菲等等都有,但如果你已经试过呢度嘅抹茶,建议下次可试焙茶,焙茶卷蛋嘅茶味同样香浓。
图:MelodyWong5016、hkeateriespot
第8位 麻辣串串香(*新上榜)
又系荃湾嘅舖啊,而且呢间个位唔喺巿中心,要兜入街口转角先搵到,但好食嘅话专诚搵路拜访又有乜所谓?嗜辣者一定要嚟挑机佢碗麻辣烫,鸡柳、金钱肚、水饺、薯粉等等全部都索晒啲辣汁,啖啖都咁刺激!但又唔会一味得个辣字,用料都唔差,薯粉够弹牙。另外要介绍烧茄子,加埋蒜蓉同肉碎同特制酱汁,好香!
第7位 阿来泰式地道风味
泰国餐厅通常都有金边粉食,呢间都有,但呢度嘅金边粉特别在於用蛋整咗个网嚟包住啲粉,而粉嘅湿度亦刚好,唔会太湿或者太乾。生虾刺身都好吸引,好大只啊,点埋酸辣汁食,层次感多咗之余亦都食得到原本嘅鲜味,会食到停唔到口。
元朗嘅burger店,好大份好足料嗰间呀,又入榜喇!呢个阿拉斯加特大鱼堡,条鱼柳长到突晒出嚟嘅呢,大家应该都唔会陌生。餐厅另外仲有Pepper Dallas 达拉斯烤菇牛堡都系超巨size呀!块菇同块堡都系超厚罗!唔止有汉堡,牛油果软壳蟹墨西哥饼,相对嚟讲冇咁heavy嘅嘢都有呀。
第5位 8锅臭臭锅
几时都话香港人钟意台湾美食同打边炉,集呢两个特点於一身嘅尖沙咀台式火锅店1月重新上榜,已经系第4次打入10强喇!如果已经食过加咗台式臭豆腐嘅招牌臭臭锅,再去都仲有其他特色锅嘅。芝士牛奶锅无得拉芝,但香浓牛奶汤入面嘅猪肉、心型鱼豆腐同蛋饺等配料吸收哂汤底後特别鲜甜。
图:Raul L.
第4位 Home Bar And Restaurant(*新上榜)
老实讲荃湾有唔少特色餐厅,要立足仲要赢埋口碑,呢间西餐厅靠嘅系一个字:用心。由Set Dinner前菜沙律个酱汁就睇得出唔系行货,而系厨师用橄榄油、醋再加少少黑松露自己整,分量啱啱好够开胃。主菜德国脆皮咸猪手嘅猪皮非常香脆,加上亦够咸香,美国10oz西冷扒亦系推介。
图:布癫狗
第3位 乐糖(*新上榜)
新一年想Sweet啲,其中一个办法就系食返份精致甜品氹下自己。将军澳呢间甜品店从个装修开始就非常色彩缤纷,而且甜品选择够多又够新鲜,薰衣草 • 香芋雾之花卷嘅卷蛋蛋糕上面有粒粒薰衣草,幽幽花香同香芋忌廉馅又几夹。另外仲有近年大热嘅紫薯拿破仑,口感较实但胜在甜味自然。
图:VCY
第2位 面道(*新上榜)
以前香港人通常都系食豚骨汤底,不过近年就多咗拉面店以唔同汤底做招徕,荃湾呢间就有伊势海老豚骨汤同浓厚鸡白汤!特盛叉烧溏心蛋龙虾豚骨拉面有齐叉烧、糖心蛋、葱花、木耳、紫菜同平时少见嘅饺子,汤底龙虾味道浓郁。重点系可以自己磨白芝麻碎或者压生蒜泥加落去,要几重口味悉随尊便。
图:小桃bb
第1位 凡高厨房(*新上榜)
虽然话新年新气象,不过原来铜锣湾呢间口碑一直都唔错嘅西餐厅都系第一次登上10强榜!呢间餐厅除咗地点够就脚之外,装修亦以梵高名画为主题,环境先赢一分。招牌之一98%野菌汤系用咗牛肝菌同黑松露等九款杂菌,香味浓郁口感丰富。主菜可以点意式马赛海鲜饭或者卡邦尼意粉,一样唔会令你失望。
图:joggling
文:Kar、Cathy
其他饮食潮流:
零食新星!可乐味薯片 + 韩风泡菜粟一烧 试唔试得过?
直击史上最「臭」放题!任食榴槤品监Party
11架美食车大解构!黯然销魂汉堡VS温馨五色饺子
随时接收最新资讯
赞好OpenRice专页!