锺意食Pizza嘅朋友注意,呢间主打正宗意大利手拉Pizza嘅小店喺铜锣湾开返啦!同之前喺Soho嘅做法、配方都完全一样,用意大利进口00面粉制作批底,口感烟韧得嚟又有面粉香。新店仲有新推出嘅牛窝夫,以韩国大热Croffle为灵感,必试超澎湃嘅咸牛肉炒蛋流心花生酱牛窝夫!
Al Forno Cafe and Bar新店位於铜锣湾,厨房特设一部Pizza炉,最高温度可达500度,可以喺短时间内烤熟,令批底口感特别烟韧,同时锁住食材水分!新店走Cafe & Bar形式,各款轻食同饮品同样落足心思。有唔少熟客特别嚟支持,星期五至日都特别多人。
意式风乾火腿手工薄饼(Set Lunch $108)
招牌手工Pizza当然系必食,面团用最幼细同雪白嘅00面粉,发酵两日後再手拉成批底。烤完口感烟韧松软,保留到水分唔会太乾,批边更加系外脆内软又富空气感!上面嘅意式风乾火腿就既有咸香亦有肉香,惹味柔软。再加上即刨Parmesan芝士就更香口,而火箭菜就可以平衡油腻感。
Set Lunch嘅周打蚬汤亦非常足料,口感Creamy柔滑,差唔多啖啖都食到蚬肉。
墨鱼汁意粉,带子,蟹肉,蟹籽(Set Lunch $148)
每条意粉都裹上黑色嘅墨鱼汁,食落口感弹牙又有墨鱼鲜香。蟹肉同带子都好出色,蟹肉口感结实,带淡淡海水鲜味;带子外面微焦,里面鲜美嫩滑。整体鲜味十足。
咸牛肉炒蛋流心花生酱牛窝夫($88)
牛窝夫即系指将牛角包摆落窝夫机,热压成外脆内酥嘅格仔窝夫状。牛窝夫嘅做法就系参考韩国近年兴起嘅Croffle,而口味就由大厨发挥创意构思而成。例如呢个咸牛肉炒蛋流心花生酱就好有香港茶餐厅Feel,两块牛窝夫夹住咸香滑溜嘅咸牛肉炒蛋,再加上好似熔岩咁澎湃嘅花生酱,视觉效果满分!食落花生酱同炒蛋嘅味道估唔到又几夹,味道同口感层次都好丰富。
更多【新店直击】: |
提拉米苏($68)
餐厅另一必食推介,手指饼先用咖啡加酒浸透,口感绵密而充满咖啡醇香同酒香。中间嘅忌廉非常Creamy,有浓厚芝士味同蛋香,再加埋上面嘅可可粉,味道香浓而甜度适中,口感柔软湿润。
巴士克焦香芝士蛋糕($55)
手工甜点亦有蛋糕选择,巴士克焦香芝士蛋糕嘅芝士香味浓郁,带少少天然酸味所以唔会太腻。口感偏软,如果有多啲啲焦香加更好喇。
提拉米苏·拿铁($58)
提拉米苏出色之余,变成咖啡一样好饮!拿铁用嘅House Blend咖啡常用波西米亚咖啡豆,口感厚滑,富坚果香气同时尾韵带少少水果酸甜味,甜感突出易入口。拿铁上面加提拉米苏嘅忌廉、手指饼同可可粉,食嘅时候将手指饼浸入拿铁当中,吸满咖啡味道更香浓。
抹茶拿铁($42)
选用澳洲嘅抹茶粉,入口茶香同鲜味拍得上日本京都出品!抹茶香气明显之余,亦有悠长回甘。原来秘诀在於用抹茶加一部分牛奶打成香浓细滑嘅抹茶奶泡,再倒喺牛奶上面,唔单质营造出分层效果,亦令拿铁口感更浓厚。所以建议大家唔好搅匀,好似饮奶盖茶咁一啖饮齐抹茶奶泡同抹茶牛奶,抹茶香味会更突出呀。
Al Forno Cafe and Bar
地址:铜锣湾告士打道218号地舖
文:Cathy
相、片:Calvin Kwok