大大小小嘅拉面店，喺香港都有唔少，但喺舖头内自设制面机，亲自制作拉面条嘅，就应该几只手指都数得晒。黄埔有间拉面小店就系其中一间。佢哋听日起仲会新推出11月限定——广岛蚝沾面！连个汤底都用埋蚝肉熬制，蚝迷真心要试。

只得大约8个位嘅泓一拉面，舖仔细细，但老板依然买咗部制面机返嚟，坚持自家制作面条，为嘅系啲面可以新鲜啲、烟韧啲、有咬口啲。选用4款日本面粉混和制作，每条拉面粗度大约1.5mm。而沾面嘅面条相对就会粗啲，大约系3mm左右。

11月限定嘅广岛蚝沾面，绝对真材实料，上枱净系眼见嘅都有成5只肥美嘅广岛蚝，以牛油轻轻煎香过，有微微焦香，仲只只鲜甜饱满，相当juicy。

而沾面嘅灵魂，即系个汤底，初头试嗰几啖系会令一众蚝痴一秒变心心眼，因为啲蚝味相当浓郁呀，加上粗身嘅沾面挂汤力高，成个口都系蚝嘅鲜味。原来老板毫不吝啬咁，落咗劲多蚝肉去熬制呢个汤底呀，除返开平均每个汤底都有成7只蚝打底架，怪不得咁鲜甜啦。但啖啖都咁「蚝」，系会腻嘅，所以食到中段建议可以加返少少柠檬汁，或者食下啲葱呀菜呀中和一下。温提一下，每日限量10碗咋。

常设款鸡白汤拉面亦值得一试，汤底以鸡壳、鸡骨等自家熬制8个钟，再用揽拌机搅至起泡，口感creamy，味道香浓带甜。

泓一拉面
地址：德民街29号德民大厦地下F4号舖

文、相、片：Kar