最受韓國大學生歡迎嘅韓國街頭小食——韓式熱狗旺角有得食啦！韓國人氣熱狗連鎖店Arirang Hotdog喺韓國有超過80間分店，分店遍布首爾、釜山、大邱、大田、光州等城市，每日即叫即製，深得韓國人歡心～
香港店供應八款口味，分基本款同芝士拉絲兩個系列，熱狗外皮以麵包糠混合麵糰同大米製成，炸得金黃酥脆，內層包住滿滿肉汁嘅香腸，好滿足啊！
拉絲系列有四個口味，分別係雙重芝士拉絲熱狗棒、芝薯拉絲熱狗棒、墨汁芝士拉絲熱狗棒同水牛芝士拉絲熱狗棒，芝士控係咪已經流晒口水呢？
雙重芝士拉絲熱狗棒($34)，炸車打芝士同Mozzarella，芝味濃厚，芝士控不可錯過。
芝薯拉絲熱狗棒($34)，以Mozzarella製成，用薯仔包裹然後油炸，外層香脆。
墨汁芝士拉絲熱狗棒($34)
水牛芝士拉絲熱狗棒($32)
咁當然唔少得基本款阿里郞熱狗棒，仲有其他三款口味車打芝士腸熱狗棒、薯條熱狗棒同車打芝士熱狗棒。
阿里郞熱狗棒($28)，最基本入門款，熱狗腸皮脆多肉汁。
車打芝士腸熱狗棒($32)，將炸香腸換成炸芝士腸，又係芝士控不可錯過嘅一款。
薯條熱狗棒($32)
顧客可以選擇喺熱狗上灑上椰子糖粉，而沾醬都可以自由搭配，有番茄醬、蜂蜜黃芥末醬、起司醬、起司黃芥末醬、辣醬五種畀大家揀，鍾意「混醬」都無問題㗎！而家喺香港終於都食到OPPA同韓妹同款啦！
地址: 旺角奶路臣街12-26號啟賢大廈地下7B號舖
文: Yanica
相、片: Tom Li
